బెంగళూరులోని ఐటీ దిగ్గజం ఇన్ఫోసిస్ ఎలక్ట్రానిక్ సిటీ క్యాంపస్ లోని విశ్రాంతి గదిలో మహిళా సహోద్యోగుల అశ్లీల వీడియోలను చిత్రీకరించిన 28 ఏళ్ల ఉద్యోగిని పోలీసులు అరెస్టు చేశారు. ఈ షాకింగ్ సంఘటన ఇటీవల వెలుగులోకి వచ్చింది.

రహస్యంగా చిత్రీకరణ

ఒక మహిళా ఉద్యోగి బాత్రూమ్ కు వెళ్లిన సమయంలో అక్కడ ఒక అసాధారణమైన విషయాన్ని గమనించింది. ఎదురుగా ఉన్న గోడలో నుంచి ఎవరో రహస్యంగా రికార్డ్ చేస్తున్న విషయాన్ని ఆ మహిళ గుర్తించింది. జాగ్రత్తగా ఆ ప్రాంతాన్ని పరిశీలించిన ఆమెకు గోడకు అవతలవైపు దాక్కుని రహస్యంగా తన ఫోన్ తో వీడియో రికార్డు చేస్తున్న పురుష సహోద్యోగిని చూసి షాక్ కు గురైంది. వెంటనే ఆమె అందరినీ అప్రమత్తం చేసింది. అక్కడకు చేరుకున్న ఇతర ఉద్యోగులు, సెక్యూరిటీ సిబ్బంది అతడిని బంధించారు.

ఆంధ్రప్రదేశ్ కు చెందిన నిందితుడు

నిందితుడిని ఆంధ్రప్రదేశ్ కు చెందిన స్వప్నిల్ నగేష్ మాలిగా గుర్తించారు. అతడిని విచారించగా అక్కడికక్కడే క్షమాపణలు చెప్పాడు. అయితే బాధితురాలు ఈ ఘటనపై ఇన్ఫోసిస్ హెచ్ ఆర్ విభాగానికి ఫిర్యాదు చేయడంతో విషయం మరింత ముదిరింది. నిందితుడి మొబైల్ లో 30కి పైగా అశ్లీల వీడియోలను గుర్తించారు. నిందితుడి ఫోన్ ను పరిశీలించిన కార్యాలయ అంతర్గత బృందం అందులో వివిధ మహిళల 30 అశ్లీల వీడియోలను గుర్తించింది.

పోలీసులకు ఫిర్యాదు

ఈ విషయం బాధితురాలి భర్తకు తెలియడంతో వారు ఎలక్ట్రానిక్ సిటీ పోలీస్ స్టేషన్ లో ఫిర్యాదు చేశారు. ఆమె వాంగ్మూలం, సాక్ష్యాధారాల ఆధారంగా స్వప్నిల్ ను అరెస్టు చేశారు. ప్రైవసీ ఆక్రమణ, లైంగిక వేధింపులకు సంబంధించిన తీవ్రమైన అభియోగాలను ఆయన ఇప్పుడు ఎదుర్కొంటున్నారు. ఈ విషయంపై ఇన్ఫోసిస్ ఇంకా వివరణాత్మక బహిరంగ ప్రకటన విడుదల చేయలేదు.