లేహ్‌లో బుధవారం జరిగిన హింసాత్మక నిరసనల తర్వాత, సరిగ్గా రెండు రోజులకు ప్రముఖ పర్యావరణవేత్త సోనమ్ వాంగ్‌చుక్‌ను లద్దాఖ్ పోలీసులు శుక్రవారం అరెస్ట్ చేశారు. లడఖ్‌ను రాజ్యాంగంలోని ఆరో షెడ్యూల్‌లో చేర్చాలని, ప్రత్యేక రాష్ట్ర హోదా ఇవ్వాలని డిమాండ్ చేస్తూ ఈ నిరసనలు జరుగుతున్నాయి.

ప్రెస్ కాన్ఫరెన్స్‌కు ముందే అరెస్ట్

శుక్రవారం మధ్యాహ్నం 2:30 గంటలకు వాంగ్‌చుక్‌ ఒక ప్రెస్ కాన్ఫరెన్స్ నిర్వహించాల్సి ఉంది. అయితే, మీడియాతో మాట్లాడడానికి ముందే పోలీసులు ఆయనను అదుపులోకి తీసుకున్నారు. లద్దాఖ్‌కు సంపూర్ణ రాష్ట్ర హోదా, అలాగే గిరిజన హక్కులను పరిరక్షించేందుకు ఆరో షెడ్యూల్ కింద గుర్తింపు ఇవ్వాలని డిమాండ్ చేస్తూ ఈ పర్యావరణవేత్త, వినూత్న విద్యావేత్త గత కొంతకాలంగా నిరసనలకు నాయకత్వం వహిస్తున్నారు.

హింసకు కారణం ఎవరు?

బుధవారం నాటి నిరసనలు ఒక్కసారిగా హింసాత్మకంగా మారాయి. ఈ ఘర్షణల్లో నలుగురు వ్యక్తులు మరణించారని, అనేక మంది గాయపడ్డారని నివేదికలు తెలియజేస్తున్నాయి. అయితే, మరణాల సంఖ్యపై భిన్నమైన సమాచారం ఉంది. లద్దాఖ్ డీజీపీ ఎస్.డి. సింగ్ జమ్వాల్ నేతృత్వంలోని పోలీసు బృందం సోనమ్ వాంగ్‌చుక్‌ను అరెస్ట్ చేసింది. లేహ్‌లో ఇంటర్నెట్ సేవలను కూడా నిలిపివేశారు.

FCRA లైసెన్స్ రద్దు

లేహ్‌లో జరిగిన హింసాత్మక ఘటనలకు సోనమ్ వాంగ్‌చుక్‌ రెచ్చగొట్టే ప్రకటనలే కారణమని కేంద్ర హోం మంత్రిత్వ శాఖ (MHA) ఆరోపించింది. ఈ మేరకు ఒక ప్రకటన విడుదల చేసింది.

అంతేకాకుండా, హోం మంత్రిత్వ శాఖ గురువారం కీలక నిర్ణయం తీసుకుంది. వాంగ్‌చుక్ నేతృత్వంలోని ఎన్‌జీఓ ‘స్టూడెంట్స్ ఎడ్యుకేషనల్ అండ్ కల్చరల్ మూవ్‌మెంట్ ఆఫ్ లడఖ్’ (SECMOL) యొక్క FCRA (విదేశీ విరాళాల నియంత్రణ చట్టం) లైసెన్స్‌ను రద్దు చేసింది. దీనికి గల కారణాన్ని వివరిస్తూ, ‘ఆర్థికపరమైన అవకతవకలు’ జరిగాయని కేంద్రం పేర్కొంది. వాంగ్‌చుక్‌పై ఏయే ఆరోపణలతో కేసులు నమోదు చేశారనే వివరాలు మాత్రం తక్షణమే స్పష్టం కాలేదు.