భారత అత్యున్నత న్యాయస్థానం సుప్రీంకోర్టు 2025 సంవత్సరానికి గాను కోర్ట్ మాస్టర్ (షార్ట్‌హ్యాండ్) పోస్టుల భర్తీకి ఆన్‌లైన్ దరఖాస్తులను ఆహ్వానిస్తోంది. గెజిటెడ్ పోస్ట్ అయిన ఈ ఉద్యోగాలకు మొత్తం 30 ఖాళీలు ఉన్నట్లు అధికారిక నోటిఫికేషన్ (నెం. F.6/RC(CM)-2025, తేదీ జూలై 28, 2025) లో ప్రకటించింది. ఈ ఉద్యోగాలకు ఎంపికైన వారికి నెలకు రూ. 67,700 జీతంతో పాటు ఇతర భత్యాలు లభిస్తాయి.

ఖాళీల వివరాలు..

ఈ రిక్రూట్‌మెంట్‌లో మొత్తం 30 కోర్ట్ మాస్టర్ (షార్ట్‌హ్యాండ్) పోస్టులు ఉన్నాయి. వీటిలో 16 పోస్టులు అన్‌రిజర్వ్‌డ్ కేటగిరీకి, 4 షెడ్యూల్డ్ కులాలకు, 2 షెడ్యూల్డ్ తెగలకు, 8 వెనుకబడిన తరగతులకు కేటాయించారు.

అర్హత ప్రమాణాలు..

వయస్సు: అభ్యర్థులు 30 నుంచి 45 సంవత్సరాల మధ్య వయస్సు కలిగి ఉండాలి.

విద్యార్హతలు: ఏదైనా గుర్తింపు పొందిన విశ్వవిద్యాలయం నుంచి డిగ్రీతో పాటు షార్ట్‌హ్యాండ్ (ఇంగ్లీష్)లో నిమిషానికి 120 పదాల వేగం, కంప్యూటర్‌లో నిమిషానికి 40 పదాల టైపింగ్ వేగం ఉండాలి.

అనుభవం: సంబంధిత స్టెనోగ్రఫీ లేదా సెక్రటేరియల్ పాత్రల్లో కనీసం ఐదేళ్ల అనుభవం తప్పనిసరి.

లా డిగ్రీ: న్యాయశాస్త్రంలో డిగ్రీ ఉన్న అభ్యర్థులకు ఎంపిక ప్రక్రియలో అదనపు ప్రాధాన్యత లభిస్తుంది.

• ఏపీ అటవీ శాఖలో ఉద్యోగాలు- పూర్తి వివరాలు తెలుసుకునేందుకు ఇక్కడ క్లిక్​ చేయండి.

ఎంపిక ప్రక్రియ..

ఎంపిక ప్రక్రియలో నాలుగు దశలు ఉంటాయి:

• షార్ట్‌హ్యాండ్ టెస్ట్.
• ఆబ్జెక్టివ్ టైప్ రాత పరీక్ష.
• కంప్యూటర్‌లో టైపింగ్ స్పీడ్ టెస్ట్.
• ఇంటర్వ్యూ.

దరఖాస్తు ఎలా చేసుకోవాలి?

ఆసక్తిగల అభ్యర్థులు కేవలం www.sci.gov.in అనే అధికారిక వెబ్‌సైట్ ద్వారా ఆన్‌లైన్‌లో మాత్రమే దరఖాస్తు చేసుకోవాలి. దరఖాస్తు ప్రక్రియ త్వరలో ప్రారంభమవుతుంది. జనరల్ కేటగిరీ అభ్యర్థులకు దరఖాస్తు ఫీజు రూ. 1500 కాగా, ఎస్సీ, ఎస్టీ, ఓబీసీ, దివ్యాంగులు, మాజీ సైనికులు, స్వాతంత్ర్య సమరయోధుల వారసులకు రూ. 750 ఫీజుగా నిర్ణయించారు. ఈ ఫీజును యూసీఓ బ్యాంక్ పేమెంట్ గేట్‌వే ద్వారా చెల్లించవచ్చు.

ఈ ఉద్యోగం ఎందుకు ముఖ్యం?

సుప్రీంకోర్టులో కోర్ట్ మాస్టర్ పోస్ట్ చాలా ముఖ్యమైనది. కోర్ట్ మాస్టర్లు న్యాయమూర్తులకు కోర్టు కార్యకలాపాలను రికార్డ్ చేయడంలో, కేసు పత్రాలను నిర్వహించడంలో, న్యాయపరమైన కార్యకలాపాలు సజావుగా జరిగేలా చూసుకోవడంలో సహాయపడతారు. అందుకే ఈ ఉద్యోగం భారత న్యాయ వ్యవస్థలో గొప్ప బాధ్యత- ప్రతిష్టతో కూడుకున్నది.