కేరళ క్రైమ్ ఫైల్స్.. మలయాళంలో రూపొందిన తొలి వెబ్ సిరీస్ ఇది. 2023లో తొలి సీజన్ రాగా.. ఇప్పుడు శుక్రవారం (జూన్ 20) నుంచి జియోహాట్‌స్టార్ ఓటీటీలో రెండో సీజన్ స్ట్రీమింగ్ అవుతోంది. అహ్మద్ కబీర్ డైరెక్ట్ చేసిన ఈ రెండో సీజన్ తొలి సీజన్ కంటే కూడా ఉత్కంఠగా సాగింది. ఓ మ్యూజియంలో చోరీ, కుక్క హత్య చుట్టూ గ్రిప్పింగ్ స్క్రీన్ ప్లేతో సాగే ఈ సిరీస్ ఓ మస్ట్ వాచ్ అని చెప్పొచ్చు.

కేరళ క్రైమ్ ఫైల్స్ సీజన్ 2 స్టోరీ ఏంటంటే?

కేరళ క్రైమ్ ఫైల్స్ సీజన్ 2 మొదట్లో ఓ సింపుల్ మిస్సింగ్ స్టోరీగా మొదలవుతుంది. మాఫియా, అండర్ వరల్డ్ తో కుమ్మక్కయ్యారన్న ఆరోపణలతో మొదట్లోనే కొందరు పోలీస్ అధికారులను బదిలీ చేయడం చూపిస్తారు. అందులో సీపీవో అంబిలి రాజు కూడా ఉంటాడు.

ఆ బదిలీ తర్వాత అంబిలి రాజు కనిపించకుండాపోతాడు. అతన్ని వెతకడం కోసం ఓ పోలీస్ టీమ్ రంగంలోకి దిగుతుంది. కానీ దిగిన తర్వాత ఆ కేసు లోతేంటో తెలుస్తుంది. కేసును దర్యాప్తు చేస్తున్న కొద్దీ ఆ లింకులు ఎక్కడెక్కడికో వెళ్తుంటాయి. ఆ చిక్కుముడులను ఒక్కొక్కటిగా విప్పుతూ పోలీస్ ఇన్వెస్టిగేషన్ సాగుతూ ఉంటుంది.

తొలి ఎపిసోడ్ మొదట్లోనే చూపించే మ్యూజియంలో జరిగే చోరీ, ఓ కుక్క హత్య స్టోరీలో అసలు టర్నింగ్ పాయింట్లుగా ఉంటాయి. అసలు ఆ అంబిలి రాజు ఎక్కడికి వెళ్లాడు? అతనికి ఏమైంది? అసలు అతని మిస్సింగ్ కు మ్యూజియం చోరీ, కుక్క హత్యకు ఉన్న సంబంధం ఏంటి? అన్నది కేరళ క్రైమ్ ఫైల్స్ సీజన్ 2లో చూడాలి.

కేరళ క్రైమ్ ఫైల్స్ సీజన్ 2 ఎందుకు చూడాలంటే?

కేరళ క్రైమ్ ఫైల్స్ ఓ క్రైమ్ థ్రిల్లర్ వెబ్ సిరీస్. ఆ జానర్ కు తగినట్లుగానే డైరెక్టర్ అహ్మద్ కబీర్ ఈ సిరీస్ ను చాలా ఉత్కంఠగా తెరకెక్కించాడు. తొలి సీజన్ మొత్తం ఓ వేశ్య హత్య, ఆ కేసును ఆరు రోజుల్లోనే ఛేదించే పోలీసు ఇన్వెస్టిగేషన్ చుట్టూ తిరగగా.. ఈ రెండో సీజన్ ఓ పోలీసు కనిపించకుండా పోవడం, దాని చుట్టూ దాగి ఉన్న రహస్యాలు, పోలీస్ డిపార్ట్‌మెంట్లో ఉండే లొసుగులు.. వాటికి, మ్యూజియం చోరీ, కుక్క హత్యకు లింకు పెడుతూ సాగుతుంది.

ఓ మిస్సింగ్ కేసు జంట హత్యల కేసుగా ఎలా మారిందన్నది తెరపై చూపించిన విధానం ఆసక్తికరంగా అనిపిస్తుంది. ఆరు ఎపిసోడ్ల సిరీస్ మొత్తం చూసే ప్రేక్షకుల్లో ఓ రకమైన ఆసక్తిని రేపుతూనే ఉంటుంది. సిరీస్ కు ఫైనల్ గా ఇచ్చిన జీవకారుణ్యం అనే టచ్ అసలు ఊహించనిది.

నటన, మ్యూజిక్ కూడా హైలైట్

ఇక ఇందులో లీడ్ రోల్స్ నటన కూడా అద్భుతమనే చెప్పాలి. ఈ రెండో సీజన్ లో ఇన్వెస్టిగేషన్ మొత్తం కొత్తగా వచ్చే ఎస్సై నోబుల్ (అర్జున్ రాధాకృష్ణన్) చూసుకుంటాడు. అతనికితోడు తొలి సీజన్లో ఉన్న సీఐ కురియన్ అవరస్ (లాల్), ఎస్సై మనోజ్ శ్రీధరన్ (అజు వర్గీస్) పాత్రలు కూడా రెండో సీజన్లో కొనసాగాయి. అంబిలి రాజు పాత్రలో ఇంద్రన్స్, అయ్యప్పన్ పాత్రలో హరిశ్రీ అశోకన్ జీవించేశారు.

తెలుగులో విజయ్ దేవరకొండ ఖుషీ మూవీకి మ్యూజిక్ అందించిన హేషమ్ అబ్దుల్ వహాబ్ బీజీఎం కూడా ఈ వెబ్ సిరీస్ కు పెద్ద ప్లస్ పాయింట్ అని చెప్పొచ్చు. మొత్తంగా ఈ కేరళ క్రైమ్ ఫైల్స్ సీజన్ 2 కచ్చితంగా చూడాల్సిన క్రైమ్ థ్రిల్లర్ వెబ్ సిరీస్. సాధారణంగా మలయాళం థ్రిల్లర్స్ లో కనిపించే అన్ని ఎలిమెంట్స్ ఇందులోనూ ఉన్నాయి. ఈ వీకెండ్ జియోహాట్‌స్టార్ లో ఉన్న ఈ కొత్త సీజన్ చూడటానికి ప్లాన్ చేసేయండి.