మలయాళం థ్రిల్లర్ మూవీ ఆజాదీ (Azadi) గత నెలలో థియేటర్లలో రిలీజైనా ప్రేక్షకుల నుంచి పెద్దగా రెస్పాన్స్ రాలేదు. ఇప్పుడీ మూవీ డిజిటల్ ప్రీమియర్ కు సిద్ధమవుతోంది. హత్య కేసులో ఇరుక్కొని జైలు జీవితం గడుపుతున్న ఓ మహిళ తప్పించుకోవడానికి చేసే ప్రయత్నం చుట్టూ ఈ సినిమా తిరుగుతుంది.

ఆజాదీ ఓటీటీ రిలీజ్ డేట్

మలయాళం థ్రిల్లర్ మూవీ ఆజాదీ మే 23న థియేటర్లలో రిలీజైంది. ఈ సినిమాను జూన్ 27 నుంచి మనోరమ మ్యాక్స్ ఓటీటీ స్ట్రీమింగ్ చేయనుంది. ఈ మూవీ థియేటర్లలో రిలీజ్ కు ముందే డిజిటల్ హక్కులను ఈ ఓటీటీ సొంతం చేసుకుంది.

మలయాళం ఇండస్ట్రీలో ఇలా జరగడం చాలా అరుదు. చాలా వరకు మలయాళం సినిమాలు థియేటర్లలో రిలీజైన తర్వాతే డిజిటల్ పార్ట్‌నర్ ను కన్ఫమ్ చేస్తాయి. కానీ ఆజాదీ మూవీని మనోరమ మ్యాక్స్ ముందే దక్కించుకుంది.

ఆజాదీ మూవీ గురించి..

ఆజాదీ మూవీని జో జార్జ్ డైరెక్ట్ చేశాడు. ఇందులో మంజుమ్మెల్ బాయ్స్ మూవీ హీరో శ్రీనాథ్ భాసితోపాటు వాణీ విశ్వనాథ్, లాల్, సైజు కురుప్, రవీనా రవిలాంటి వాళ్లు నటించారు. ఈ సినిమాను నిజ జీవిత ఘటనల ఆధారంగా తెరకెక్కించారు. ఈ మూవీ కొట్టాయం మెడికల్ కాలేజీలోనే ఎక్కువగా ఉంటుంది. గంగా అనే ఓ మహిళ చుట్టూ తిరిగే కథ. గర్భవతి అయిన ఆమె ఓ రాజకీయ నేత కొడుకు హత్య కేసులో జైలుకు వెళ్తుంది.

అయితే ప్రసవం కోసం ఆమెను హాస్పిటల్లో చేరుస్తారు. అక్కడి నుంచే ఆమెను తప్పించేందుకు భర్త ప్లాన్ చేస్తాడు. అయితే వాళ్ల గతం ఆ ప్లాన్ ను దెబ్బ తీస్తుంది. వాళ్ల ప్రత్యర్థులు ఆ హాస్పిటల్లోకి ప్రవేశిస్తారు. అక్కడి నుంచి వాళ్లు తప్పించుకోవడం కాదు కదా.. తమ ప్రాణాలు కాపాడుకోవడానికే కష్ట పడాల్సి వస్తుంది. మరి ఆ భార్యాభర్తలు అక్కడి నుంచి తప్పించుకుంటారా లేదా అన్నదే ఈ ఆజాదీ మూవీ స్టోరీ.

గత నెలలో టొవినో థామస్ నటించిన నరివెట్టతో కలిసి థియేటర్లలో రిలీజైందీ ఆజాదీ మూవీ. అయితే బాక్సాఫీస్ దగ్గర తీవ్రంగా నిరాశ పరిచింది. దీంతో నెల రోజుల్లోనే ఈ సినిమా ఓటీటీలోకి అడుగుపెట్టబోతోంది.