పశ్చిమ బెంగాల్-ఒడిశా తీరాలకు ఆనుకుని వాయువ్య బంగాళాఖాతం మీదుగా ఉపరితల ఆవర్తనం కొనసాగుతోంది. సముద్ర మట్టానికి సగటున 1.5, 5.8 కి.మీ ఎత్తులో ఈ ఆవర్తనం కొనసాగుతుందని వాతావరణశాఖ తెలిపింది. అంతేకాకుండా…. ఎల్లుండి వాయువ్య బంగాళఖాతంలో అల్పపీడనం ఏర్పడే అవకాశం ఉంది. ఈ ప్రభావంతో మళ్లీ తెలుగు రాష్ట్రాల్లో వర్షాలు పడనున్నాయి.

ఉపరితల ఆవర్తనం, అల్పపీడనం ప్రభావంతో ఏపీలో మూడు నాలుగు రోజుల పాటు అక్కడక్కడ మోస్తరు నుంచి భారీ వర్షాలు కురిసే అవకాశం ఉంది. ప్రజలు అప్రమత్తంగా ఉండాలని హెచ్చరించింది. ఈ మేరకు ఏపీ విపత్తుల నిర్వహణ సంస్థ ప్రకటన విడుదల చేసింది.

ఎల్లో హెచ్చరికలు జారీ…

ఇక తెలంగాణలో కూడా మరికొన్ని రోజులు వర్షాలు పడే అవకాశం ఉంది. ఇవాళ ఆసిఫాబాద్, మంచిర్యాల, నిర్మల్, పెద్దపల్లి, భూపాలపల్లి, మలుగు, కొత్తగూడెం, ఖమ్మం, సూర్యాపేట జిల్లాల్లో భారీ వర్షాలు పడే అవకాశం ఉంది. మరికొన్ని జిల్లాల్లో ఉరుములు, మెరుపులతో కూడిన వర్షాలు పడొచ్చు. ఈ ఈ జిల్లాలకు ఎల్లో హెచ్చరికలు జారీ అయ్యాయి.

రేపు(సెప్టెంబర్ 1) ఆసిఫాబాద్, మంచిర్యాల, నిర్మల్, పెద్దపల్లి, భూపాలపల్లి, ములుగు, కొత్తగూడెం జిల్లాల్లోని పలుచోట్ల భారీ వర్షాలు పడే అవకాశం ఉంది. మరికొన్ని జిల్లాల్లో ఉరుములు, మెరుపులు, ఈదురుగాలులతో కూడిన వానలు పడొచ్చు.

ఎల్లుండి ఆదిలాబాద్, నిర్మల్, నిజామాబాద్, కొత్తగూడెం, కామారెడ్డి జిల్లాల్లోని పలుచోట్ల భారీ వర్షాలు పడే అవకాశం ఉందని హైదరాబాద్ వాతావరణ కేంద్రం అంచనా వేసింది. ఈ మేరకు ఎల్లో హెచ్చరికలును జారీ చేసింది.

భద్రాచలం వద్ద వరద ఉద్ధృతి:

మరోవైపు భద్రాచలం వద్ద గోదావరి నీటిమట్టం 48 అడుగులకు చేరుకోవడంతో రెండో ప్రమాద హెచ్చరికను అధికారులు జారీ చేశారు. ఉదయం 9 గంటలకు నది ప్రమాద స్థాయికి చేరుకుందని భద్రాద్రి కొత్తగూడెం జిల్లా కలెక్టర్ జితేష్ వి పాటిల్ తెలిపారు.

గోదావరి ఎగువ పరీవాహక ప్రాంతాల్లో కురుస్తున్న భారీ వర్షాలతో ముంపు గ్రామాల ప్రజలు అప్రమత్తంగా ఉండాలని కోరారు. పునరావాసం కోసం అవసరమైన చర్యలు తీసుకున్నామని, అవసరమైతే మరిన్ని పునరావాస కేంద్రాలను ఏర్పాటు చేసేందుకు అధికారులు సిద్ధంగా ఉన్నారని కలెక్టర్ తెలిపారు.

ప్రజలకు తాగునీరు, ఆహారం, వైద్య సేవలు, విద్యుత్ సరఫరా వంటి కనీస సౌకర్యాలు అందుబాటులో ఉండేలా చూడాలని సంబంధిత శాఖల అధికారులను ఆదేశించారు. కలెక్టర్ ఆదేశాల మేరకు రెవెన్యూ, పోలీసు, ఆరోగ్య, పంచాయతీరాజ్, మున్సిపల్, విద్యుత్ తదితర శాఖల అధికారులు పరిస్థితిని పర్యవేక్షిస్తున్నారు. గోదావరిలో స్నానాలకు వెళ్లొద్దని, బోటు ప్రయాణాలను పూర్తిగా నిషేధించామని అధికారులు తెలిపారు.