ఫిట్‌నెస్ కోచ్ తార్న్ కౌర్ 31 కిలోల బరువు తగ్గి, అద్భుతమైన శరీర సౌష్ఠవాన్ని సాధించింది. ఆమె తన బరువు తగ్గించే ప్రయాణాన్ని ఇన్‌స్టాగ్రామ్‌లో క్రమం తప్పకుండా పంచుకుంటూ, తన ఫాలోవర్స్‌కి స్ఫూర్తినిచ్చే అనేక డైట్ చిట్కాలు, వర్కవుట్ హ్యాక్స్, ప్రేరణను అందిస్తుంది.

మే 8న, తార్న్ ఒక పోస్ట్‌ను షేర్ చేస్తూ, అతిగా తినడాన్ని తగ్గించుకోవడానికి ఆరోగ్యకరమైన అలవాట్లను అలవర్చుకోవాల్సిన అవసరాన్ని గురించి ప్రస్తావించింది. “నాకు ఆత్మవిశ్వాసం లేదని నేను ఎప్పుడూ అనుకునేదాన్ని. కానీ నిజంగా నేను దృష్టి పెట్టాల్సింది, మార్చుకోవాల్సింది నా అలవాట్లు, ఆలోచనా విధానం. అతిగా తినడాన్ని నివారించడానికి, నా శరీరం చెప్పేది వినడానికి నాకు సహాయపడిన కొన్ని పనులు ఇక్కడ ఉన్నాయి” అని ఆమె రాసింది.

31 కిలోల బరువు తగ్గడానికి, అతిగా తినడాన్ని ఆపడానికి తార్న్ రోజూ చేసిన 8 అలవాట్లను పంచుకుంది.

1. చిన్న ప్లేట్ ఎంచుకోండి:

పెద్ద డిన్నర్ ప్లేట్‌కు బదులుగా చిన్న డిన్నర్ ప్లేట్‌ను ఎంచుకోవడం ఇక్కడ ట్రిక్. ప్లేట్‌లో ఉన్న ఆహారాన్ని పూర్తి చేయడానికి మెదడు అలవాటు పడుతుంది. తద్వారా మీకు అవసరమైనంత తినగలుగుతారు.

2. కావాలంటే ఇంకా తినొచ్చని తెలుసుకోండి:

పరిమితులతో కూడిన ఆలోచనా విధానాన్ని మార్చుకోండి. మనకు కావలసినది లభించదని మనం అనుకున్నప్పుడు, మెదడు మరింత తినడానికి ప్రేరేపిస్తుంది. దానికి బదులుగా, అవసరమైతే మనం ఎప్పుడైనా తిరిగి వచ్చి మరింత తినవచ్చని మనం ఆలోచించాలి.

3. రాత్రి 7 గంటల తర్వాత తినడం మానేయండి:

మీరు చివరి భోజనం ఎప్పుడు చేయాలో రోజుకు ఒక గడువును నిర్ణయించండి. మీరు రాత్రి 7 గంటలలోపు తినడం పూర్తిచేయాలి. కిచెన్ కూడా మూసేయాలి. అలా చేస్తే అర్ధరాత్రి తినాలన్న ఆలోచన లేకుండా తినడాన్ని తగ్గించుకోవచ్చు.

4. రాత్రి భోజనం తర్వాత పళ్ళు తోముకోండి:

రాత్రి భోజనం చేసిన వెంటనే మీ పళ్ళు తోముకోండి. పళ్ళు తోముకున్న తర్వాత తిరిగి ఆహారం తినడానికి మనసొప్పదు.

5. నీటితో ప్రారంభించండి:

కొన్నిసార్లు మీకు దాహం వేస్తుంది. కానీ ఆకలిగా ఉండదు. కాబట్టి, భోజనాన్ని నీటితో ప్రారంభించండి. ఇది అతిగా తినడాన్ని తగ్గించడంలో సహాయపడుతుంది.

6. ఆగి, ఎందుకు అని ప్రశ్నించుకోండి:

మీ కోరికలకు లొంగిపోకుండా, మీకు ఒక నిర్దిష్ట ఆహారం ఎందుకు తినాలనిపిస్తుందో మీరే ప్రశ్నించుకోండి. భావోద్వేగ ఆకలి తక్షణమే అనిపిస్తుంది. శారీరక ఆకలి క్రమంగా పెరుగుతుంది.

7. అపరాధ భావాన్ని ఆపండి:

అప్పుడప్పుడు అందరూ అతిగా తింటారు. ఆ అపరాధ భావం నుండి బయటపడండి. కొన్నిసార్లు అతిగా స్నాక్స్ తినడం సహజమేనని భావించండి.

8. ఎక్కువ మొత్తంలో ఆహారాన్ని భోజనంలో చేర్చండి:

మీ ప్లేట్ పెద్దదిగా కనిపించడానికి, మీకు సంతృప్తిని కలిగించడానికి మీ భోజనంలో తక్కువ కేలరీలు, పోషకాలు నిండిన ఎక్కువ ఆహారాన్ని చేర్చండి.

(గమనిక: ఈ కథనం కేవలం సమాచార ప్రయోజనాల కోసం మాత్రమే. ఇది వృత్తిపరమైన వైద్య సలహాకు ప్రత్యామ్నాయం కాదు. ఏదైనా వైద్య పరిస్థితి గురించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడి సలహా తీసుకోండి.)