కార్తీక దీపం 2 నేటి (మే 24, 2025) ఎపిసోడ్‍లో ఇంటికి వచ్చి దీప ఏడుస్తూ ఉంటుంది. ఏమైంది.. జ్యోత్స్న రెస్టారెంట్‍కు వచ్చిందా అని కాంచన అడుగుతుంది. వచ్చిందని, కార్తీక్ బాబు కుర్చీలో జ్యోత్స్న కూర్చుందని దీప అంటుంది. పనోడితో చేయించాల్సిన పనులు చేయిస్తోందని చెబుతుంది. కార్తీక్ బాబుతో కాఫీ తెప్పించుకొని కావాలనే ఒలకబోసి టేబుల్ క్లీన్ చేయించిందని కన్నీటితో చెబుతుంది. దీంతో కాంచన ఆగ్రహిస్తుంది. సంతకం పెట్టించుకొని కూలివాడిలాగా పని చేయించుకుంటుందా అని అనసూయ కూడా కోప్పడుతుంది. ఏడ్వడం తప్ప నాకు ఏం చేయాలో తెలియడం దీప లేదని అంటుంది. జ్యోత్స్న గురించి తండ్రి శివన్నారాయణ, అన్నావదినలను అడుగుతాదం పదా అని కాంచన అంటుంది. దీప వద్దంటుంది.

నిర్ణయం తీసుకున్నా

జ్యోత్స్న చెప్పినవన్నీ చేసేందుకు కార్తీక్ బాబే సిద్ధంగా ఉన్నప్పుడు మనం ఏం చేయగలమని దీప బాధగా చెబుతుంది. మాట కోసం కార్తీక్ బాబు తనను తాను వదులుకుంటారని దీప అంటుంది. ఇప్పుడు నా కొడుకును ఎలా కాపాడుకోమంటావో చెప్పు అని కాంచన అంటుంది. తనకు కూడా ఏమీ అర్థం కావడం లేదనేలా దీప అంటుంది. కాంచన బాధ పడుతుంది. జ్యోత్స్న నా మీద ఉన్న కసి, పగ కార్తీక్ బాబు మీద చూపిస్తోందని దీప అంటుంది. మనమందరం ఒక్క మాట మీద ఉంటే జ్యోత్స్న మాట వినకుండా కార్తీక్ బాబును చేయవచ్చని అనసూయ అంటుంది. ముందు కార్తీక్ బాబును ఇంటికి రానివ్వండి.. జరిగింది చూసి నేను ఓ నిర్ణయానికి వచ్చానని దీప అంటుంది. ఏ నిర్ణయం అని అనసూయ అడిగితే.. కార్తీక్ బాబు వచ్చాక చెబుతానంటుంది దీప.

జ్యోత్స్న బ్యాగ్ మోసుకొచ్చిన కార్తీక్

శివన్నారాయణ, దశరథ్ మాట్లాడుకుంటూ ఉంటారు. ఇంతలో వారిని భోజనానికి పిలుస్తుంది సుమిత్ర. జ్యోత్స్న ఇంకా రాలేదు కదా అని పారిజాతం అంటుంది. బావతో అడ్డమైన చాకిరీ చేయించడంలో జ్యోత్స్న బిజీగా ఉంటుందని శివన్నారాయణ ఆనందంగా అంటాడు. కార్తీక్ కూడా ఇంటికి వెళ్లాలి కదా అని దశరథ్ అంటాడు. పనివాళ్లు పని పూర్తయ్యేకా వెళ్లాలి రా అని శివన్నారాయణ అంటే.. కరెక్ట్ అంటూ ఇంట్లోకి వస్తుంది జ్యోత్స్న. నీ బ్యాగ్ ఏదీ అని పారు అంటే.. నా అసిస్టెంట్ తీసుకొస్తున్నాడని జ్యో చెబుతుంది. జ్యో చప్పట్లు కొడితే.. బ్యాగ్ తీసుకొని ఇంట్లోకి వస్తాడు కార్తీక్. ఇది చూసి సంబరపడతాడు తాత శివన్నారాయణ. నేను పంపిన వీడియో ఎవరూ చూడలేదా అని జ్యో అంటే.. ఆనందంతో స్వీట్లు కూడా తిన్నానని పారు అంటుంది. మరీ ఎక్కువ తింటే ఆనందంలో పోయావంటే తాతకు ఈ వయసులో మూడో పెళ్లి చేయడం అంటే పంచ్ వేస్తాడు కార్తీక్.

ఆరాచకంగా జ్యోత్స్న ప్రవర్తన.. బూట్లు క్లీన్ చేసిన కార్తీక్

కావాలంటే మీరు చెప్పిన పని కూడా కార్తీక్ చేస్తాడు జ్యోత్స్న అంటుంది. అగ్రిమెంట్‍పై సంతకం చేసిన బావ కార్తీక్‍పై జ్యోత్స్న అరాచకంగా ప్రవర్తిస్తుంది. ఏ పనైనా చేస్తాడని జ్యో అంటే నేను నమ్మనని పారు అంటుంది. ఏం చేద్దాం అని జ్యో ఆలోచిస్తుంది. నువ్వెళ్లి తాత షూ, క్లీనింగ్ కిట్ తీసుకురా అని పారుకు జ్యో చెబుతుంది. జ్యోత్స్న అంటూ కోపంగా అరుస్తాడు దశరథ్. పని వాళ్లు నిజాయితీ నిరూపించుకునే అవకాశం ఇవ్వాలి కదా అని శివన్నారాయణ అంటాడు.

బూట్లు, క్లీనింగ్ కిట్ తెచ్చిస్తుంది పారిజాతం. తాత బూట్లను కార్తీక్ క్లీన్ చేస్తాడు. ఏంటిది అని దశరథ్ అడుగుతాడు. నేను పెట్టిన సంతకం నా భార్యను కాపాడింది.. ఇచ్చిన మాటకు కట్టుబడుతున్నాననేలా కార్తీక్ మాట్లాడతాడు. తాత బూట్లను శుభ్రం చేస్తూ ఉంటాడు. జ్యోత్స్న వీడియో తీస్తుంది.

చిన్నప్పుడు నా షూ క్లీన్ చేశావ్ కదా

ఇది రా నీ స్థాయి అని శివన్నారాయణ అంటాడు. నేను చేసే పనిలో నీకు స్థాయి కనబడుతుందేమో.. నాకు బాల్యం కనపడుతోందని కార్తీక్ చెబుతాడు. చిన్నప్పుడు స్కూల్‍కు వెళుతుంటే.. నా షూస్ నువ్వు క్లీన్ చేసే వాడివి అని శివన్నారాయణ గుర్తు చేస్తాడు. “మనవడి షూ క్లీన్ చేయడం తాతయ్యకు అందమైన జ్ఞాపకం అని అన్నావ్.. ప్రేమగా నా కాలి తీసుకొని షూ తొడిగి ప్రేమగా ముద్దు పెట్టి స్కూల్‍కు పంపించేవాడివి” అని కార్తీక్ అంటాడు. తాత షూ క్లీన్ చేయడం కూడా మనవడికి మంచి జ్ఞాపకమే, ఎంత మంది మనవళ్లకు ఇలా రుణం తీర్చుకునే అవకాశం వస్తుంది చెప్పు అని కార్తీక్ చెబుతాడు. అవమానాన్ని దాటుకుంటున్నావా అని శివన్నారాయణ అంటే.. అయిన వాళ్ల మధ్య అవమానం కూడా అభిమానంలో భాగమే తాత అని కార్తీక్ అంటాడు.

తినడానికి కాదు వడ్డించడానికి

భోజనం చేద్దాం పదా అని సుమిత్ర అంటుంది. పద బావ అని జ్యోత్స్న అంటుంది. పని వాళ్లను నీతో సమానంగా కూర్చొని తింటావా అని పారిజాతం అంటుంది. బావను రమ్మనింది తినడానికి కాదు.. వడ్డించడానికి అని జ్యోత్స్న అంటుంది.

భార్య కోసం బంటులా..

నిన్ను ఇలా చేయడం నా వల్ల కాదు.. వెళ్లిపోరా అని కార్తీక్‍కు దశరథ్ అంటాడు. రామాయణం, మహాభారతంలో త్యాగాల గురించి కార్తీక్ చెబుతాడు. తండ్రి కోసం, రాజ్యం కోసమో వనవాసం చేసిన రాజుల కథలు విని ఉంటావ్ కానీ.. భార్య కోసం ఓ రాజు బంటులా మారిన కథ ఎప్పుడైనా విన్నావా మామయ్య అని కార్తీక్ అంటాడు. ఇప్పుడు చూస్తున్నా అని దశరథ్ చెబుతాడు. కుటుంబం కోసమే ఇదంతా, కొన్నాళ్లు భరించాల్సిందేనని కార్తీక్ అంటాడు. నువ్వు రాముడిని కన్నావ్ కాంచన.. కానీ నేను సీతను కనలేకపోయానని దశరథ్ బాధపడతాడు.

భోజనం వడ్డించిన కార్తీక్

శివన్నారాయణ, జ్యోత్స్న, దశరథ్, సుమిత్ర, పారిజాతానికి భోజనం వడ్డిస్తాడు కార్తీక్. దోసకాయ పచ్చడిలో పెరుగు కలుపుకొని తినే వాడికి కదా.. ఇప్పుడూ అలాగే తింటున్నావా అని కార్తీక్ అడుగుతాడు. బాగానే గుర్తుందే అని శివన్నారాయణ అంటే.. మరిచిపోతే కదా అని కార్తీక్ అంటాడు. భోజనం వడ్డిస్తూనే అప్పడి జ్ఞాపకాలను గుర్తు చేస్తుంటాడు. పనోడంటే బావే గుర్తుకు రావాలని జ్యోత్స్న అంటుంది. పైత్యం ఎక్కువైనట్టుంది.. ధనియాల పొడిలో నెయ్యి కలుపుకొని తిను అంటూ కౌంటర్ వేస్తాడు కార్తీక్.

చిన్నప్పుడు గోరుముద్దులు తినిపించావ్ కదా

నీకు కొంచెం కూడా బాధగా అనిపించడం లేదా అని సుమిత్ర అడుగుతుంది. లేదు, మీరంతా నా ఫ్యామిలీనే కదా అని కార్తీక్ అంటాడు. చిన్నప్పుడు నన్ను ఎత్తుకొని గోరుముద్దలు తినిపించి, మూతి కూడా తుడిచావ్ కదా అని సుమిత్రకు కార్తీక్ గుర్తు చేస్తాడు. మరి ఏం చేస్తే నీ రుణం తీరుతుందత్తా అని చెబుతాడు. నన్ను కన్నబిడ్డలా చేసుకున్న నీకు భోజనం వడ్డించే అవకాశం వచ్చినందుకు ఆనందపడుతున్నానని కార్తీక్ ఆనందంగా చెబుతాడు.

వీడియో తీసిన జ్యోత్స్న

కార్తీక్ భోజనం వడ్డిస్తుండగా వీడియో తీస్తుంది జ్యోత్స్న. భోజనం చేసేందుకు నువ్వు కూడా కూర్చో అని దశరథ్ అంటే.. ఇంటికి వెళ్లి నా కుటుంబంతో తింటే ఏదో తృప్తి అని కార్తీక్ చెబుతాడు. కాస్త కర్రీ వడ్డించి అని జ్యోత్స్న అడుగుతుంది. నేను వెళ్లవచ్చా అని కార్తీక్ అంటే.. బ్యాగ్ నా రూమ్‍లో పెట్టు అని జ్యో చెబుతుంది. జ్యోత్స్న మరీ టూమచ్ చేస్తోందని మనసులో అనుకుంటాడు దశరథ్. ఆనందంతో కడుపు నిండిపోతోందని పారు అంటే.. మరీ ఎక్కువగా తింటే ఉదయం లేస్తావో లేదో కూడా తెలియదని పంచ్ వేస్తాడు కార్తీక్. ఆనందంతో చస్తే ఆసహ్యంగా ఉంటుందని కౌంటర్ వేస్తాడు.

ఇంత హాట్‍గా ఉన్నావంటే బావా..

ఈ మొత్తం వీడియోలు అన్నీ దీపకు పంపాలి.. చివరిది మాత్రం హార్ట్ బ్లాస్ట్ అవ్వాలని రూమ్‍లో కూర్చొని సంతోషంగా ఉంటుంది జ్యోత్స్న. బ్యాగ్ తీసుకొచ్చి వెళతానని కార్తీక్ అంటాడు. వెళ్లమనే వరకు ఇక్కడే ఉండాలని జ్యో అంటుంది. ఏసీ ఆన్ చేయి.. 16లో పెట్టు అంటూ కార్తీక్‍కు ఇబ్బంది పెడుతుంది. చల్లగాలి తగిలితే మనసు జివ్వు మనరాలి అంటే.. రెండు దెబ్బలు పడితే ఒళ్లంతా జివ్వుమంటుందని కార్తీక్ చిరాకుగా అంటాడు. ఇంత హాట్‍గా ఉన్నావేంటి బావ.. చల్లగాలి తగిలితే నిద్ర పోవాలని అనిపించడం లేదా అని జ్యోత్స్న అంటుంది. వదిలేస్తే ఇంటికి వెళ్లాలనుకుందని కార్తీక్ చిరాకు పడతాడు.

చెప్పే రోజు వస్తుంది

నీకూ ఓ ఫ్యామిలీ ఉంటే వాల్యూ తెలుస్తుందని కార్తీక్ అంటాడు. ఉంది కదా అని జ్యో చెబుతుంది. ఉండడం వేరు.. ఉందని ఫీల్ అవడం వేరు అని కార్తీక్ అంటాడు. ఏదో కొత్తగా మాట్లాడుతున్నావ్ బావా అని జ్యో అంటే.. నువ్వు కూడా కొత్తగా కనిపిస్తున్నావని కార్తీక్ బదులిస్తాడు. చెప్పే రోజు వస్తుందని కార్తీక్ అంటాడు. నీ మనసులో ఏదో ఉందని జ్యో అనుమానంగా అంటుంది. ఇప్పుడైనా వెళ్లొచ్చా అని కార్తీక్ అంటే.. దుప్పటి, దిండు సర్దాలని జ్యో మరింత ఇబ్బంది పెడుతుంది. మార్నింగ్ కలుద్దామని జ్యోత్స్న చెబుతుంది.

జ్యోకు థ్యాంక్స్ చెప్పిన కార్తీక్

నా ఫ్యామిలీని నాకు దగ్గరగా ఉంచినందుకు థ్యాంక్స్ అని జ్యోత్స్నకు చెబుతాడు కార్తీక్. నీ ఫ్యామిలీ ఏంటి.. మరి నేను ఎవరిని అని జ్యో అడుగుతుంది. నేను నీ అసిస్టెంట్ కదా అందుకే అలా అన్నా.. కొద్ది రోజులైన ప్రశాంతంగా పడుకో అని చెప్పి వెళ్లిపోతాడు కార్తీక్. “బావ మాటల్లో, చూపుల్లో ఏదో తేడా కనిపిస్తోంది, నా గురించి నిజం తెలిసిందా.. అయినా తెలిస్తే అందరికీ చెప్పేస్తాడు కదా. నేనే ఎక్కువ ఆలోచిస్తున్నా” అని జ్యోత్స్న అనుకుంటుంది. వీడియోలను దీప చూసేలా చేయాలని, చూస్తే గుండె వంద ముక్కలు అవుతుందని సంబరపడుతుంది. సారీ బావా.. నిన్ను దీపకు దూరం చేయాలంటే నిన్ను కొంత బాధపెట్టాల్సిందేనని అనుకుంటుంది.

మనమే అడ్డుపడాలి

కార్తీక్‍ను జ్యోత్స్న పెడుతున్న ఇబ్బందులను తలుచుకొని దశరథ్ బాధపడతాడు. సుమిత్ర ట్యాబ్లెట్ తెచ్చి ఇస్తుంది. మనసు బాగోలేనప్పుడు శరీరానికి ఏ మందు ఇచ్చినా లాభం ఉండదని ఓ డాక్టర్ చెప్పాడని దశరథ్ అంటాడు. కార్తీక్‍ను జ్యో బాధ పెట్టడం కరెక్ట్ అనిపిస్తుందా అని సుమిత్రను అడుగుతాడు. జ్యోను కూడా కార్తీక్ పెళ్లి చేసుకోకుండా బాధ పెట్టలేదా అని సుమిత్ర ప్రశ్నిస్తుంది. కార్తీక్ ఇష్టమైన పెళ్లి చేసుకున్నాడని దశరథ్ అంటాడు. అది గతం, దాన్ని మనసులో పెట్టుకొని ఇప్పుడు కార్తీక్‍‍ను జ్యోత్స్న ఇబ్బంది పెడుతుంటే మనమే ఖండించాలి. అడ్డుపడాలని దశరథ్ అంటాడు.

అసలు నిజాలు బయటపడితే కానీ..

ఓ తల్లిగా నువ్వు జ్యోత్స్నను మందలించాలని సుమిత్రతో దశరథ్ చెబుతాడు. అగ్రిమెంట్ మీద సంతకం పెట్టి అది చెప్పిన పనులను కార్తీక్ చేస్తుంటే దానికి మనమేం చేయాలని సుమిత్ర అడుగుతుంది. కావాలనే ఎవరినీ బాధపెట్టేంత మూర్ఖురాలు నా కూతురు కాదని చెబుతుంది. “నీ కూతురు ఎవరినీ బాధపెట్టదని నీకు తెలుసా. పిల్లలకు అన్నీ తెలుసు. వాళ్ల గురించి మనకే తెలియదు. అయ్యో పాపం నా కూతురికి ఏమీ తెలియదని అనుకుంటాం. అసలు నిజాలు బయటపడితే కానీ ఎవరు ఏంటనేది తెలియదు” అని ఆవేశంగా అంటాడు దశరథ్. మీరెందుకు ఆవేశపడుతున్నారు.. అసలు నిజమేంటి అని సుమిత్ర అడుగుతుంది. అగ్రిమెంట్ గురించే అని కవర్ చేస్తాడు దశరథ్. “జ్యోత్స్న చెప్పిందే కాకుండా వాళ్ల మధ్య మరిన్ని ఒప్పందాలు ఉన్నాయేమో. ఈ రోజు అది చేస్తున్న తప్పు నాన్నకు ఆనందం కలిగించొచ్చేమో. కానీ అవే పనులు రేపు మనల్ని బాధపెట్టొచ్చు. ఏదో ఒకటి చేసి దీన్ని ముగించాలి” అని దశరథ్ అంటాడు.

నేను మాత్రం నా మేనల్లుడిని బాధపెడితే చూడగలనా అని సుమిత్ర అంటుంది. నేనే ఇంత బాధపడుతుంటే.. అక్కడ నా చెల్లి ఇంకెంత బాధపడుతుందో అని దశరథ్ ఆందోళన చెందుతాడు. దీంతో కార్తీక దీపం 2 నేటి (మే 24) ఎపిసోడ్ ముగిసింది.