‘కాంతార ఛాప్టర్ 1’ విజయంతో నటుడు, దర్శకుడు రిషబ్ శెట్టి ఉప్పొంగిపోతున్నాడు. 2022లో విడుదలైన కాంతార మూవీకి ప్రీక్వెల్‌గా వచ్చిన ఈ సినిమాలో అతడు నటించడమే కాకుండా దీనికి కథ అందించి, దర్శకత్వం వహించాడు. ఈ సినిమా దేశవ్యాప్తంగా, అలాగే విదేశాల్లో కూడా రికార్డులు బద్దలు కొడుతున్న నేపథ్యంలో.. శుక్రవారం (అక్టోబర్ 10) ఉదయం రిషబ్ ముంబైలోని సిద్ధివినాయక ఆలయాన్ని సందర్శించి, ఆశీస్సులు తీసుకున్నాడు.

సిద్ధివినాయక ఆలయంలో రిషబ్ శెట్టి

శుక్రవారం ఉదయం రిషబ్ శెట్టి ఆలయ ప్రాంగణం నుండి బయటకు వస్తున్నప్పుడు.. అతని చుట్టూ భద్రతా సిబ్బంది ఉన్నారు. కాళ్లకు చెప్పులు లేకుండా కనిపించాడు. తెల్లటి షర్టు, తెల్లటి పంచె ధరించిన రిషబ్.. అభిమానులు అభివాదం చేస్తుంటే నవ్వుతూ కనిపించాడు. అతడు కొన్ని సెకన్ల పాటు ఫోటోలకు పోజు ఇచ్చి తర్వాత కారులోకి ఎక్కాడు.

అటు ‘కాంతార ఛాప్టర్ 1‘ మేకర్స్ ఈ సినిమా విడుదలైన మొదటి వారంలో ప్రపంచవ్యాప్తంగా రూ.500 కోట్ల మార్కును అధికారికంగా దాటిందని ప్రకటించారు. “దైవిక సినీ తుఫాను బాక్స్ ఆఫీస్ వద్ద మరింత పైకి ఎగురుతోంది. ‘కాంతార ఛాప్టర్ 1’ మొదటి వారంలో ప్రపంచవ్యాప్తంగా రూ.509.25 కోట్ల గ్రాస్ వసూలు చేసింది. బ్లాక్‌బస్టర్ కాంతార మీ సమీపంలోని థియేటర్లలో విజయవంతంగా నడుస్తోంది” అని మేకర్స్ తెలిపారు.

‘కాంతార ఛాప్టర్ 1’ గురించి..

2022లో రిలీజైన కాంతార సినిమాకు ప్రీక్వెల్ అయిన ‘కాంతార ఛాప్టర్ 1’ కథ, మొదటి సినిమా సంఘటనలకు వెయ్యి సంవత్సరాల ముందు జరుగుతుంది. ఈ సినిమాలో రుక్మిణి వసంత్, జయరామ్, గుల్షన్ దేవయ్య కూడా నటించారు. ఈ సినిమా బెర్మె (రిషబ్) అనే గిరిజన యువకుడి కథను చూపిస్తుంది. అతను కాంతార ప్రజల స్వయంప్రతిపత్తి కోసం ప్రయత్నిస్తాడు.

పొరుగు రాజ్యం నుండి వచ్చిన రాజకుమారుడు కులశేఖర (గుల్షన్) ఆ భూమిని, దాని ప్రజలను తన నియంత్రణలోకి తీసుకోవాలని కోరుకోవడంతో.. బెర్మె పోరాడవలసి వస్తుంది. ఈ సినిమా విడుదలైన తర్వాత రిషబ్ నటన, విజువల్ ఎఫెక్ట్స్‌కు ప్రత్యేక ప్రశంసలు దక్కాయి. ఈ సినిమాకు ‘కాంతార ఛాప్టర్ 2’ అనే మూడవ భాగం కూడా ఉంటుందని ప్రకటించారు.