అంతర్జాతీయ యోగా దినోత్సవం 2025: ప్రాచీన భారతీయ సంప్రదాయం ప్రపంచానికి అందించిన అమూల్యమైన బహుమతి యోగా. ఇది శారీరక ఆరోగ్యానికే కాకుండా, మానసిక శ్రేయస్సుకూ తోడ్పడుతుంది. ప్రతి సంవత్సరం జూన్ 21న యోగా అభ్యాసాన్ని గౌరవించటానికి, దాని ప్రయోజనాలను ప్రపంచవ్యాప్తంగా అందేలా ప్రోత్సహించడానికి అంతర్జాతీయ యోగా దినోత్సవాన్ని జరుపుకుంటారు. ఈ వేడుకలు దగ్గర పడుతున్నందున, ఈ ముఖ్యమైన రోజు గురించి మీరు తెలుసుకోవలసిన వివరాలు ఇక్కడ ఉన్నాయి.

అంతర్జాతీయ యోగా దినోత్సవం 2025: ఈ ఏడాది థీమ్ ఏమిటి?

2025 సంవత్సరానికి అంతర్జాతీయ యోగా దినోత్సవం థీమ్ “యోగా ఫర్ వన్ ఎర్త్, వన్ హెల్త్” (Yoga for One Earth, One Health). ఈ సంవత్సరం ప్రపంచవ్యాప్తంగా జరుపుకునే ఈ వేడుక 11వ వార్షికోత్సవాన్ని సూచిస్తున్నందున, 2025 ఒక ముఖ్యమైన మైలురాయిగా నిలుస్తుంది.

ఈ సంవత్సరం వేడుకల్లో 10 ప్రత్యేక కార్యక్రమాలు ఉన్నాయి. వీటిలో ప్రధానమైనది ‘యోగా సంగం’. ఇది భారతదేశం అంతటా 1,00,000 ప్రాంతాల్లో భారీ యోగా ప్రదర్శనలను నిర్వహిస్తుంది. ఇతర 9 కార్యక్రమాలు యోగా బంధన్, యోగా పార్క్, యోగా సమావేష్, యోగా ప్రభావ, యోగా కనెక్ట్, హరిత్ యోగా, యోగా అన్‌ప్లగ్‌డ్, యోగా మహాకుంభ్, సంయోగ.

అంతర్జాతీయ యోగా దినోత్సవం 2025: జూన్ 21నే ఎందుకు జరుపుకుంటారు?

2014లో ప్రధానమంత్రి నరేంద్ర మోదీ చేసిన కృషి ఫలితంగా, ఐక్యరాజ్యసమితి జనరల్ అసెంబ్లీ జూన్ 21ని అంతర్జాతీయ యోగా దినోత్సవంగా ప్రకటించింది. 2014 డిసెంబర్ 11న ఐక్యరాజ్యసమితి 69వ జనరల్ అసెంబ్లీ సమావేశంలో ఈ తీర్మానాన్ని ఆమోదించింది.

ఆ సమావేశంలో ప్రధాని మోదీ మాట్లాడుతూ, “యోగా మన ప్రాచీన సంప్రదాయం నుండి వచ్చిన ఒక అమూల్యమైన బహుమతి. యోగా మనసు, శరీరం, ఆలోచన, క్రియల ఐక్యతను సూచిస్తుంది. ఇది మన ఆరోగ్యం, శ్రేయస్సుకు విలువైన సంపూర్ణ విధానం. యోగా కేవలం వ్యాయామం మాత్రమే కాదు.. ఇది మీతో, ప్రపంచంతో, ప్రకృతితో ఏకత్వం అనే భావనను కనుగొనే మార్గం” అని అన్నారు.

2015 జూన్ 21న న్యూఢిల్లీలో జరిగిన భారీ కార్యక్రమంలో, మొట్టమొదటి అంతర్జాతీయ యోగా దినోత్సవం రెండు గిన్నిస్ ప్రపంచ రికార్డులను సాధించింది. 35,985 మంది పాల్గొనడంతో అతిపెద్ద యోగా సెషన్, అలాగే ఒకే సెషన్‌లో అత్యధిక దేశాలకు (84) చెందిన వారు పాల్గొనడం.