ఓటీటీలోకి ఈ వారం తెలుగుకు సంబంధించి ముఖ్యమైన సినిమాలు, షో వస్తున్నాయి. కన్నప్ప మూవీతోపాటు బిగ్ బాస్ 9 తెలుగు కూడా ఈవారమే ప్రారంభం కానుంది. దీంతోపాటు కన్నడ, మలయాళం ఇండస్ట్రీలకు చెందిన సినిమాలు, వెబ్ సిరీస్ కూడా స్ట్రీమింగ్ కాబోతున్నాయి. ప్రైమ్ వీడియో, జియోహాట్‌స్టార్, సన్ నెక్ట్స్ లాంటి ఓటీటీల్లోకి ఈ కొత్త కంటెంట్ రాబోతోంది. మరి అవేంటో ఒకసారి చూద్దాం.

కన్నప్ప – అమెజాన్ ప్రైమ్ వీడియో

విష్ణు మంచు టైటిల్ రోల్‌లో నటించిన కన్నప్ప సినిమా అతని డ్రీమ్ ప్రాజెక్ట్‌లలో ఒకటి. ఈ సినిమా ఒక నాస్తికుడు ఎలా శివ భక్తుడిగా మారుతాడో చూపిస్తుంది. సినిమా హైలైట్స్‌లో ఒకటి ప్రభాస్, అక్షయ్ కుమార్, మోహన్ లాల్ ల క్యామియోలు. ప్రీతి ముకుందన్ కూడా ‘కన్నప్ప’లో ఫీమేల్ లీడ్‌గా నటించింది. సినిమా ప్రైమ్ వీడియోలోకి శుక్రవారం (సెప్టెంబర్ 4) వస్తుంది. ఓటీటీప్లే ప్రీమియం సబ్‌స్క్రైబర్స్ కూడా ఒక టాప్-అప్ ఆప్షన్‌తో చూడొచ్చు.

బిగ్ బాస్ 9 తెలుగు – జియోహాట్‌స్టార్

పాపులర్ స్టార్ నాగార్జున అక్కినేని బిగ్ బాస్ తెలుగు సీజన్ 9 కి హోస్ట్ గా తిరిగి వస్తున్నాడు. ‘రణరంగం’ అనే పేరుతో ఈ తెలుగు రియాలిటీ షో ఈసారి సరికొత్తగా రాబోతోంది. ఈసారి సెలబ్రిటీలతోపాటు సామాన్యులు కూడా షోలోకి రానున్నారు. ఈ రియాల్టీ షో 9వ సీజన్ ఆసక్తి రేపుతోంది. ఆదివారం (సెప్టెంబర్ 7) నుంచి ఈ కొత్త సీజన్ ప్రారంభం కానుంది.

కమ్మట్టం – జీ5 ఓటీటీ

యాక్టర్ సుదేవ్ నాయర్ లీడ్ రోల్లో ఉన్న ఈ మలయాళ వెబ్ సిరీస్ కమ్మట్టం. త్రిస్సూర్‌లో జరిగిన వాస్తవ ఘటనల ఆధారంగా తీసింది. షాన్ తులసిధరన్ ఈ సిరీస్‌కు దర్శకత్వం వహించాడు. ఈ సిరీస్ కేవలం 11 రోజుల్లో షూటింగ్ పూర్తి చేసుకుంది. ఒక ఫైనాన్షియల్ స్కామ్, ఒక మిస్టరీయస్ మరణం ఈ థ్రిల్లర్ సిరీస్ కథాంశం. జీ5 ఓటీటీలో శుక్రవారం (సెప్టెంబర్ 5) నుంచి స్ట్రీమింగ్ కానుంది.

ఫుటేజ్ – సన్ నెక్ట్స్ ఓటీటీ

మలయాళం మూవీ ఫుటేజ్. ఇదొక ఫౌండ్ ఫుటేజ్ ఫార్మాట్ లో వచ్చిన తొలి మలయాళం సినిమా. ఇందులో మంజు వారియర్ తో పాటు విశాక్ నాయర్, గాయత్రి అశోక్ నటించారు. వ్లాగర్స్ అయిన ఓ జంట.. తమ పొరిగింట్లో ఉన్న ఓ మిస్టీరియస్ మహిళ గురించి తెలుసుకోవడానికి ప్రయత్నిస్తారు. ఎడిటర్ సైజు శ్రీధరన్ ఈ సినిమాతో డైరెక్టర్‌గా ఎంట్రీ ఇచ్చాడు. ఈ సినిమా ఇంట్రెస్టింగ్ గా అనిపిస్తోంది. శుక్రవారం (సెప్టెంబర్ 5) నుంచి సన్ నెక్ట్స్ ఓటీటీలో స్ట్రీమింగ్ కానుంది.

సు ఫ్రమ్ సో – జియోహాట్‌స్టార్

పాపులర్ కన్నడ సినిమా ‘సు ఫ్రమ్ సో’ కర్ణాటకలోనే కాకుండా కేరళలో కూడా బాక్స్ ఆఫీస్ దగ్గర మంచి రెస్పాన్స్ తెచ్చుకుంది. సులోచన ఫ్రమ్ సోమేశ్వర అనేది ఈ మూవీ పేరు. ఈ సినిమా కథ ప్రసాద్ అనే ఒక యువకుడి చుట్టూ తిరుగుతుంది. అతను ఒక ఇబ్బందికరమైన పరిస్థితి నుంచి బయటపడటానికి ఒక విచిత్రమైన ఐడియాతో ముందుకు వస్తాడు. అతనితోపాటు పక్క ఊరు నుంచి ఓ ఆత్మ కూడా వచ్చిందని ఆ ఊళ్లో వాళ్లు నమ్మడంతో అసలు కష్టాలు మొదలవుతాయి. ఈ సినిమా శుక్రవారం (సెప్టెంబర్ 5) నుంచి జియోహాట్‌స్టార్ లో స్ట్రీమింగ్ అయ్యే అవకాశాలు ఉన్నట్లు భావిస్తున్నారు.