DA Hike news : కేంద్ర ప్రభుత్వ ఉద్యోగుల డీఏ పెంపుపై త్వరలోనే గుడ్​ న్యూస్​! ఈసారి ఎంత పెరగొచ్చు?

డీఏ పెంపు (డియర్​నెస్​ అలొవెన్స్​) వార్త కోసం ఎదురుచూస్తున్న కేంద్ర ప్రభుత్వ ఉద్యోగులు, పింఛనుదారులకు త్వరలోనే ఓ గుడ్​ న్యూస్​ అందే సూచనలు కనిపిస్తున్నాయి! 7వ పే కమిషన్​ ఆధారంగా ఉండే డీఏ, డీఆర్​ (డియర్​నెస్​ రిలీఫ్​) పెంపుపై కేంద్రం త్వరలోనే ఓ ప్రకటన విడుదల చేయనుందని సమాచారం.

ప్రభుత్వ ఉద్యోగుల డీఏని ప్రతియేటా రెండుసార్లు (జనవరి, జులై) సవరిస్తుంది కేంద్రం. అనంతర నెలల్లో వీటిపై ప్రకటనలు వెలువడతాయి. పండుగ సీజన్​ కూడా సమీపిస్తుండటంతో ఈ ఏడాది రెండో డీఏ పెంపుపై త్వరలోనే, ఇంకా చెప్పాలంటే సెప్టెంబర్​ నెలలోనే ఓ ప్రకటన వస్తుందని అంచనాలు ఉన్నాయి. డీఏ పెంపు ప్రకటన ఎప్పుడు వచ్చినా, దాని అమలు మాత్రం 2024 జులై నుంచే ఉంటుంది. ఫలితంగా 7వ పే కమిషన్​ సిఫార్సుల ఆధారంగా ఉండే డీఏ పెంపుతో లక్షలాది మంది ప్రభుత్వ ఉద్యోగులు, పింఛనుదారులకు లబ్ధిచేకూరనుంది.

ఈ ఏడాది 2024 మార్చ్​లో డీఏ పెంపు జరిగింది. ఇది జనవరి 1 నుంచి అమల్లోకి వచ్చింది. ఆయా నెలలకు ఏరియర్స్​ పడతాయి.

ఇదీ చూడండి:- Goverment employees salary : ప్రభుత్వ ఉద్యోగులకు షాక్​! 13లక్షల మంది జీతాలు ఆపేస్తామంటూ..

ఈసారి ప్రభుత్వ ఉద్యోగుల డీఏ ఎంత పెరుగుతుంది?

ప్రముఖ వార్తా సంస్థ ఎకనామిక్​ టైమ్స్​ ప్రకారం.. కార్మికశాఖలోని లేబర్​ బ్యూరో ప్రతి నెల ప్రచురించే సీపీఐ (కన్జ్యూమర్​ ప్రైజ్​ ఇండెక్స్​) ఆధారంగా డీఏని లెక్కిస్తారు. ఇక తాజా సీబీఐ డేటా ప్రకారం బేసిక్​ పేలో డీఏ 53.35శాతంగా ఉండే అవకాశం ఉంది. అంటే ఈసారి కేంద్ర ప్రభుత్వ ఉద్యోగులకు కనీసం 53శాతం వరకు డీఏ పెంపు ఉంటుంది. ప్రస్తుతం 7వ పే కమిషన్​ ఆధారంగా ప్రభుత్వ ఉద్యోగుల డీఏ 50శాతంగా ఉంది. అంటే, రానున్న డీఏ పెంపు 3శాతంగా ఉండే అవకాశం ఉంది.

కేంద్ర ప్రభుత్వ ఉద్యోగులకు డీఏ పెంచితే అది టేక్​-హోమ్​ శాలరీలోకి వెళుతుంది. ఉదాహరణకు.. నెలకు రూ. 55,200 బేసిక్​ శాలరీ అందుకుంటున్న ప్రభుత్వ ఉద్యోగి డీఏ (50శాతం) రూ. 27,600గా ఉంటుంది. దీని మీద 3శాతం పెరిగడం అంటే.. అది రూ. 1,656 అవుతుంది. తద్వారా జీతం కూడా పెరుగుతుంది.

ప్రభుత్వ ఉద్యోగుల డీఏ మాత్రమే కాదు, పింఛనుదారుల డీఆర్​ కూడా 3శాతం పెరిగే అవకాశం ఉందని సమాచారం.

గతేడాది రెండోసారి డీఏ పెంపును అక్టోబర్​ 18న కేంద్రం ప్రకటించింది. అది 2023 జులై 1 నుంచి అమల్లోకి వచ్చింది. ఈసారి త్వరలోనే ప్రభుత్వ ఉద్యోగులకు డీఏ పెంపు వార్త అందుతుందని వార్తలు వినిపిస్తున్నాయి. దీని కోసం ఉద్యోగులు ఎదురుచూస్తున్నారు.