తెలుగు టీవీ సీరియల్స్ 21వ వారం టీఆర్పీ రేటింగ్స్ లో మార్పులు చోటు చేసుకున్నాయి. కొంతకాలంగా వెనుకబడిన జీ తెలుగు సీరియల్స్ మరోసారి సత్తా చాటాయి. స్టార్ మాకు చెందిన రెండు సీరియల్స్ టాప్ 10లో నుంచి వెళ్లిపోగా.. వాటి స్థానంలో జీ తెలుగుకు సంబంధించిన సీరియల్స్ వచ్చాయి. మరి టాప్ 10లో ఏయే సీరియల్స్ ఉన్నాయో ఒకసారి చూద్దాం.

బ్రహ్మముడి 8వ స్థానానికి..

స్టార్ మా సీరియల్స్ 21వ వారం కూడా సత్తా చాటినా.. టాప్ 10లో మాత్రం రెండు సీరియల్స్ ను కోల్పోయింది. గత రెండు మూడు వారాలుగా 9 సీరియల్స్ ఈ ఛానెల్ కు చెందినవే ఉండేవి. కానీ తాజాగా రేటింగ్స్ నుంచి నిన్ను కోరి, పలుకే బంగారమాయెనా టాప్ 10 నుంచి వెళ్లిపోయాయి. కార్తీకదీపం సీరియల్ 12.26 రేటింగ్ తో తొలి స్థానంలో కొనసాగుతోంది. ఇక ఇల్లు ఇల్లాలు పిల్లలు సీరియల్ 11.79 రేటింగ్ తో రెండో స్థానంలో ఉంది.

మూడు, నాలుగు స్థానాల కోసం గట్టి పోటీ నెలకొంది. గుండెనిండా గుడిగంటలు సీరియల్ 10.47 రేటింగ్ తో మూడో స్థానంలో ఉండగా.. ఇంటింటి రామాయణం 10.46తో నాలుగో స్థానంలో ఉంది. ఇక చిన్ని సీరియల్ 8.23తో ఐదో స్థానంలో కొనసాగుతోంది. నువ్వుంటే నాజతగా మరోసారి బ్రహ్మముడిని వెనక్కి నెట్టి 7.17తో ఆరో స్థానంలోకి వచ్చింది. బ్రహ్మముడి 6.94 రేటింగ్ తో 8వ స్థానంలో ఉంది.

జీ తెలుగు సీరియల్స్ ఇలా..

ఇక జీ తెలుగు సీరియల్స్ విషయానికి వస్తే.. చాలా కాలం తర్వాత ఆ ఛానెల్ నుంచి ఓ సీరియల్ 7 రేటింగ్ దాటింది. మేఘ సందేశం 7.16తో ఓవరాల్ గా 7వ స్థానంలో ఉంది. ఇక చామంతి 6.86, జగద్ధాత్రి 6.85 రేటింగ్స్ తో 9, 10 స్థానాల్లో ఉన్నాయి. లక్ష్మీ నివాసం 6.04, అమ్మాయిగారు 5.20 రేటింగ్స్ సాధించాయి.

నిజానికి గత వారం వరకు జీ తెలుగు నుంచి ఒకే ఒక్క సీరియల్ మాత్రమే టాప్ 10లో ఉండేది. కానీ తాజాగా 21వ వారం రేటింగ్స్ లో మొత్తంగా మూడు సీరియల్స్ టాప్ 10లోకి వచ్చాయి. జీ తెలుగు సీరియల్స్ రేటింగ్స్ పెరగడంతోపాటు స్టార్ మా ఛానెల్ రేటింగ్స్ పడిపోవడం కూడా ఈ మార్పులకు కారణమైంది.