చండీగఢ్ లోని సెక్టార్ 32లో ఉన్న గవర్నమెంట్ మెడికల్ కాలేజ్ అండ్ హాస్పిటల్ (GMCH)లో కోవిడ్-19 వైరస్ కారణంగా 40 ఏళ్ల రోగి బుధవారం మృతి చెందాడు. మృతుడు లుధియానా నుంచి రిఫర్ చేయగా తమ వద్దకు వచ్చాడని, తీవ్రమైన శ్వాసకోశ సమస్యలతో రెండు రోజుల పాటు ఆసుపత్రిలో ఉన్నారని జీఎంసీహెచ్ మెడికల్ సూపరింటెండెంట్ జీపీ థామి తెలిపారు. మంగళవారం కొవిడ్-19 పాజిటివ్ గా నిర్ధారణ కాగా, బుధవారం తెల్లవారు జామున మృతి చెందాడు.

కోవిడ్ 19 నిర్ధారణ

ఈ ఘటనపై జీఎంసీహెచ్ మెడికల్ సూపరింటెండెంట్ జీపీ థామి మాట్లాడుతూ ‘‘నిన్న ఓ పేషెంట్ వచ్చాడు. ఆయనకు కొవిడ్ సోకినట్లు నిర్ధారణ అయింది. ఇవాళ తెల్లవారు జామున 4 గంటల సమయంలో మృతి చెందాడు. అతడు యూపీలోని ఫిరోజాబాద్ కు చెందిన 40 ఏళ్ల వ్యక్తి. తీవ్రమైన శ్వాసకోశ సమస్య, జ్వరంతో బాధపడుతున్న ఆయనను లుధియానా నుంచి ఇక్కడికి రెఫర్ చేశారు’’ అని తెలిపారు.

ఐసోలేషన్ వార్డు సిద్ధం

చండీగఢ్ లోని ప్రభుత్వ ఆస్పత్రిలో కోవిడ్ ఐసోలేషన్ వార్డును ఏర్పాటు చేసినట్లు థామి తెలిపారు. ‘ఐసోలేషన్ వార్డును ఏర్పాటు చేశాం. కొవిడ్ 19 తో బాధపడుతూ మరింత మంది ఇక్కడికి వస్తారని అనుమానిస్తున్నాం’ అని థామీ పేర్కొన్నారు.

పెరుగుతున్న కోవిడ్ -19 కేసులు

దేశంలోని కొన్ని ప్రాంతాల్లో కోవిడ్ -19 కేసులు మళ్లీ నమోదయ్యాయని ఇండియన్ కౌన్సిల్ ఆఫ్ మెడికల్ రీసెర్చ్ (ICMR) ధృవీకరించింది. సోమవారం, భారతదేశంలో 1,009 యాక్టివ్ కోవిడ్ -19 కేసులు నమోదయ్యాయని ఆరోగ్య మరియు కుటుంబ సంక్షేమ మంత్రిత్వ శాఖ తెలిపింది. వాటిలో మొత్తం 430 యాక్టివ్ కేసులతో కేరళ అగ్రస్థానంలో ఉండగా, తదుపరి స్థానాల్లో మహారాష్ట్ర (209), ఢిల్లీ (104), గుజరాత్ (83), కర్ణాటక (47) రాష్ట్రాలు ఉన్నాయి.