శంకర్‌ దర్శకత్వంలో రామ్ చరణ్, ఎస్.జె. సూర్య, కియారా అద్వానీ ప్రధాన పాత్రల్లో నటించిన ‘గేమ్ ఛేంజర్’ సినిమా విడుదలై ఆరు నెలలైంది. భారీ అంచనాల మధ్య రిలీజైనా అది బాక్సాఫీస్ వద్ద పరాజయం పాలైంది. అయితే ఇన్నాళ్లకు ఇప్పుడు మళ్ళీ అందరూ ఈ సినిమా గురించి మాట్లాడుకుంటున్నారు.

దీనికి కారణం ఈ సినిమా నిర్మాతలు దిల్ రాజు, శిరీష్‌లు ఇటీవల ఒక ఇంటర్వ్యూలో చేసిన కొన్ని వ్యాఖ్యలు మెగా అభిమానులను తీవ్రంగా బాధపెట్టాయి. దీంతో, ఈ వ్యాఖ్యలపై ఇద్దరూ వివరణ ఇచ్చుకోవాల్సి వచ్చింది.

మెగా అభిమానులకు శిరీష్ క్షమాపణ

‘గ్రేట్ ఆంధ్ర’కు ఇచ్చిన ఒక ఇంటర్వ్యూలో శిరీష్ మాట్లాడుతూ, ‘గేమ్ ఛేంజర్‘ పరాజయం తర్వాత తమ జీవితాలు అయిపోయినట్లేనని భావించామని, అయితే వెంకటేష్ నటించిన ‘సంక్రాంతికి వస్తున్నాం’ సినిమా తమను నిలబెట్టిందని అన్నాడు. అంతేకాదు, సినిమా బాక్సాఫీస్ వద్ద విఫలమైన తర్వాత శంకర్‌ గానీ, రామ్ చరణ్‌ గానీ తమకు ఫోన్ చేయలేదని కూడా ఆ ఇంటర్వ్యూలో ప్రస్తావించాడు. హీరో, దర్శకులు నిర్మాతలకు ఫోన్ చేయాల్సిందేనా అనే వాదనతో చిరంజీవి, రామ్ చరణ్ అభిమానులు ఆగ్రహం వ్యక్తం చేశారు.

అభిమానుల ఆగ్రహాన్ని గమనించిన శిరీష్, ఒక పత్రికా ప్రకటన విడుదల చేసి క్షమాపణలు కోరాడు. తన వ్యాఖ్యలను తప్పుగా అర్థం చేసుకున్నారని పేర్కొన్నాడు. “నేను ఒక ఇంటర్వ్యూలో మాట్లాడిన మాటలు సోషల్ మీడియాలో అపార్థానికి దారితీసి, మెగా అభిమానుల మనసులను గాయపరిచాయని తెలిసింది. గ్లోబల్ స్టార్ రామ్ చరణ్ ‘గేమ్ ఛేంజర్’ సినిమా కోసం మాకు పూర్తి సమయం, సపోర్ట్ ఇచ్చారు.

మెగాస్టార్ చిరంజీవి గారి కుటుంబంతో మాకు చాలా ఏళ్లుగా సన్నిహిత సంబంధం ఉంది. చిరంజీవి గారు, రామ్ చరణ్ గారు, ఇతర మెగా హీరోల ప్రతిష్టకు భంగం కలిగించే విధంగా మేము ఎప్పుడూ మాట్లాడము. నా మాటలు ఎవరి మనోభావాలనైనా గాయపరిచి ఉంటే.. దయచేసి నన్ను క్షమించండి” అని శిరీష్ అన్నాడు.

దిల్ రాజు వివరణ.. శిరీష్ వ్యాఖ్యల సమర్థన

శిరీష్ కామెంట్స్ పై దిల్ రాజు ’10 టీవీ’కి ఇచ్చిన ఇంటర్వ్యూలో మాట్లాడాడు. శిరీష్‌ను సమర్థించుకుంటూ, అది కేవలం ‘అపార్థం’ మాత్రమేనని అన్నాడు. ‘గేమ్ ఛేంజర్’ నిర్మాణంలో తాను ఎక్కువగా పాల్గొన్నానని, శిరీష్ మాత్రం ‘సంక్రాంతికి వస్తున్నాం’ సినిమా బాధ్యతలు చూసుకున్నారని చెప్పాడు. రామ్ చరణ్‌ను ఉద్దేశించి తాను ఎప్పుడూ నిందించలేదని, ‘ఇండియన్ 2’ సినిమా, శంకర్‌తో ‘వేవ్‌లెంత్ కుదరకపోవడం’ వంటివి సినిమా ఆలస్యం కావడానికి కారణమయ్యాయని రాజు వివరించాడు.

“చరణ్ అన్నిటికీ ఓపికగా ఎదురు చూశాడు. కానీ ‘సంక్రాంతికి వస్తున్నాం’ హిట్‌ అయినప్పుడు, అతను బాధపడి ఉంటాడని నేను కచ్చితంగా అనుకుంటున్నాను. శంకర్‌పై గౌరవంతో, ఎంత సమయం పట్టినా, ఇతర సినిమాలు చేయకూడదని అతను నిర్ణయించుకున్నాడు. శిరీష్ ఇటీవల మొదటిసారి ఇంటర్వ్యూ ఇచ్చాడు. అతను సాధారణంగా పెద్దగా మాట్లాడడు. ‘సంక్రాంతికి వస్తున్నాం’ సినిమా గురించి భావోద్వేగంతో మాట్లాడాడు. ఆ సందర్భంలోనే అది చెప్పాడు. ఎందుకంటే ఆ సినిమా లేకపోతే మేము చాలా నష్టపోయేవాళ్లం. కానీ అతని ఉద్దేశం తప్పు కాదు. శిరీష్.. చరణ్‌కు చాలా సన్నిహితుడు. మీడియా అనుభవం లేకపోవడం వల్లే ఈ పొరపాటు జరిగింది” అని దిల్ రాజు చెప్పుకొచ్చాడు.

‘గేమ్ ఛేంజర్’ సినిమా భారీ బడ్జెట్‌తో నిర్మించారు. ఈ సంక్రాంతికి బాలకృష్ణ నటించిన ‘డాకు మహారాజ్’, వెంకటేష్ నటించిన ‘సంక్రాంతికి వస్తున్నాం’ సినిమాలతో పాటు విడుదలైంది. ‘గేమ్ ఛేంజర్’ ప్రపంచవ్యాప్తంగా రూ.186.25 కోట్లు వసూలు చేయగా, ‘సంక్రాంతికి వస్తున్నాం’ తక్కువ బడ్జెట్‌తో నిర్మించినప్పటికీ రూ.255.2 కోట్లు రాబట్టింది. ఇక ‘డాకు మహారాజ్’ కూడా రూ.125.8 కోట్లు వసూలు చేసి, బాలకృష్ణ కెరీర్‌లో ‘అఖండ’ తర్వాత రెండవ అత్యధిక వసూళ్లు సాధించిన చిత్రంగా నిలిచింది.