ఇంద్రకీలాద్రిపై కొలువైన కనక దుర్గ అమ్మ వారి నైవేద్యం విరామం కోసం ఇకపై ప్రతి రోజు ఉదయం 11.30 నుండి 1.30 వరకు వీఐపీ దర్శనాలను నిలిపివేస్తున్నట్టు ఆలయ ఈవో శీనా నాయక్‌ ప్రకటించారు.

దుర్గగుడిలో అమ్మవారికి నైవేద్యాలను సమర్పించే సమయంలో క్యూ లైన్లను ఎక్కడికక్కడ నిలిపి వేస్తుండటంతో వృద్ధులు, వికలాంగులు, పసి పిల్లలు తీవ్రంగా ఇబ్బంది పడుతున్నారని అదే సమయంలో వీఐపీ దర్శనాల కోసం వస్తుండటంతో సామాన్య భక్తులు ఇబ్బంది పడుతుండటంతో దర్శనాలను క్రమబద్దీకరిస్తున్నట్టు ప్రకటించారు.

అమ్మవారి దర్శనం కోసం వచ్చే వీఐపీలు ముందస్తు సమాచారం ప్రోటోకాల్‌ విభాగానికి అందించాలని, అన్ని వివరాలతో కూడిన ఫార్మాట్ లో వివరాలు తెలియ చేయాల్సి ఉంటుందని వివరించారు.

జూన్‌ 3, 4, 5 తేదీల్లో మల్లేశ్వరాలయంలో నవగ్రహ మండపం పున:ప్రతిష్ట

ఇంద్రకీలాద్రిపై కొలువైన శ్రీ మల్లేశ్వరస్వామి వారి ఆలయ ప్రాంగణం లో నిర్మించిన నవగ్రహ మండపం పునః ప్రతిష్ట కార్యక్రమం జూన్ 3,4,5 లో జరుగుతుందని అధికారులు వివరించారు.

దేవస్థానం లో జరుగుతున్న అభివృద్ధి పనులను వేగంగా పూర్తి చేసేందుకు కృషి చేస్తున్నట్టు ఈవో తెలిపారు. కొత్తగా నిర్మిస్తున్న అన్నదానం భవనం, లడ్డు తయారీ భవనం దసరా నాటికి వినియోగంలోకి తీసుకు వచ్చేలా యుద్ధ ప్రాతిపదికన పనులు జరుపుతున్నట్టు వివరించారు. రాతి యాగశాల, పూజా మండపములు శ్రావణ మాసం లోగా అందుబాటులోకి తీసుకురానున్నారు.

ట్రాఫిక్‌ సమస్యలకు పరిష్కారం…

నగరంలో నుండి ఇంద్రకీలాద్రికి వచ్చే భక్తుల సౌకర్యార్థం బస్ స్టేషన్, రైల్వే స్టేషన్, పున్నమి ఘాట్ నుండి బస్సులు ఏర్పాటు చేసి, కొండ పైన ట్రాఫిక్ ఇబ్బంది పరిష్కారం చేయడానికి ప్రయత్నం చేస్తున్నామని ఈవో వివరించారు.

వాహనాల మీద వచ్చే వారు సీతమ్మ వారి పాదాలు ప్రాంతంలో పార్కింగ్ కు 4 ఎకరాల్లో హోల్డింగ్ ఏరియా సిద్ధం చేస్తున్నామని, అవసరమైతే కుమ్మరి పాలెం సెంటర్ లోని టీ.టీ. డీ స్థలం లో కూడా హోల్డింగ్ ఏరియా ఏర్పాటు చేస్తామని ప్రకటించారు.

దుర్గాఘాట్ ను మరింతగా విస్తరించేందుకు చర్యలు తీసుకుంటున్నామన్నారు. ప్రసాద్ పధకం ద్వారా కేంద్రం సహాయంతో ఆలయాలను అభివృద్ధి చేయడానికి దేవదాయ మంత్రి, విజయవాడ పార్లమెంట్ సభ్యులు, విజయవాడ పశ్చిమ శాసన సభ్యులు కృషి చేస్తున్నారని, త్వరలో ఢిల్లీ నుండి సమాచారం రావొచ్చని వివరించారు.