ఆహా వీడియో ఓటీటీలోకి ఇప్పుడో తమిళ ఆంథాలజీ సిరీస్ తెలుగులో స్ట్రీమింగ్ కు వచ్చింది. కేవలం నాలుగు ఎపిసోడ్ల ఈ సిరీస్ గతేడాది తమిళంలో రాగా.. ఇప్పుడు తెలుగులోకి డబ్ అయింది. నాలుగు వేర్వేరు కథల సమాహారమే ఈ సిరీస్. ఇందులో సెక్స్ ఎడ్యుకేషన్ చెప్పే లేడీ టీచర్ ఎపిసోడ్ కు సంబంధించిన చిన్న టీజర్ ను ఆహా ఓటీటీ షేర్ చేసింది.

ఆహా ఓటీటీలోకి తమిళ బోల్డ్ సిరీస్

ఆహా వీడియో ఓటీటీలోకి తాజాగా స్ట్రీమింగ్ కు వచ్చిన బోల్డ్ ఆంథాలజీ సిరీస్ పేరు ష్ (Sshhh). ఇది గతేడాదే తమిళంలో స్ట్రీమింగ్ అయింది. ఇప్పుడు తెలుగులోకి వచ్చింది. నాలుగు ఎపిసోడ్లు కలిపి రెండు గంటల్లో ముగిసిపోయే సిరీస్ ఇది. ఒక్కో ఎపిసోడ్లో ఒక్కో స్టోరీ గురించి చూపిస్తారు. ఇందులో భాగంగా ఆహా వీడియో తొలి ఎపిసోడ్ టీజర్ ను రిలీజ్ చేసింది.

ఇందులో ఓ సాంప్రదాయ బ్రాహ్మణ కుటుంబానికి చెందిన అమ్మాయికి ఓ స్కూల్లో సెక్స్ ఎడ్యుకేషన్ చెప్పాల్సిన ఇబ్బందికర పరిస్థితి వస్తుంది. అయితే పిల్లలకు అన్ని సబ్జెక్టులతోపాటు సెక్స్ ఎడ్యుకేషన్ కూడా ఎంత ముఖ్యమన్నది దీనిద్వారా చెప్పే ప్రయత్నం మేకర్స్ చేశారు. సెక్స్ ఎడ్యుకేషన్ ఆప్షనల్ కాదు.. తప్పనిసరి అని సందేశం ఇచ్చే ఎపిసోడ్ ఇది.

మరో మూడు ఎపిసోడ్లు..

ఈ ష్ ఆంథాలజీ సిరీస్ లోనే మరో మూడు ఎపిసోడ్లు ఉన్నాయి. రెండో ఎపిసోడ్లో ఇద్దరు ఎక్స్ లవర్స్ చుట్టూ తిరిగే స్టోరీని చూపించారు. తనకు ఇష్టం లేని పెళ్లి చేసుకొని భర్తతో ఇష్టం లేని కాపురం చేస్తూ.. పడక గది సుఖానికి దూరమైన అమ్మాయి.. తన మాజీ లవర్ ను కలిసినప్పుడు ఎలా రియాక్ట్ అవుతుందన్నది ఇందులో చూడొచ్చు.

ఇక మూడో ఎపిసోడ్ 38 ఏళ్ల మహిళ చుట్టూ తిరిగే కథ. ఓ ఆర్మీ అధికారిని ఆమె పెళ్లి చేసుకుంటుంది. పెళ్లయిన కొద్ది రోజులకే ఓ ఆపరేషన్ కోసం వెళ్లి ఆ అధికారి కనిపించకుండా పోతాడు. ఎన్నో రోజుల పాటు అతడు తిరిగి వస్తాడని ఆమె ఎదురు చూస్తుంది. ఆ తర్వాత తన పాత ఫేస్‌బుక్ ఫ్రెండ్ తో మళ్లీ చనువు పెరుగుతుంది. వాళ్లు కలుద్దామనుకునే సమయానికి ఓ ఊహించని ట్విస్ట్ ఎదురవుతుంది.

ఇక ఈ ష్ సిరీస్ నాలుగో ఎపిసోడ్ విషయానికి వస్తే.. శక్తివేల్ అనే ఓ 20 ఏళ్ల ఐఏఎస్ ఆస్పిరెంట్ చుట్టూ తిరిగే స్టోరీ. ఓవైపు సివిల్స్ పరీక్షలకు సిద్ధమవుతూనే.. ఓ అమ్మాయి పట్ల విపరీతంగా ఆకర్షితుడవుతాడు. ఆ తర్వాత ఏం జరుగుతుంది? అతడు తన లక్ష్యాన్ని చేరుకుంటాడా లేక తన కోరికలకు బలవుతాడా అన్నది ఇందులో చూడొచ్చు.