అమరావతి: ఆంధ్రప్రదేశ్ ప్రభుత్వం ఆంధ్రప్రదేశ్ రాజధాని ప్రాంత భూ సమీకరణ పథకం (రూపకల్పన, అమలు) నిబంధనలు-2025ను నోటిఫై చేసింది. ఈ నిబంధనలు నవశక రాజధాని అమరావతిని నిర్మించడానికి భూమిని సేకరించే ప్రత్యేక పద్ధతిని నియంత్రిస్తాయి.

ఈ నిబంధనలు ‘రాజధాని ప్రాంతానికి (Capital Region))’ వర్తిస్తాయని, అయితే ‘రాజధాని నగరం’ ప్రాంతానికి మాత్రం ఆంధ్రప్రదేశ్ రాజధాని నగర భూ సమీకరణ పథకం (రూపకల్పన, అమలు) నిబంధనలు-2015 వర్తిస్తాయని పురపాలక పరిపాలన, పట్టణాభివృద్ధి శాఖ ముఖ్య కార్యదర్శి ఎస్. సురేష్ కుమార్ తెలిపారు.

“ప్రభుత్వ సంకల్పం మేరకు ‘ప్రజా రాజధాని’ని నిర్మించడానికి, అలాగే విమానాశ్రయాలు, నౌకాశ్రయాలు, ఇతర అవసరమైన అన్ని మౌలిక సదుపాయాల ప్రాజెక్టులను నిర్మించడానికి, భూసేకరణ యంత్రాంగాన్ని స్వచ్ఛంద పథకంగా రూపొందించాం” అని కుమార్ ఒక ప్రభుత్వ ఉత్తర్వు (GO)లో పేర్కొన్నారు.

ఇది భూయజమానులు, ప్రభుత్వం/అధికార సంస్థ మధ్య పరస్పర ఏకాభిప్రయంపై ఆధారపడి ఉంటుందని కుమార్ తెలిపారు. భూసేకరణలో ఇది ఒక ప్రత్యేక పద్ధతి అని, దీనికి ‘భూ సమీకరణ పథకం’ అని పేరు పెట్టారని ఆయన అన్నారు.

‘భూ సమీకరణ పథకం’ నిబంధనలు ప్రభుత్వం అమరావతి, మంగళగిరి, తాడేపల్లి, గుంటూరు, విజయవాడలను కలిపి ‘మెగా సిటీ’గా మార్చాలని యోచిస్తున్న సమయంలో వచ్చాయి. ఈ ప్రయత్నం ద్వారా ఇప్పటికే అమరావతి కోసం ప్రభుత్వం వద్ద ఉన్న 54,000 ఎకరాలకు అదనంగా మరో 40,000 ఎకరాల భూమిని సేకరించాలని లక్ష్యంగా పెట్టుకుంది.

అమరావతిలో అంతర్జాతీయ విమానాశ్రయం నిర్మించాలని ప్రభుత్వం ప్రణాళికలు రచిస్తోంది. ‘భూ సమీకరణ పథకం’ రాజధాని ప్రాంత అభివృద్ధి కోసం రూపొందింది. ఇందులో రైతులు, యజమానులు లేదా యజమానుల బృందం యాజమాన్యంలోని భూములను ఒక అభివృద్ధి పథకం కింద అధికార సంస్థ ఏకీకృతం చేస్తుంది.

‘భూ సమీకరణ పథకం’ అనేది ఆంధ్రప్రదేశ్ రాష్ట్ర శాసనసభ ద్వారా రూపొందిన మెరుగైన పథకం. 2013 నాటి భూసేకరణ, పునరావాసం, పునర్నిర్మాణ చట్టంలోని సెక్షన్లు 107, 108 కింద ఇది సాధ్యమైంది.

“ఈ పథకం విస్తృత లక్ష్యం ఆంధ్రప్రదేశ్ రాష్ట్రానికి నివాసయోగ్యమైన, సుస్థిరమైన రాజధాని ప్రాంత నిర్మాణంతో ప్రభావితమైన కుటుంబాలకు, అలాగే రాజధాని ప్రాంతంలోని రైతులు, భూయజమానులకు న్యాయం చేయడం. మెరుగైన పరిహారం పొందడానికి, రాష్ట్ర అభివృద్ధి ప్రక్రియలో వారిని భాగస్వామ్యం చేయడానికి కూడా ఇది ఉద్దేశించింది” అని ముఖ్య కార్యదర్శి అన్నారు.

భాగస్వాములైన భూయజమానులకు పునర్నిర్మించిన ప్లాట్‌తో పాటు అభివృద్ధి చేసిన మౌలిక సదుపాయాలు, ఇతర ప్రయోజనాలతో సరసమైన పరిహారం లభించేలా ఈ పథకం రూపొందిందని కుమార్ వివరించారు.