రష్యా- ఉక్రెయిన్​ యుద్ధం, అమెరికా- చైనా వాణిజ్య అలజడులతో ఉక్కిరిబిక్కిరి అవుతున్న ప్రపంచంపై మరో పిడుగు! ఇరాన్​ రాజధాని టెహ్రాన్​పై వైమానిక దాడులు చేసినట్టు ఇజ్రాయెల్​ ప్రకటించింది. మరీ ముఖ్యంగా ఇరాన్​లోని అణ్వాయుధ స్థావరాలే లక్ష్యంగా ఈ దాడులు చేసినట్టు తేల్చిచెప్పింది. అణు బాంబును ఇరాన్​ తయారు చేయకుండా అడ్డుకోవడానికి ఈ దాడులు చేసినట్టు స్పష్టం చేసింది. ఇరాన్​ కూడా తమపై దాడి చేసే అవకాశం ఉందంటూ.. ఇజ్రాయెల్​లో అత్యవసర పరిస్థితిని ప్రకటించింది.

ఇరాన్​లోని న్యూక్లియర్​ ఎన్​రిచ్​మెంట్​ ప్రోగ్రామ్​పై వైమానికి దాడులు చేసినట్టు ఇజ్రాయెల్​ ప్రధాని బెంజమిన్​ నేతన్యాహు ప్రకటించారు.

“ఇరాన్​ న్యూక్లియర్​ ఎన్​రిచ్​మెంట్​ ప్రోగ్రామ్​ సెంటర్​లో దాడి చేశాను. ఇరాన్​పై మా దాడులు ఎన్ని రోజులు కొనసాగాలో, అన్ని రోజులు కొనసాగుతాయి,” అని నేతన్యాహు తేల్చిచెప్పారు.

అణ్వాయుధాల కోసం సహజ యురేనియంలో యురేనియం-235 ఐసోటోప్ కాన్సట్రేషన్​ని పెంచే ప్రాసెస్​, అది జరిగే ప్రాంతాన్ని న్యూక్లియర్​ ఎన్​రిచ్​మెంట్​ ప్రోగ్రామ్​ అని అంటారు.

వాస్తవానికి ఇలాంటి ప్రోగ్రామ్​ ఒకటి ఇరాన్​లో జరుగుతోందని అమెరికా సహా దాని మిత్రపక్ష దేశాలు చాలా కాలంగా అనుమానిస్తూ వస్తున్నాయి. తాజాగా ఈ ప్రోగ్రామ్​ని టార్గెట్​ చేస్తూ ఇరాన్​పై ఇజ్రాయెల్​ దాడులు చేసింది.

అణ్వాయుధ స్థావరాలతో పాటు ఇరాన్​కి చెందిన మిలిటరీ స్థావరలపైనా ఇజ్రాయెల్​ దాడులు చేసింది.

ఇరాన్​లో భారీ పేలుడు- ఇజ్రాయెల్​ పనే!

శుక్రవారం తెల్లవారుజామున పేలుళ్ల శబ్దాలకు ఇరాన్​లోని టెహ్రాన్ ప్రజలు ఉలిక్కిపడ్డారు. పేలుళ్లు జరిగినట్టు ప్రభుత్వ టెలివిజన్ సైతం అంగీకరించింది. శుక్రవారం దేశంలో పాఠశాలలను మూసివేస్తున్నట్లు కాట్జ్​ తెలిపారు.

“ఇరాన్​పై ఇజ్రాయెల్​ ముందస్తు దాడుల నేపథ్యంలో మనపై మిసైల్ దాడులు లేదా డ్రోన్​ దాడులు జరగొచ్చు,” అని కాట్జ్​ అన్నారు.

తాజా ఉద్రిక్తతల నేపథ్యంలో బెంచ్​మార్క్​ బ్రెంట్ క్రూడ్ 6 శాతానికి పైగా పెరిగింది.

అమెరికా ప్రమేయం ఉందా?

అమెరికా- ఇజ్రాయెల్​ మధ్య అనాదిగా మంచి స్నేహం ఉంది. ఈ నేపథ్యంలో ఇరాన్​పై ఇజ్రాయెల్​ దాడులకు అమెరికా సాయం చేసిందా? అన్న అనుమానాలు మొదలయ్యాయి. ఈ పూర్తి వ్యవహారంపై వైట్​హౌస్​ ఇంకా స్పందించలేదు. అయితే, ఇరాన్​పై ఇజ్రాయెల్​ దాడులతో అమెరికాకు సంబంధం లేదని అగ్రరాజ్య అధికారులు స్పష్టం చేస్తున్నారు.

“ఈ రోజు ఇరాన్​పై ఇజ్రాయెల్​ ఏకపక్ష నిర్ణయంతో దాడులు చేసింది. ఇరాన్​పై దాడులకు మాకు (అమెరికా) ఎలాంటి సంబంధం లేదు. ఆ ప్రాంతంలోని మా సైన్యాన్ని రక్షించుకోవడం ఇప్పుడు మా ప్రధాన లక్ష్యం,” అని అమెరికా విదేశాంగ శాఖ మంత్రిమార్కో రుబియో తెలిపారు.

“ఇంకోసారి స్పష్టంగా చెబుతున్నాను. ఇరాన్​పై ఇజ్రాయెల్​ దాడితో మాకు సంబంధం లేదు. అందుకే, అమెరికాపై, అమెరికా పౌరులను ఇరాన్​ టార్గెట్​ చేయకూడదు,” అని ఆయన స్పష్టం చేశారు.

ఇరాన్​పై ఇజ్రాయెల్​ వైమానిక దాడుల్లో తమ పాత్ర లేదని పేరు చెప్పని ఇద్దరు అమెరికా ఉన్నతాధికారులు సైతం మీడియాకు వెల్లడించారు.

ఇరాన్​పై ఇజ్రాయెల్​ దాడుల కన్నా ముందు, వైట్​హౌస్​లో అమెరికా అధ్యక్షుడు డొనాల్డ్​ ట్రంప్​ కీలక వ్యాఖ్యలు చేశారు. ఇరాన్​- ఇజ్రాయెల్​ మధ్య ఉద్రిక్తతలు పెరిగే అవకాశం ఉందని సంకేతాలిచ్చారు.

“కచ్చితంగా జరుగుతుందని చెప్పను. కానీ ఏదో ఒకటి జరిగే అవకాశం ఉంది (ఇరాన్​పై ఇజ్రాయెల్​ దాడి). కానీ అణ్వాయుధ విషయంలో ఇరాన్​తో చర్చలు బాగా జరుగుతున్నాయి. ఒప్పందానికి దగ్గరగా ఉన్నాము. ఈ సమయంలో ఇరాన్​పై ఇజ్రాయెల్​ దాడి చేస్తే ఒప్పందం కూలిపోవచ్చు. అందుకే వారు గొడవకు దిగకూడదు అనుకుంటున్నాను,” అని ట్రంప్​ అన్నారు.