Salaar 5 Days Box Office Collections: ఐదో రోజు తగ్గిన సలార్ వసూళ్లు.. అయినా డంకీ కంటే రెట్టింపే

Salaar 5 Days Box Office Collections: ప్రభాస్ నటించిన సలార్ మూవీ తొలి మంగళవారం (డిసెంబర్ 26) పరీక్షను పాసైందనే చెప్పాలి. తొలి నాలుగు రోజులతో పోలిస్తే ఐదో రోజు వసూళ్లు తగ్గినా.. షారుక్ ఖాన్ డంకీతో పోలిస్తే భారీ వసూళ్లే సాధించింది. ఐదో రోజు ప్రభాస్ మూవీ ఇండియాలో అన్ని భాషల్లో కలిపి రూ.25.13 కోట్లు వసూలు చేసినట్లు sacnilk.com వెల్లడించింది.

దీంతో తొలి ఐదు రోజుల్లో ఇండియాలో సలార్ సాధించిన వసూళ్లు రూ.280 కోట్లకు చేరాయి. ఐదో రోజు సాధించిన రూ.25 కోట్ల వసూళ్లలో సగానికి పైగా తెలుగులోనే రావడం విశేషం. తెలుగు రాష్ట్రాల్లో మంగళవారం సలార్ మూవీ రూ.13.19 కోట్లు వసూలు చేసింది. హిందీలో రూ.9.7 కోట్లు, తమిళంలో రూ.1.2 కోట్లు, మలయాళంలో రూ.0.72 కోట్లు, కన్నడలో రూ.0.32 కోట్లు రాబట్టింది.

ఇక ప్రపంచవ్యాప్తంగా చూసుకుంటే రూ.450 కోట్ల మార్క్ దాటి రూ.500 కోట్లకు చేరవవుతోంది. ఆరు లేదా ఏడో రోజుల్లో ఈ మార్క్ అందుకునే అవకాశాలు ఉన్నాయి. డంకీలాంటి మూవీ నుంచి హిందీ బెల్ట్ లో గట్టి పోటీ ఉన్నా కూడా సలార్ సత్తా చాటుతూనే ఉంది. డంకీ మంగళవారం (డిసెంబర్ 26) ఇండియాలో కేవలం రూ.10 కోట్లు వసూలు చేయగా.. సలార్ మాత్రం రూ.25 కోట్లు రాబట్టడం విశేషమే.

సలార్ కు తొలి రోజు నుంచే పాజిటివ్ టాక్ రావడం, అంతకుముందు రోజే రిలీజైన డంకీపై ప్రేక్షకులు పెదవి విరవడంతో కలెక్షన్లలో ప్రభాసే పైచేయి సాధించాడు. డంకీ మూవీ తొలి రోజులు కలిపి ఇండియాలో కేవలం రూ.140 కోట్లు మాత్రమే వసూలు చేసింది. సలార్ మాత్రం ఐదు రోజుల్లోనే అంతకు రెట్టింపు అంటే రూ.280 కోట్లు వసూలు చేస్తూ దూసుకెళ్తోంది.

2023లో హ్యాట్రిక్ రూ.1000 కోట్ల సినిమాలు అందిస్తాడనుకున్న షారుక్ కు తీవ్ర నిరాశే ఎదురైంది. హిందీ బెల్ట్ లోనూ చాలా చోట్ల థియేటర్లలో డంకీని తీసేసి సలార్ షోలు వేస్తున్నారు. దీంతో క్రమంగా డంకీ తెరమరుగవుతుండగా.. సలార్ స్పష్టమైన ఆధిపత్యం చెలాయిస్తోంది.