పవర్ స్టార్ పవన్ కల్యాణ్ చేస్తున్న సినిమాల్లో ఓజీ చిత్రానికి స్పెషల్ క్రేజ్ ఉంది. ఈ మూవీ కోసం పవన్ అభిమానులతో పాటు సినీ ప్రేక్షకులందరూ ఎంతో ఎదురుచూస్తున్నారు. ఈ గ్యాంగ్‍స్టర్ యాక్షన్ మూవీకి సుజీత్ దర్శకత్వం వహిస్తున్నారు. పవన్ కల్యాణ్ రాజకీయాల్లో బిజీ కావడం, గతేడాది ఏపీ డిప్యూటీ సీఎంగా పదవి చేపట్టడంతో ఈ చిత్రం ఆలస్యమైంది. ఇటీవలే మళ్లీ షూటింగ్ షురూ అయింది. ఈ తరుణంలో ఓజీ సినిమా విడుదల తేదీని మూవీ టీమ్ ప్రకటించింది.

రిలీజ్ డేట్ ఇదే

ఓజీ సినిమా ఈ ఏడాది సెప్టెంబర్ 25వ తేదీన థియేటర్లలో విడుదల కానుంది. ఈ విషయాన్ని మూవీ టీమ్ నేడు (మే 25) అధికారికంగా వెల్లడించింది. “ప్రపంచవ్యాప్తంగా థియేటర్లలో 2025 సెప్టెంబర్ 25వ తేదీన ఫైరింగ్” అంటూ డీవీవీ ఎంటర్‌టైన్‍మెంట్ సోషల్ మీడియాలో వెల్లడించింది. 25 సెప్టెంబర్ 25.. ఓజీ అంటూ ఓ పోస్టర్ షేర్ చేసింది.

జోరుగా షూటింగ్

ఓజీ సినిమా షూటింగ్ మళ్లీ ఇటీవలే మొదలైంది. ముందుగా విదేశాల్లో చిత్రీకరించాలనుకున్న సీన్లను హైదరాబాద్‍లోనే తీయాలని మేకర్స్ ప్లాన్ చేశారు. ఈ చిత్రాన్ని వీలైనంత త్వరగా పూర్తి చేయాలని పవన్ భావిస్తున్నారు. ప్రస్తుతం షూటింగ్ జోరుగా సాగుతోంది. దీంతో రిలీజ్ డేట్‍ను టీమ్ ఖరారు చేసింది. ఈ ఏడాది సెప్టెంబర్ 25న విడుదల చేస్తున్నట్టు ప్రకటించేసింది. సినీ ప్రేక్షకులు ఎంతగానో ఎదురుచూస్తున్న బిగ్గెస్ట్ అప్‍డేట్ ఇచ్చేసింది.

ఓజీ సినిమాలో పవన్ కల్యాణ్‍కు జోడీగా ప్రియాంక మోహన్ నటిస్తున్నారు. ఇమ్రాన్ హష్మి, అర్జున్ దాస్, శ్రీయారెడ్డి, ప్రకాశ్ రాజ్, హరీశ్ ఉత్తమన్, శుభలేఖ సుధాకర్, అభిమన్యు సింగ్ కీలకపాత్రలు పోషిస్తున్నారు. ఈ చిత్రానికి ఎస్ తమన్ సంగీతం అందిస్తున్నారు.

ఓజీ చిత్రంపై అంచనాలు మాత్రం ఆకాశమంత ఉన్నాయి. వచ్చిన ఒకే గ్లింప్స్ మోతమోగించింది. మూవీపై హైప్‍ను అమాంతం పెంచేసింది. ఈ మూవీని హైవోల్టేజ్ గ్యాంగ్‍స్టర్ యాక్షన్ చిత్రంగా సుజీత్ తెరకెక్కిస్తున్నారు. తెలుగుతో పాటు హిందీ, తమిళం, మలయాళం, కన్నడలో ఈ మూవీ విడుదల కానుంది.

వీరమల్లు రిలీజ్‍కు రెడీ

పవన్ కల్యాణ్ హీరోగా నటించిన హరి హర వీరమల్లు చిత్రం వచ్చే నెల జూన్ 12న విడుదల కానుంది. ఈ పీరియాడిక్ యాక్షన్ చిత్రానికి ప్రస్తుతం జ్యోతి కృష్ణ దర్శకత్వం వహిస్తున్నారు. ఇటీవలే ఈ మూవీ షూటింగ్ పూర్తికాగా.. పోస్ట్ ప్రొడక్షన్ పనులు సాగుతున్నాయి. ఏపీ డిప్యూటీ సీఎంగా పవన్ బాధ్యతలు చేపట్టాక రిలీజ్ కానున్న ఆయన ఫస్ట్ మూవీ ఇదే. కాగా, ఓజీ చిత్రం సెప్టెంబర్ 25వ తేదీని లాక్ చేసుకుంది. హరీశ్ శంకర్ దర్శకత్వంలో ఉస్తాద్ భగత్ సింగ్ మూవీని కూడా పవన్ చేయనున్నారు. త్వరలోనే షూటింగ్ మొదలవుతుందని ఆ టీమ్ నుంచి ఇటీవలే అప్‍డేట్ వచ్చింది.