ప్రతీ సంవత్సరం జూలై 1న జాతీయ వైద్యుల దినోత్సవాన్ని జరుపుకుంటారు. దేశం కోసం అహర్నిశలు శ్రమించే వైద్యులను గౌరవించుకోవడానికి, వారి త్యాగాలను గుర్తించడానికి ఈ రోజును కేటాయించారు. 2025 సంవత్సరానికి థీమ్ ఏమిటి, ఈ రోజు చరిత్ర ఏమిటి, దాని ప్రాముఖ్యత ఏమిటి వంటి వివరాలను ఇప్పుడు చూద్దాం.

జాతీయ వైద్యుల దినోత్సవం 2025 థీమ్ ఏమిటి?

ప్రతీ సంవత్సరం జాతీయ వైద్యుల దినోత్సవాన్ని ఒక ప్రత్యేకమైన థీమ్‌తో నిర్వహిస్తారు. ఈ సంవత్సరం (2025) థీమ్ “మాస్క్ వెనుక: వైద్యులకు వైద్యం చేసేది ఎవరు?” (Behind the Mask: Who Heals the Healers?). ఆరోగ్య సంరక్షణ నిపుణులు ఎదుర్కొంటున్న మానసిక, భావోద్వేగ సమస్యలను ఈ థీమ్ హైలైట్ చేస్తుంది. సమాజం వారిని కేవలం సేవకులుగా చూడకుండా, వారి అవసరాలను, కష్టాలను గుర్తించి, సానుభూతి, మద్దతు ఇవ్వాలని, వారి ఆరోగ్యం, శ్రేయస్సు కూడా ముఖ్యమని ఈ థీమ్ గుర్తు చేస్తుంది.

జూలై 1న ఎందుకు జరుపుకుంటారు?

భారత ప్రభుత్వం 1991లో జాతీయ వైద్యుల దినోత్సవాన్ని ప్రారంభించింది. దీనికి కారణం డాక్టర్ బిధాన్ చంద్ర రాయ్‌కి నివాళులర్పించడమే. ఆయన ఒక గొప్ప వైద్యుడు. ప్రజా ఆరోగ్య సంరక్షణలో మార్గదర్శకుడు. డాక్టర్ రాయ్ పశ్చిమ బెంగాల్‌కు రెండో ముఖ్యమంత్రిగా కూడా పనిచేశారు. ఆయనకు భారతదేశ అత్యున్నత పురస్కారమైన భారత్ రత్న కూడా లభించింది. డాక్టర్ రాయ్ 1882 జూలై 1న జన్మించారు. 1962 జూలై 1న మరణించారు.

ఆయన స్థాపించిన ఇండియన్ మెడికల్ అసోసియేషన్ (IMA), మెడికల్ కౌన్సిల్ ఆఫ్ ఇండియా (MCI) వంటి కీలక వైద్య సంస్థలు ఆయన వారసత్వాన్ని, దేశ వైద్య రంగానికి ఆయన చేసిన సేవలను ఇప్పటికీ గుర్తుచేస్తాయి. ఆయన కృషి ఇప్పటికీ దేశ వైద్య రంగాన్ని ప్రభావితం చేస్తూనే ఉంది.

జాతీయ వైద్యుల దినోత్సవం ప్రాముఖ్యత

జాతీయ వైద్యుల దినోత్సవం వైద్యులు, ఆరోగ్య సంరక్షణ కార్యకర్తల నిరంతర అంకితభావం, కఠోర శ్రమ మన ఆరోగ్యం, శ్రేయస్సును కాపాడటానికి వారు చూపిన తెగువకు కృతజ్ఞతలు చెప్పడానికి ఒక ముఖ్యమైన సందర్భం. ఇది ఆరోగ్య సంరక్షణ వ్యవస్థను ఎలా మెరుగుపరచాలి, వ్యాధుల నివారణ ప్రయత్నాలను ఎలా బలోపేతం చేయాలి అనే విషయాలపై చర్చించడానికి కూడా ఒక అవకాశాన్ని అందిస్తుంది. ఈ రోజున, ఉచిత ఆరోగ్య శిబిరాలు, సదస్సులు, సెమినార్లు, అవార్డు ప్రదానోత్సవాలు వంటి కార్యక్రమాలు జరుగుతాయి.