2022 కాంతారా చిత్రానికి ప్రీక్వెల్‌గా వచ్చిన కాంతార చాప్టర్ 1 సినిమా బాక్స్ ఆఫీస్ వద్ద తన కలెక్షన్ల పరుగును కొనసాగిస్తోంది. ఈ శాండల్‌వుడ్ చిత్రం ప్రపంచవ్యాప్తంగా బాక్సాఫీస్ ను షేక్ చేస్తోంది. పాన్ ఇండియా భాషల్లో రిలీజైన ఈ మూవీ కలెక్షన్లలో దూసుకెళ్తోంది. ప్రపంచవ్యాప్తంగా రూ.350 కోట్లు, ఇండియాలో రూ.250 కోట్లు దాటింది.

కాంతార చాప్టర్ 1 కలెక్షన్లు

ఇండస్ట్రీ ట్రాకర్ సక్నిల్క్ ప్రకారం కాంతార చాప్టర్ 1 ఇండియాలో అయిదు రోజుల్లో రూ.256.5 కోట్ల నెట్ కలెక్షన్లు సొంతం చేసుకుంది. రిషబ్ శెట్టి స్వీయ దర్శకత్వంలో హీరోగా యాక్ట్ చేసిన ఈ సినిమా బాక్సాఫీస్ దగ్గర నిలకడ ప్రదర్శిస్తోంది. సోమవారం (అక్టోబర్ 6) ఈ మూవీ ఇండియాలో రూ.31.25 కోట్ల నెట్ వసూళ్లు రాబట్టింది.

హిందీలో ఎక్కువ

కాంతార చాప్టర్ 1 మూవీకి హిందీలో ఎక్కువ కలెక్షన్లు వస్తున్నాయి. అయిదు రోజుల్లో హిందీలో ఈ సినిమా రూ.82.25 కోట్లు ఖాతాలో వేసుకుంది. ఆ తర్వాత కన్నడలో రూ.75.85 కోట్లు సొంతం చేసుకుంది. తెలుగులోనూ మంచి ఆదరణ లభిస్తోంది. ఇక్కడ రూ.52.75 కోట్లు, తమిళంలో రూ.24.75 కోట్లు, మలయాళంలో రూ.20.9 కోట్లు దక్కించుకుంది.

ప్రపంచవ్యాప్తంగా

కాంతార చాప్టర్ 1 సినిమా ప్రపంచవ్యాప్తంగా అయిదు రోజుల్లో రూ.362.75 కోట్ల కలెక్షన్లు రాబట్టింది. ఇందులో ఇండియా గ్రాస్ రూ.307 కోట్లు కాగా, ఓవర్సీస్ వాటా రూ.55.75 కోట్లు. వీక్ డేస్ లో కూడా కాంతార చాప్టర్ 1 జోరు కొనసాగిస్తోంది. ఇప్పటికే అత్యధిక వసూళ్లు సాధించిన మూడో కన్నడ సినిమాగా నిలిచిన కాంతార 2 మరికొన్ని రికార్డులు బ్రేక్ చేసే అవకాశముంది.

కాంతార చాప్టర్ 1 సినిమాకు అన్ని వర్గాల నుంచి పాజిటివ్ టాక్ వస్తోంది. ఇది సినిమా రన్ ను మరించ పెంచే అవకాశముంది. రిషబ్ శెట్టి రచన, దర్శకత్వం వహించిన ఈ చిత్రం బడ్జెట్ రూ. 125 కోట్లు.

దసరా రిలీజ్

దసరా సందర్భంగా అక్టోబర్ 2న విడుదలైన ఈ చిత్రం ప్రారంభ రోజున రూ. 61.85 కోట్ల నికర వసూళ్లు చేసింది. 169 నిమిషాల నిడివితో విడుదలైన ఈ చిత్రం కన్నడ బాక్సాఫీస్ వద్ద ఉదయం 41.91% ఆక్యుపెన్సీతో రికార్డు సృష్టించింది. హిందీ, తెలుగు, తమిళ, మలయాళ షోలకు కూడా భారీ సంఖ్యలో ప్రేక్షకులు వచ్చారు.

అద్భుతమైన ప్రదర్శన

చిత్ర విశ్లేషకుడు తరణ్ ఆదర్శ్ ఎక్స్ లో కాంతారా చాప్టర్ 1 అక్టోబర్ 3, 4 తేదీల్లో అద్భుతమైన ప్రదర్శన కనబరిచినట్లు పోస్ట్ చేశారు. ఆ పోస్ట్‌లో “కాంతార చాప్టర్ 1 తన ఫస్ట్ వీకెండ్ లో అద్భుతమైన వసూళ్లు సాధించింది. సెలవు తర్వాత పనిదినమైన శుక్రవారం మినహా మిగిలిన మూడు రోజులు గురువారం, శనివారం, ఆదివారం సూపర్ వృద్ధిని చూశాయి. ఇప్పుడు అందరి దృష్టి సోమవారంపై ఉంది.” అని పేర్కొన్నారు.