గుండె నిండా గుడి గంటలు ఈరోజు అంటే 526వ ఎపిసోడ్ ఆసక్తికరంగా సాగింది. మీనా ఆత్మహత్య చేసుకుందన్న భయం నుంచి ఆమె తిరిగి ఇంటికి క్షేమంగా రావడం వరకు ఎంతో ఉత్కంఠగా సాగింది. బాలు ఆమెను చూసి కొట్టబోయి హత్తుకోవడం ఈ ఎపిసోడ్ లో హైలైట్ అని చెప్పొచ్చు.

గదిలో మీనా సూసైడ్ లెటర్..

గుండె నిండా గుడి గంటలు సీరియల్ మంగళవారం (అక్టోబర్ 7) ఎపిసోడ్ గదిలో మీనా ఏదైనా లెటర్ వదిలి వెళ్లిందేమో అని ప్రభావతి, శృతి, రోహిణి, కామాక్షి వెతికే సీన్ తో మొదలవుతుంది. ఇంతలో ఓ లెటర్ దొరకడం, అందులో తన అత్త వల్లే తాను ఆత్మహత్య చేసుకుంటున్నానని, ఆమె ఓ గయ్యాలి అత్త అని మీనా రాసి ఉండటం, అది విని ప్రభావతి పోలీస్ స్టేషన్ లో సీన్ ఊహించుకోవడం, అక్కడ తనకు ఉరిశిక్ష వేసినట్లుగా ఊహించి భయపడుతుంది. ఇంతలో కామాక్షి ఆమెను తట్టిలేపి అప్పుడే ఉరికంబం వరకూ వెళ్లిపోయావా అని అడుగుతుంది. తీరా ఆ లెటర్ తాను రాసిన కూరగాయల లిస్ట్ అని ప్రభావతి తెలుసుకుంటుంది.

కంటతడి పెట్టిన బాలు.. సర్ది చెప్పిన ఫ్రెండ్

అటు మీనా కనిపించకపోవడంతో బాలు కంటతడి పెడతాడు. ఆమె ఎప్పుడూ ఇలా చేయలేదని, ఇప్పుడు ఇంటి నుంచి వెళ్లిపోవడంతో ఏదోలా ఉందని ఫ్రెండ్ తో అంటాడు. చిన్నప్పటి నుంచీ ఎప్పుడూ భయపడలేదని, కానీ మీనా కనిపించకపోవడంతో ఇప్పుడు భయమేస్తుందని చెబుతాడు. దీంతో అతని ఫ్రెండ్ సర్ది చెబుతాడు. మీనా ఎక్కడికీ వెళ్లలేదని, తిరిగి వస్తుందని ధైర్యం చెబుతాడు. తెలిసిన చోట్లలో వెతుకుదామని అతన్ని తీసుకెళ్తాడు.

గుణ దగ్గరికి శివ.. రెచ్చగొట్టి పంపిన గుణ

అటు తన అక్క కనిపించడం లేదని గుణ దగ్గరికి వెళ్లి చెబుతాడు శివ. దీంతో ఛాన్స్ దొరికిందని గుణ అతన్ని రెచ్చగొడతాడు. మీ బావే ఆమెను ఏదైనా చేసి ఉంటాడని, ఈ మధ్య గొడవల్లో భార్యలను భర్తలు చంపేస్తున్నారని గుణ ఏదేదో చెబుతాడు. దీంతో శివ మరింత కంగారు పడతాడు.

అలాంటిదేమీ జరిగి ఉండదని, అయితే వెంటనే వెళ్లి పోలీస్ స్టేషన్లో ఫిర్యాదు చేయమని శివకు గుణ చెబుతాడు. దీంతో సరే అని అతడు వెళ్లిపోతాడు. వాళ్ల వల్ల తాను జైలుకు వెళ్లానని, మీనా కేసులో బాలుని జైలుకు పంపడమే తన లక్ష్యమని అతడు వెళ్లిపోయిన తర్వాత పక్కనున్న వ్యక్తితో అంటాడు గుణ.

పోలీస్ స్టేషన్‌లో శివ, బాలు గొడవ

అటు పోలీస్ స్టేషన్ కు వెళ్లిన శివ తన అక్క కనిపించడం లేదని, ఆమె భర్తే ఏదో చేసి ఉంటాడని, అతనికి తాగుడు అలవాటు ఉందని, వెంటనే అరెస్ట్ చేయాలని ఫిర్యాదు చేస్తాడు. మరోవైపు తండ్రి సత్యం ఫోన్ చేసి చెప్పడంతో అప్పుడే బాలు కూడా తన ఫ్రెండ్ తో కలిసి పోలీస్ స్టేషన్ కు వస్తాడు. పోలీసుల ముందే ఇద్దరూ గొడవ పడతారు.

శివను బాలు మరోసారి కొట్టబోతాడు. ఎస్సై వారించడంతో ఊరుకుంటాడు. గతంలో తాను ఓసారి అతన్ని కొట్టానని, అది మనసులో పెట్టుకునే ఇలా చేస్తున్నాడని బాలు అనడంతో అది అర్థమవుతూనే ఉందని ఎస్సై అంటాడు. అయినా ఆమె కనిపించకుండాపోయి 24 గంటలు కాలేదని, ఆ తర్వాతే కేసు నమోదు చేస్తామని శివ, బాలును ఎస్సై పంపించేస్తాడు. బయటకు వచ్చిన తర్వాత కూడా బాలు, శివ గొడవ పడతారు.

ఇంటికి వచ్చేసిన మీనా.. హత్తుకున్న బాలు

ఇటు బాధగా బాలు ఇంటికి తిరిగి వస్తాడు. అయితే అప్పటికే మీనా ఇంటికి వచ్చేసిందని సత్యం చెబుతాడు. ఆమెను చూడగానే మొదట ఆవేశంతో బాలు కొట్టబోతాడు. ఆ తర్వాత ఆమెను దగ్గరికి తీసుకొని హత్తుకుంటాడు. అసలు ఎక్కడికి వెళ్లావ్.. ఎందుకు చెప్పకుండా వెళ్లావ్.. అంటూ బాలు, సత్యం, ప్రభావతి సహా అందరూ మీనాను నిలదీస్తారు. ఆమె చెప్పేది వినకుండా ఏవేవో మాటలు అంటారు.

శృతికి చెప్పే వెళ్లానన్న మీనా

దీంతో మీనా అసలు విషయం చెబుతుంది. తాను ఉదయం ఇంట్లో నుంచి వెళ్లే సమయంలో చెప్పే వెళ్లానని శృతిని మీనా చూస్తుంది. శృతి ఫోన్ చూస్తూ ఉండగా మీనా ఆమె గదిలోకి వెళ్తుంది. తనకు ఓ ఫోన్ వచ్చిందని, బయటకు వెళ్తున్నానని, నిజానికి తన భర్తకు ఈ విషయం చెప్పాలనుకున్నా.. ఉదయం కాస్త గొడవ పడ్డామని మీనా అంటుంది.

శృతి ఫోన్ చూస్తూనే వినీ విననట్లుగా సరే అనడంతో మీనా వెళ్లిపోతుంది. అయితే ఆ తర్వాత శృతికి అసలు విషయం గుర్తుకు వస్తుంది. ఆ సమయంలో తాను బ్లూటూత్ పెట్టుకొని ఫోన్ మాట్లాడుతూ సరే అన్నానని, అసలు మీనా ఏం చెప్పిందో వినలేదని అనడంతో అందరూ షాక్ తింటారు. మొత్తానికి మీనా తిరిగి ఇంటికి రావడంతో అందరూ ఊపిరి పీల్చుకుంటారు.

తాను కనిపించకపోతే కంటతడి పెట్టారట అంటూ బాలుతో మీనా సరదాగా అంటుంది. పోలీసులు ఏమన్నారని అడుగుతుంది. అక్కడ శివతో జరిగిన గొడవ గురించి బాలు చెబుతాడు. అతన్ని ఎవరో రెచ్చగొట్టి పంపించారని అనడంతో గుణపైనే మీనాకు అనుమానం వస్తుంది. దీంతో ఆ ఇద్దరి పని పట్టాలని అనుకుంటుంది. అక్కడితో గుండె నిండా గుడి గంటలు ఈరోజు ఎపిసోడ్ ముగుస్తుంది.