కూలీ మూవీ డిజిటల్ ప్రీమియర్ కు సిద్ధమైంది. అందరూ ఊహించినట్లే సెప్టెంబర్ 11 నుంచి ఈ సినిమా ప్రైమ్ వీడియోలో స్ట్రీమింగ్ కానుంది. ఈ విషయాన్ని బుధవారం (సెప్టెంబర్ 4) ప్రైమ్ వీడియో తన సోషల్ మీడియా ద్వారా అధికారికంగా అనౌన్స్ చేసింది. దీంతో సూపర్ స్టార్ రజనీకాంత్ ఫ్యాన్స్ పండగ చేసుకుంటున్నారు.

ఓటీటీలోకి కూలీ

సూపర్ స్టార్ రజనీకాంత్ నటించిన కూలీ (Coolie) ఆగస్టు 14న థియేటర్లలో రిలీజైన విషయం తెలిసిందే. ఆ లెక్కన నెల రోజుల్లోపే ఓటీటీలోకి రాబోతోంది. అమెజాన్ ప్రైమ్ వీడియో సోషల్ మీడియాలో డిజిటల్ ప్రీమియర్ అనౌన్స్‌మెంట్ చేసింది. “దేవా, సైమన్, దహా సాగాతో ఉత్సాహంగా ఉండటానికి సిద్ధంగా ఉండండి. కూలీ సెప్టెంబర్ 11 నుంచి ప్రైమ్ వీడియోలో” అనే క్యాప్షన్ తో ఇటు ఎక్స్, అటు ఇన్‌స్టాగ్రామ్ లో ఆ ఓటీటీ అనౌన్స్ చేసింది.

కూలీ మూవీ ఎలా ఉందంటే?

రజనీకాంత్, లోకేష్ కనగరాజ్ కాంబినేషన్ లో భారీ అంచనాల మధ్య రిలీజైన యాక్షన్ థ్రిల్లర్ మూవీ కూలీ. ఈ మూవీలో లీడ్ రోల్స్ లో రజనీకాంత్ తోపాటు నాగార్జున, ఉపేంద్ర, శృతి హాసన్, సౌబిన్ షాహిర్, సత్యరాజ్ లాంటి వాళ్లు నటించారు. ఆమిర్ ఖాన్ అతిథి పాత్రలో కనిపించాడు. అనిరుధ్ రవిచందర్ మ్యూజిక్ అందించాడు.

ఇందులో సైమన్ అనే విలన్ పాత్రలో నాగార్జున నటించడం విశేషం. భారీ అంచనాల మధ్య రిలీజైనా.. ఇది కూడా రెగ్యులర్ కమర్షియల్ యాక్షన్ రివేంజ్ థ్రిల్లర్ లానే ఉంది. కేవలం రజనీకాంత్ తప్ప ఇందులో కొత్తగా ఏమీ లేదని మొదటి షో నుంచే రివ్యూలు వచ్చాయి.

కూలీ బాక్సాఫీస్ కలెక్షన్లు

దీంతో తొలి రోజే భారీ వసూళ్లు సాధించిన ఈ సినిమా తర్వాతి రోజుల్లో పడిపోయింది. మొత్తంగా 21 రోజుల్లో ప్రపంచవ్యాప్తంగా రూ.510 కోట్ల గ్రాస్ వసూలు చేసింది. ఇండియాలో నెట్ వసూళ్లు రూ.282 కోట్లుగా ఉన్నాయి. ఈ మూవీ తమిళంలో రూ.181 కోట్లు, తెలుగులో రూ.61 కోట్లు, హిందీలో రూ.36 కోట్లు వసూలు చేసింది.

అయితే రజనీకాంత్ కెరీర్లో మరో రూ.500 కోట్ల సినిమాగా మాత్రం నిలిచింది. మరి సెప్టెంబర్ 11 నుంచి ప్రైమ్ వీడియోలోకి అడుగుపెడుతున్న ఈ సినిమాకు ఓటీటీలో ఎలాంటి రెస్పాన్స్ వస్తుందో చూడాలి.