మలయాళం ఇండస్ట్రీలో ఎప్పుడూ బిజీగా ఉండే నటుడు అజు వర్గీస్. ఏ పాత్రనైనా సులభంగా పోషించగల అతని నైపుణ్యం అందరికీ తెలిసిందే. తాజాగా విడుదలైన మలయాళ వెబ్ సిరీస్ ‘కేరళ క్రైమ్ ఫైల్స్ 2’లో అతని నటనకు ప్రశంసలు దక్కుతున్నాయి. కామెడీ పాత్రలతో నవ్వించి, సీరియస్ పాత్రలతో ఆలోచింపజేసే అతని అదిరిపోయే నటనను చూపించే కొన్ని ప్రముఖ మలయాళ సినిమాలు ఇక్కడ ఉన్నాయి.

ఓటీటీలోని అజు వర్గీస్ మూవీస్

1. తట్టతిన్ మరయతు (Thattathin Marayathu)

సన్ నెక్ట్స్ ఓటీటీలో స్ట్రీమింగ్ అవుతున్న సినిమా ఇది. వినోద్, అయేషాతో ప్రేమలో పడతాడు. ఆమె కూడా అతన్ని ప్రేమిస్తుంది. అయితే, వారి విశ్వాసాలు పెళ్లికి అడ్డుగా నిలుస్తాయన్నది వారి ఆందోళన. వినోద్ స్నేహితుడిగా అజు వర్గీస్ ఇందులో నటించాడు. మలయాళం కామెడీ పాత్రల్లో అత్యంత పాపులర్ అయిన అజు వర్గీస్ రోల్స్ లో ఇదీ ఒకటి.

2. గగనచారి (Gaganachari)

అమెజాన్ ప్రైమ్ వీడియోలో ఈ సినిమా ఉంది. కేరళలోని డిస్టోపియన్ శకం ఈ సైన్స్-ఫిక్షన్ మాక్-డాక్యుమెంటరీకి నేపథ్యం. ఒక దూరపు గ్రహం నుండి ఊహించని గ్రహాంతరవాసి రావడంతో అపోకలిప్స్ బంకర్‌లో నివసించే ముగ్గురు బ్యాచిలర్ల జీవితాలు మారిపోతాయి. ఈ ప్రయోగాత్మక చిత్రంలో అజు వర్గీస్ ప్రధాన పాత్ర పోషించారు.

3. ప్రేతమ్ (Pretham)

సన్ నెక్స్ట్ ఓటీటీలో ఈ సినిమా అందుబాటులో ఉంది. ముగ్గురు యువకులు బీచ్ సైడ్ రిసార్ట్‌ను ప్రారంభిస్తారు. కానీ, త్వరలోనే వారికి అతీంద్రియ శక్తులకు సంబంధించిన సంఘటనలు ఎదురవుతాయి. ఈ మూవీ స్టోరీ ప్రేక్షకుల అంచనాలను మించిపోయింది. ‘ప్రేతమ్’ మూవీలో ఆసక్తికరమైన ముగింపు, హాస్య సన్నివేశాలు మళ్లీ మళ్లీ చూసేట్లు చేస్తాయి. ఇందులో అజు వర్గీస్ కామెడీకి ప్రేక్షకుల నుంచి మంచి రెస్పాన్స్ వచ్చింది.

4. ఫోనిక్స్ (Phoenix)

అమెజాన్ ప్రైమ్ వీడియోలో ఉందీ ఫోనిక్స్ మూవీ. కొత్తగా జీవితాన్ని ప్రారంభించడానికి జాన్ తన కుటుంబంతో కలిసి ఒక ఏకాంత ఐలాండ్ టౌన్ వెళ్తాడు. కానీ, అక్కడ భయంకరమైన సంఘటనలు జరుగుతాయి. ఈ మూవీ 1970లలో జరిగిన భయంకరమైన విషాద ప్రేమకథను చూపిస్తుంది. ఈ సంఘటనలు జాన్, అతని కుటుంబాన్ని ఎలా ప్రభావితం చేస్తాయో మూవీ చివరికి తెలుస్తుంది. ఈ సినిమాలో అజు సీరియస్ పాత్రలో కనిపించాడు.

5. స్వర్గం (Swargam)

సన్ నెక్స్ట్ ఓటీటీలో స్వర్గం మూవీ ఉంది. కుటుంబంతో సంతృప్తికరమైన జీవితాన్ని గడిపే రైతు జోసుట్టి, విలాసవంతమైన జీవితాన్ని గడిపే వాక్కాచన్ మధ్య ఉన్న కథ ఇది. వారి వ్యక్తిగత, సామాజిక, ఆర్థిక సంబంధాలు ఎంత భిన్నంగా ఉన్నాయో ఈ సినిమా చూపిస్తుంది. అజు వర్గీస్ ఇందులో జోసుట్టి పాత్రలో నటించాడు.

6. వర్షంగల్కు శేషం (Varshangalkku Shesham)

సోనీ లివ్ ఓటీటీలో వర్షంగల్కు శేషం మూవీ స్ట్రీమింగ్ అవుతోంది. ఓ ప్రతిభావంతుడైన సంగీతకారుడు, మరో కాబోయే దర్శకుడు సినిమా పరిశ్రమలో విజయం సాధించాలనే లక్ష్యంతో చెన్నైకి వెళ్తారు. తమను తాము నిరూపించుకోవాలనే బలమైన కోరికతో పోరాడుతున్నప్పుడు వారి స్నేహం నిలబడుతుందా అనేది ఈ సినిమాలోని ప్రధానాంశం. ఈ సినిమాలు అజు వర్గీస్ హాస్యభరితమైన పాత్ర పోషించాడు.