సినిమాలకు దూరంగా ఉన్నప్పటికీ, సోషల్ మీడియాలో ఎప్పుడూ యాక్టివ్‌గా ఉండే నటి ఇలియానా. ఇప్పుడు ఇద్దరు కుమారుల తల్లిగా పూర్తిస్థాయిలో మాతృత్వాన్ని ఆస్వాదిస్తున్న ఆమె, ఇటీవల తన ప్రసవానంతర అనుభవాలను పంచుకుంది. ముఖ్యంగా బిడ్డకు పాలివ్వడం విషయంలో ఎదురైన సవాళ్లను, భావోద్వేగాలను నిస్సంకోచంగా వెల్లడించింది.

గందరగోళంతో మొదలైన ప్రయాణం

తల్లి కావడానికి ముందు, చాలామందిలాగే ఇలియానా కూడా తన స్నేహితులను సంప్రదించింది. ‘ప్రసవం తర్వాత పరిస్థితి ఎలా ఉంటుంది? తల్లిగా ఎలా సిద్ధం కావాలి?’ అని వివరాలు అడిగి తెలుసుకుంది. ఆమె స్నేహితురాలు “తల్లిపాలు ఇవ్వడం చాలా కష్టం. అది నొప్పిగా అనిపించవచ్చు. కానీ అదే సమయంలో అది ఎంతో అందమైన అనుభవం” అని చెప్పింది. అయితే, ఆ నొప్పి ఎంత తీవ్రంగా ఉంటుందో తనకు అప్పుడు తెలియదని ఇలియానా చెప్పింది. “అంత నొప్పి ఉంటుందని నేను అస్సలు ఊహించలేదు” అని ఆమె ఆశ్చర్యంగా చెప్పుకొచ్చింది.

భావోద్వేగ బంధం

ఈ కష్టాల మధ్య కూడా, బిడ్డకు పాలివ్వడం అనేది ఒక విశేషాధికారం అని ఇలియానా అభిప్రాయపడింది. “నా బిడ్డకు నేను పాలివ్వగలగడం ఒక అద్భుతమైన అనుభవం. ఆ సమయంలో బిడ్డతో ఏర్పడే బంధం చాలా ప్రత్యేకమైనది. ఎంతో ప్రేమతో నిండి ఉంటుంది” అని ఆమె వివరించింది. ఈ అనుభవం ద్వారా బిడ్డతో ఒక ప్రత్యేకమైన బంధం ఏర్పడుతుందని ఆమె భావోద్వేగంగా వెల్లడించింది.

వైద్య నిపుణురాలి నుంచి చేదు అనుభవం

తల్లిపాలు ఇవ్వడంపై సూచనలు తెలుసుకోవడానికి ఆసుపత్రిలో ఒక నిపుణురాలిని కలిసినప్పుడు, ఆమె వ్యవహరించిన తీరు తనని నిరాశపరిచిందని ఇలియానా గుర్తు చేసుకుంది. “ఆమె అడిగిన మొదటి ప్రశ్న ‘మీరు బిడ్డకు పాలివ్వాలనుకుంటున్నారా? లేదా ఫార్ములా ఫీడింగ్‌ కూడా ఇస్తారా?’ అని. అది నా మనసుకు చాలా బాధ కలిగించింది. నేను కేవలం తల్లిపాలు మాత్రమే ఇవ్వాలనుకుంటున్నాను అని చెప్పాను. కానీ, ఏ క్షణంలో ఏం జరుగుతుందో మనకు తెలియదు కదా?” అంటూ ఆమె తన మనసులోని మాటను పంచుకుంది. ప్రతి తల్లికీ, ప్రతి బిడ్డకూ వారి వారి ప్రయాణం ప్రత్యేకంగా ఉంటుందని, ఏది మంచిదో ఒక తల్లికి సహజంగానే తెలుస్తుందని ఇలియానా పేర్కొంది.

గందరగోళ సలహాలు, భయం.. ఆ తర్వాత

తొలి రోజుల్లో ఎన్నో గందరగోళ సలహాలు తనని ఆందోళనకు గురి చేశాయని ఇలియానా చెప్పింది. కొందరు తనకు పాలు ఇవ్వడం మానేయమని చెబితే, మరికొందరు పాలు బయటకు తీసేందుకు పంపింగ్ చేయమని సూచించారట. ఎవరి సలహా పాటించాలో తెలియక మొదట్లో చాలా కంగారు పడ్డానని చెప్పింది. “ఆ నొప్పి చాలా తీవ్రంగా ఉండేది. నా ఒంటికి జ్వరం కూడా వచ్చింది. పరిస్థితి చాలా దారుణంగా ఉండేది” అని ఆమె తన అనుభవాన్ని వివరించింది. ముఖ్యంగా, తొలిసారి తల్లి అయినప్పుడు ఏదైనా తప్పు చేస్తే బిడ్డకు హాని జరుగుతుందేమోనని ఎంతో భయపడ్డానని, అందుకే నిపుణులపై ఆధారపడ్డానని చెప్పింది. కానీ కాలం గడిచే కొద్దీ, తన సొంత ఆలోచనను నమ్మడం నేర్చుకున్నానని ఇలియానా పేర్కొంది.

(గమనిక: ఇది కేవలం సమాచారం కోసం మాత్రమే. వైద్యపరమైన సలహా కోసం ఎల్లప్పుడూ నిపుణులను సంప్రదించండి.)