కర్ణాటక రాష్ట్రంలో కాంగ్రెస్ ప్రభుత్వం అధికారంలోకి వచ్చి రెండేళ్లు పూర్తి చేసుకున్న సందర్భంగా పీపుల్స్ పల్స్ రీసెర్చ్ సంస్థ, కొడెమో టెక్నాలజీస్ సంయుక్తంగా నిర్వహించిన ‘‘పల్స్ ఆఫ్ ది కర్ణాటక స్టేట్’’ సర్వేలో సిద్దరామయ్య నేతృత్వంలోని కాంగ్రెస్ ప్రభుత్వంపై తీవ్ర ప్రజా వ్యతిరేకత కనిపిస్తుండగా, ప్రధాన ప్రతిపక్ష పార్టీ బీజేపీకి ప్రజాదరణ పెరుగుతోందని వెల్లడైంది. తొలి 24 నెలల్లో కాంగ్రెస్ ప్రభుత్వంపై ఆదరణ తగ్గుతున్న దశలో రానున్న 36 నెలలు కాలం కాంగ్రెస్ ప్రభుత్వానికి మరింత కీలకం కానున్నది.

మొదటి రెండేళ్లలోనే తగ్గిన ఆదరణ

సాధారణంగా ఏ ప్రభుత్వానికైనా మొదటి దశలో ఉన్న ఆదరణ రెండో దశలో తగ్గుతుంటుంది. మొదటి రెండు సంవత్సరాల్లోనే కాంగ్రెస్ ప్రభుత్వం ఆదరణ కోల్పోతూ ఉంటే రానున్న 3 సంవత్సరాల కాలంలో తమ ప్రతిష్టను ఏ విధంగా కాపాడుకుంటుందో అన్నది వేచి చూడాలి.

ఇప్పటికిప్పుడు ఎన్నికలు జరిగితే..

కర్ణాటకలో ఈ రోజు రాష్ట్ర అసెంబ్లీకి ఎన్నికలు జరిగితే బీజేపీ అధికారంలోకి వచ్చే అవకాశాలు మెండుగా ఉన్నాయని పీపుల్స్ పల్స్ రీసెర్చ్ సంస్థ నిర్వహించిన ‘‘పల్స్ ఆఫ్ ది కర్ణాటక స్టేట్’’ సర్వేలో వెల్లడైంది. కర్ణాటకలో 1985 నుండి ఎన్నికల ఫలితాలను పరిశీలిస్తే అధికారంలో ఉన్న ఏ పార్టీ కూడా తదుపరి ఎన్నికల్లో సొంతంగా సంపూర్ణ మెజార్టీ సాధించలేదనే అంశం ఇక్కడ గమనించాల్సిన విషయం. ఇదే ట్రెండ్ ఈ సారి కూడా కొనసాగే అవకాశాలున్నట్లు స్పష్టమౌతోంది.

పీపుల్స్ పల్స్ సర్వే

పీపుల్స్ పల్స్ రీసెర్చ్ సంస్థ, కొడెమో టెక్నాలజీస్ కలిసి రాష్ట్ర వ్యాప్తంగా 10,481 శాంపిల్స్తో 17 ఏప్రిల్ నుండి 18 మే వరకు, నెల రోజులపాటు ‘‘పల్స్ ఆఫ్ ది కర్ణాటక స్టేట్’’ ట్రాకర్ పోల్ నిర్వహించింది. కర్ణాటకలో 224 అసెంబ్లీ స్థానాలుండగా, మెజార్టీకి కావాల్సిన మ్యాజిక్ ఫిగర్ 113. పీపుల్స్ పల్స్ రీసెర్చ్ సంస్థ నిర్వహించిన సర్వే ప్రకారం ఇప్పటికిప్పుడు అసెంబ్లీ ఎన్నికలు జరిగితే ప్రస్తుత ప్రధాన ప్రతిపక్ష పార్టీ బీజేపీ 51 శాతం ఓట్లతో 136-159 స్థానాలు గెలుచుకునే అవకాశం ఉంది. అలాగే, కాంగ్రెస్ 40.3 శాతం ఓట్లతో 62-82 స్థానాలు, జేడీ(ఎస్) 5 శాతం ఓట్లతో 3-6 స్థానాలు గెలుచుకునే అవకాశాలున్నాయని వెల్లడైంది. ప్రస్తుతం అధికారంలో ఉన్న కాంగ్రెస్ పై ప్రధాన ప్రతిపక్ష పార్టీ బీజేపీ 10.7 ఓట్ల శాతం స్పష్టమైన ఆధిక్యత కనబరుస్తోంది.

ఆపరేషన్ సిందూర్ ప్రభావం

పహల్గాం ఘటన, అనంతరం ఆపరేషన్ సిందూర్ కూడా బీజేపీకి అనుకూలంగా మారాయి. పాకిస్తాన్తో కాల్పుల విరమణ తర్వాత, అంటే మే 10వ తేదీ తర్వాత బీజేపీకి 1 -1.5 శాతం ఓటర్ల మద్దతు పెరిగినట్టు సర్వేలో స్పష్టమైంది. 2023 ఎన్నికల్లో కాంగ్రెస్ పార్టీ 42.88 శాతం ఓట్లతో 135 స్థానాలు, బీజేపీ 36 శాతం ఓట్లతో 66 స్థానాలు, జేడీ(ఎస్) 13.29 శాతం ఓట్లతో 19 స్థానాలు గెలుపొందగా, ఈ రెండేళ్ల వ్యవధిలో అధికార కాంగ్రెస్ పార్టీ తీవ్ర ప్రజావ్యతిరేకతను ఎదుర్కొంటున్నట్టు ఈ సర్వేలో వెల్లడైంది.

ఎక్కువ మద్దతు బీజేపీకే

వచ్చే అసెంబ్లీ ఎన్నికల తరువాత కర్ణాటకలో ఏ పార్టీ అధికారంలోకి వస్తుందని ప్రశ్నించినప్పుడు 55 శాతం మంది బీజేపీ, 39.1 శాతం మంది కాంగ్రెస్ అని, 3.6 శాతం మంది జెడి(ఎస్) అని, 2.3 శాతం మంది ఇతరులు అని ఈ సర్వేలో వెల్లడైంది. మహిళా ఓటర్లలో బీజేపీకి 48.4 శాతం, కాంగ్రెస్ కు 44.6 శాతం మద్దతు లభిస్తుండడంతో కాంగ్రెస్ పై బీజేపీ మహిళా ఓటర్లలో 3.8 శాతం ఆధిపత్యం కనబరుస్తోంది.

సంక్షేమ పథకాల ప్రభావం లేదా?

సిద్దరామయ్య నేతృత్వంలోని కాంగ్రెస్ ప్రభుత్వం భారీగా మహిళా సంక్షేమ పథకాలు అమలు చేస్తున్నా ఆశించిన ఆదరణ పాలకపక్షానికి లభించడం లేదు. పురుష ఓటర్లలో బీజేపీ 51.9 శాతం, కాంగ్రెస్ 38.9 శాతం ఓట్లు సాధిస్తుండడంతో, బీజేపీ కాంగ్రెస్ పై 13 శాతం భారీ ఆధిక్యత చూపుతున్నట్టు సర్వేలో వెల్లడైంది. 18 – 25 సంవత్సరాల ఓటర్లలో బీజేపీ 24 శాతం ఆధిక్యతను కాంగ్రెస్ పార్టీపై కొనసాగిస్తోంది. ఇతర వయసు ఓటర్లలో బీజేపీకి 48 శాతం నుండి 51 శాతం ఓట్లు లభిస్తుండగా, కాంగ్రెస్ కు 42 శాతం నుండి 44 శాతం ఓట్లు లభించవచ్చని తేలింది.

గ్రామీణ, పట్టణ ప్రాంతాలలో

రాష్ట్రంలోని గ్రామీణ, పట్టణ ప్రాంతాలలో కూడా బీజేపీ స్పష్టమైన ఆధిక్యతలో ఉంది. గ్రామీణ ప్రాంతంలో 13.5 శాతం, పట్టణాల్లో 6.6 శాతం కాంగ్రెస్ పార్టీపై బీజేపీ ఆధిక్యతలో ఉండగా, గ్రామీణ ప్రాంతాల్లో జేడీ(ఎస్) 5.7 శాతం ఓట్లు సాధించవచ్చని సర్వేలో వెల్లడైంది. రైతుల్లో బీజేపీకి 53.9 శాతం, కాంగ్రెస్ కు 37.4 శాతం ఓట్లు లభించవచ్చు. 2023 ఎన్నికల్లో రైతు సంబంధిత అంశాలను కీలకంగా ప్రచారం చేసి, సానుకూల ఫలితాలు సాధించిన కాంగ్రెస్ కు ప్రస్తుతం రైతుల్లో కూడా ఆదరణ తగ్గడం గమనించాల్సిన విషయం.

మత, కుల రాజకీయాల ప్రభావం

కర్ణాటకలో మత, కుల రాజకీయాలకు ఎంతో ప్రాధాన్యత ఉంది. హిందూ సామాజికవర్గంలో బీజేపీకి 58.5 శాతం ఆదరణ లభిస్తుండగా, కాంగ్రెస్ కు లభిస్తున్న ఆదరణ కేవలం 32 శాతానికే పరిమితమైంది. ముస్లిం సామాజికవర్గంలో 85.5 శాతం ఓట్లతో కాంగ్రెస్ పటిష్టంగా ఉండగా, బీజేపీ కేవలం 9.3 శాతం ఓట్లే పొందే అవకాశం ఉన్నట్లు ఈ సర్వేలో తేలింది.

అన్ని కేటగిరీల్లో బీజేపీకే

రాష్ట్రంలోని జనరల్ కేటగిరీ ఓటర్లలో కాంగ్రెస్ కంటే బీజేపీకి 15.1 శాతం, ఓబీసీల్లో 14 శాతం, ఎస్టీల్లో 22 శాతం ఆధిక్యత కనిపిస్తోంది. రాష్ట్రంలో కీలకమైన లింగాయత్ సామాజికవర్గంలో బీజేపీకి 78.9 శాతం ఆదరణ లభిస్తుండగా, కాంగ్రెస్ కు కురుబ సామాజికవర్గంలో 54.6 శాతం ఆదరణ కనిపిస్తోంది. మరోవైపు ఒక్కలింగాల సామాజికవర్గంలో బీజేపీకి 47.8 శాతం, జేడీ(ఎస్)కు 24.6 శాతం, కాంగ్రెస్ కు 22.9 శాతం ఆదరణ ఉన్నట్లు సర్వేలో వెల్లడైంది.

కులాల వారీగా

సామాజికవర్గాల వారీగా పరిశీలిస్తే కాంగ్రెస్ పార్టీ కురుబ, ఆదికర్ణాటక, మాదిగ, మాదర్ సామాజికవర్గాల్లో బీజేపీపై ఆధిక్యత కనబరుస్తుండగా, లింగాయత్(వీరశైవాస్), ఒక్కలింగాస్ నాయక్/ నాయక్ వాల్మీకి, మరాఠాస్, విశ్వకర్మ సామాజికవర్గాల్లో బీజేపీ ముందంజలో ఉన్నట్లు ఈ సర్వేలో వెల్లడైంది. ఎస్సీలో కాంగ్రెస్ పార్టీ 51.5 శాతం ఓట్లు పొందుతుండగా, బీజేపీకి 41.7 శాతం ఓట్లు వచ్చే అవకాశాలున్నాయి. ఎస్సీ సామాజికవర్గంలో బీజేపీపై కాంగ్రెస్ పార్టీకి 9.8 శాతం ఓట్ల ఆధిక్యత లభించే అవకాశాలు స్పష్టంగా కనబడుతున్నాయి.

సిద్ధరామయ్యకే అధిక ప్రజాదరణ

కర్ణాటక రాష్ట్రంలో అత్యంత ప్రజాదరణ కలిగిన నాయకుడు ప్రస్తుత ముఖ్యమంత్రి సిద్దరామయ్య అని ఈ సర్వేలో మరోసారి స్పష్టమైంది. రాష్ట్రానికి ఎవరు ముఖ్యమంత్రి అయితే బాగుంటుందని ప్రశ్నించినప్పుడు ప్రస్తుత ముఖ్యమంత్రి సిద్దరామయ్యకు 29.2 శాతం మద్దతు ఇస్తుండగా, ఉప ముఖ్యమంత్రి డి.కె.శివకుమార్ కు 10.7 శాతం, జేడీ(ఎస్) నేత, మాజీ ముఖ్యమంత్రి హెచ్.డి.కుమారస్వామికి 7.6 శాతం, బీజేపీ నేత మాజీ ముఖ్యమంత్రి బీ.ఎస్.యడియురప్పకు 5.5 శాతం, కర్ణాటక బీజేపీ అధ్యక్షులు బీ.వై. విజయేంద్రకు 5.2 శాతం ప్రజలు మద్దతు ఇస్తున్నట్లు ఈ సర్వేలో వెల్లడైంది.

కాంగ్రెస్ ప్రభుత్వ పనితీరు

కర్ణాటక రాష్ట్రంలో రెండు సంవత్సరాల కాంగ్రెస్ ప్రభుత్వం పనితీరుపై ప్రజాభిప్రాయం సేకరించగా ప్రభుత్వం పనితీరు బాగుందని లేదా చాలా బాగుందని 48.4 శాతం మంది, బాగోలేదు లేదా ఏమాత్రం బాగోలేదని 32 శాతం మంది చెప్పారు. ప్రతి ఐదుగురు ఓటర్లలో దాదాపు ఒకరు ప్రభుత్వ పనితీరు యావరేజీగా (పర్వాలేదు) ఉందని చెప్పారు. మరో అత్యంత కీలకాంశం ఏమిటంటే, గత బీజేపీ ప్రభుత్వం కంటే ప్రస్తుత కాంగ్రెస్ ప్రభుత్వమే నయమని 48 శాతం మంది భావించగా, దీన్ని 55.2 శాతం బీజేపీ ఓటర్లు, 54.7 శాతం జేడీ(ఎస్) ఓటర్లు అంగీకరించలేదు.

ప్రధానిగా ఎవరు?

వచ్చే లోక్ సభ ఎన్నికల తరువాత దేశానికి ఎవరు ప్రధాన మంత్రి అయితే బాగుంటుందని ప్రశ్నించగా నరేంద్ర మోదీకి 59.1 శాతం, కాంగ్రెస్ అధినేత రాహుల్ గాంధీకి 17.3 శాతం, కర్ణాటకకు చెందిన కాంగ్రెస్ జాతీయ అధ్యక్షులు మల్లికార్జున్ ఖర్గేకు 2.3 శాతం మద్దతు లభించింది. మరోవైపు 10.9 శాతం మంది బీజేపీ నేత, యూపీ ముఖ్యమంత్రి యోగి ఆదిత్యనాథ్ కు ప్రధాన మంత్రి పదవి కోసం మద్దతు పలికారు.

కేంద్ర ప్రభుత్వం పనితీరుపై

కేంద్ర ప్రభుత్వం పనితీరుపై ఓటర్లను ప్రశ్నించగా 66.3 శాతం అనుకూలంగా ఉన్నారు. ఆశ్చర్యకరంగా కర్ణాటకలోని కాంగ్రెస్ ఓటర్లలో 59.3 శాతం మంది కేంద్ర ప్రభుత్వ పనితీరు చాలా బాగుందని లేదా బాగుందని అభిప్రాయపడడం ఇక్కడ గమనించాల్సిన విషయం.

కులగణనపై.

కర్ణాటక రాష్ట్రంలో ఇటీవల కాంగ్రెస్ ప్రభుత్వం విడుదల చేసిన కులగణన నివేదికపై ప్రజాభిప్రాయం సేకరించినప్పుడు 26.3 శాతం ఓటర్లు ఈ నివేదికను విశ్వసిస్తున్నామని చెప్పగా, 16 శాతం మంది కొంత వరకు విశ్వసిస్తున్నామన్నారు. 35 శాతం మంది ఈ నివేదికను విశ్వసించడం లేదని తమ అభిప్రాయాన్ని తెలిపారు. కులగణనపై సామాజికవర్గాల వారీగా పరిశీలిస్తే లింగాయత్, ఒక్కలింగాల ఓటర్లలో 50 శాతం మంది కాంగ్రెస్ ప్రభుత్వం విడుదల చేసిన కులగణన నివేదికను విశ్వసించడం లేదని సర్వేలో వెల్లడైంది. ప్రస్తుతం రాష్ట్ర అసెంబ్లీలో 37 మంది ఎమ్మెల్యేలున్న లింగాయత్ లు, 23 మంది ఎమ్మెల్యేలున్న ఒక్కలింగాలు కులగణనను అశాస్త్రీయంగా ఉందని పేర్కొనడం విశేషం. కురుబ (33 శాతం), మాదిగలు (45.1 శాతం) కులగణన నివేదికను విశ్వసిస్తున్నారు.