ప్రముఖ నటి, టాక్ షో హోస్ట్ సిమీ గరేవాల్ గురువారం (అక్టోబర్ 2) సోషల్ మీడియాలో చేసిన అసాధారణ దసరా పోస్ట్‌ అభిమానులను షాక్‌కు గురి చేస్తోంది. ఆమె దసరా విషెస్ కాస్త భిన్నంగా ఉన్నాయి. రావణుడు రాక్షసుడు కాదని, కేవలం నాటీ అని ఆమె అనడం విశేషం. రావణుడిని ప్రశంసిస్తూ ఆమె చేసిన పోస్ట్ వైరల్ అవుతోంది.

రావణుడిని ప్రశంసిస్తూ సిమీ సుదీర్ఘ పోస్ట్

తన పోస్ట్‌లో భారత పురాణాలలో రావణుడిపై ఉన్న సుదీర్ఘ ద్వేషాన్ని సిమీ గరేవాల్ ప్రశ్నించారు. “ప్రియమైన రావణా.. ప్రతి సంవత్సరం ఈ రోజున మేము చెడుపై మంచి సాధించిన విజయాన్ని జరుపుకుంటాము.. కానీ టెక్నికల్‌గా మీ ప్రవర్తనను ‘చెడు’ నుండి ‘కొంచెం అల్లరి’గా తిరిగి మార్చాలి. ఎందుకంటే అసలు నువ్వు ఏం చేశావు?”

“నువ్వు తొందరపాటులో ఒక మహిళను కిడ్నాప్ చేశావు. కానీ ఆ తర్వాత ఈ రోజుల్లో మనం మహిళలకు ఇచ్చే గౌరవం కంటే ఆమెకు ఎక్కువ గౌరవాన్ని ఇచ్చావు. ఆమెకు మంచి ఆహారం, ఆశ్రయం, మహిళా సెక్యూరిటీ గార్డులను (అయితే వారు అంత అందంగా లేరు) కూడా అందించావు. పెళ్లి చేసుకోవాలన్న మీ అభ్యర్థన కూడా వినయంతో నిండి ఉంది. అంతేకాదు ఆమె తిరస్కరించినప్పుడు ఎప్పుడూ యాసిడ్ పోయలేదు. చివరికి శ్రీరాముడు మిమ్మల్ని చంపినప్పుడు కూడా.. మీరు క్షమాపణ కోరారు” అని ఆమె అనడం విశేషం.

ఆమె రావణుడి విద్య స్థాయిని భారత రాజకీయ నాయకులతో పోల్చుతూ ఇలా చెప్పింది. “నా నమ్మకం ప్రకారం నువ్వు మా పార్లమెంట్‌లోని సగం మంది కంటే ఎక్కువ చదువుకున్నవాడివి. నన్ను నమ్ము.. నిన్ను తగలబెట్టడానికి నిజంగా మాకు అంత కఠినమైన భావాలేమీ లేవు.. కానీ ఇది ఇప్పుడు ట్రెండ్ అంతే. హ్యాపీ దసరా” అని సిమీ పోస్ట్ చేసింది.

విజయదశమి తొమ్మిది రోజుల నవరాత్రి ఉత్సవం ముగింపును సూచిస్తుంది. ఇది రాముడి చేతిలో రావణుడి ఓటమిని గుర్తుచేస్తుంది. మంచిపై చెడు శాశ్వతంగా విజయం సాధించిన సందర్భంగా ఈ దసరా ఉత్సవాలు జరుపుకుంటారు. దేశం అంతటా ఈ రోజున రావణుడి దిష్టిబొమ్మలను దహనం చేయడం, రామలీలా నాటకాలు చేస్తారు.

సిమీ గరేవాల్ కెరీర్

సిమీ ఒక ఇండియన్ నటి, టెలివిజన్ హోస్ట్, ఫిల్మ్‌మేకర్. ఆమె 1960, 70లలో ‘దో బదన్’, ‘మేరా నామ్ జోకర్’, ‘కర్జ్’ వంటి చిత్రాలలో చిరస్మరణీయమైన పాత్రలతో ప్రసిద్ధి చెందింది. ఆ తర్వాత ‘రెండెవూ విత్ సిమీ గరేవాల్’ అనే టాక్ షో ద్వారా మరోసారి ప్రేక్షకులను ఆకర్షించింది. ఈ షోలో ఆమె సున్నితమైన ఇంటర్వ్యూయింగ్ శైలి బాగా ఆకట్టుకుంది.