ఈ ఏడాది అత్యంత ఆసక్తిగా ఎదురుచూస్తున్న వెబ్ సిరీస్‌లలో ఒకటైన ‘ది ఫ్యామిలీ మ్యాన్’ కొత్త సీజన్ టీజర్‌ను ప్రైమ్ వీడియో ఇండియా శుక్రవారం (జూన్ 27) విడుదల చేసింది. నిమిషం నిడివి ఉన్న ఈ వీడియో.. 2019 నుండి 2025 వరకు మనోజ్ బాజ్‌పేయ్ పోషించిన శ్రీకాంత్ తివారీ ప్రయాణాన్ని చూపించింది. ఈ సీజన్‌లో ఎదురుచూస్తున్న యాక్షన్, గందరగోళం ఎలా ఉండబోతోందో చిన్నపాటి గ్లింప్స్ చూపించారు.

‘ది ఫ్యామిలీ మ్యాన్’ సీజన్ 3 టీజర్ విశేషాలు

ది ఫ్యామిలీ మ్యాన్ కొత్త సీజన్‌లో ఒక అపరిచితుడు శ్రీకాంత్‌ను అతని ఉద్యోగం గురించి అడిగినప్పుడు.. అతను సిగ్గుపడుతూ, “లైఫ్ అండ్ రిలేషన్ షిప్స్ కౌన్సిలర్” అని సమాధానం ఇస్తాడు. అతని భార్య సుచిత్ర (ప్రియమణి) ఇది విని నవ్వుకుంటుంది. ఆ తర్వాత టీజర్ ఈ సీజన్‌లో ఎదురుచూస్తున్న యాక్షన్, థ్రిల్‌ను చూపిస్తుంది. ఎన్‌కౌంటర్లు, బాంబు పేలుళ్లు జరుగుతున్న దృశ్యాలు ఆసక్తిని రేకెత్తిస్తున్నాయి.

నిమ్రత్ కౌర్ కొద్దిసేపు కనిపించినా, టీజర్ చివరిలో జైదీప్ అహ్లావత్ కనిపించడమే అభిమానుల దృష్టిని ఆకర్షించింది. అతని ముఖం నల్లటి గుడ్డతో కప్పి ఉన్నప్పటికీ, ఒకే చూపులో అతని కళ్ళలోని తీవ్రతను బట్టి అభిమానులు జైదీప్‌ను గుర్తించారు. ఈ కొత్త వీడియో ఇప్పుడు వైరల్ అవుతోంది.

అభిమానుల స్పందన

ది ఫ్యామిలీ మ్యాన్ సీజన్ 3 టీజర్‌పై స్పందిస్తూ.. ఒక అభిమాని ఇలా వ్యాఖ్యానించాడు. “జైదీప్ అహ్లావత్! ‘పాతాళ్ లోక్’లో కథానాయకుడి నుండి ‘ది ఫ్యామిలీ మ్యాన్ సీజన్ 3’లో విలన్‌గా మారాడు. ఆతృతగా ఎదురుచూస్తున్నాను” అని రాశాడు. ఇంకొక అభిమాని, “ఓ మ్యాన్.. జైదీప్ అహ్లావత్. క్రేజీ లుక్! ఇంకేం అడగలేం. ఎదురుచూసిన దానికి తగ్గ ఫలితం.. ఇప్పుడు దీని కోసం ఎదురుచూస్తున్నాను” అన్నాడు.

మరో అభిమాని జైదీప్ లుక్‌ను ఎంసీయూలోని వింటర్ సోల్జర్‌తో పోల్చాడు. “దేశీ వింటర్ సోల్జర్” అని ఆ కామెంట్లో ఉంది. 2012లో వచ్చిన కల్ట్ క్లాసిక్ ‘గ్యాంగ్స్ ఆఫ్ వాస్సేపూర్’లో ఈ ఇద్దరు నటులు కలిసి కనిపించినట్లు (కానీ స్క్రీన్ పంచుకోలేదు) చాలా మంది అభిమానులు గుర్తించారు. అనురాగ్ కశ్యప్ చిత్రంలో జైదీప్.. మనోజ్ పాత్ర అయిన సర్దార్ ఖాన్ తండ్రి షాహిద్ ఖాన్‌గా నటించాడు.

రాజ్, డీకే, సుమన్ కుమార్ రచన, సుమిత్ అరోరా సంభాషణలతో వస్తున్న ఈ సిరీస్‌కు రాజ్ అండ్ డీకే దర్శకత్వం వహించారు. ఈ సీజన్‌లో సుమన్ కుమార్, తుషార్ సేథ్ దర్శకులుగా చేరారు. ఈ సీజన్లో శ్రీకాంత్ కొత్త శత్రువులు జైదీప్ అహ్లావత్, నిమ్రత్ కౌర్‌లను ఎదుర్కొంటాడు. దేశం లోపల, బయట నుండి వచ్చే బెదిరింపులను ఎదుర్కొంటూ, అతను ఇంతకుముందు చూడని పరిస్థితులలో ప్రయాణించడం కథాంశం. ‘ది ఫ్యామిలీ మ్యాన్ సీజన్ 3’ విడుదల తేదీని ఇంకా ప్రకటించలేదు.