దేశవ్యాప్తంగా సంచలనం సృష్టించిన పహల్గామ్​ ఉగ్రదాడి కేసులో బిగ్​ అప్డేట్​! ఈ కేసును దర్యాప్తు చేస్తున్న ఎన్​ఐఏ (జాతీయ దర్యాప్తు బృందం).. తాజాగా ఇద్దరిని అరెస్ట్​ చేసింది. పహల్గామ్​ దాడికి పాల్పడిన ఉగ్రవాదులకు ఈ ఇద్దరు ఆశ్రయం కల్పించారు.

ఎన్​ఐఏ అరెస్ట్​ చేసిన ఆ ఇద్దరు ఎవరు?

జమ్ముకశ్మీర్​లోని పహల్గామ్​లో ఏప్రిల్​ 22న ఉగ్రదాడి జరిగిన విషయం తెలిసిందే. కొందరు ఉగ్రవాదులు టూరిస్ట్​లు ఉన్న చోటకు చొరబడి కాల్పులకు తెగించారు. పురుషులను.. వారి మతం అడిగి మరీ కాల్చిచంపారు. మహిళలను విడిచిపెట్టి “వెళ్లి మోదీకి చెప్పు” అని అన్నారు. ఈ ఉగ్రదాడిలో 26మంది అమాయక భారతీయులు ప్రాణాలు కోల్పోయారు.

పహల్గామ్​ ఉగ్రదాడికి ఆపరేషన్​ సిందూర్​తో భారత్​ ప్రతీకారం తీర్చుకుంది. పాకిస్థాన్​, పాక్​ ఆక్రమిత కశ్మీర్​లోని ఉగ్రవాద స్థావరాలను టార్గెట్​ చేసి, ధ్వంసం చేసింది. తదనంతర పరిణామాలతో ఇరు దేశాలు యుద్ధం అంచువరకు వెళ్లాయి. చివరికి, కాల్పుల విరమణ ఒప్పందంతో పరిస్థితులు శాంతించాయి.

కాగా.. ఏప్రిల్​ 22న జరిగిన పహల్గామ్​ ఉగ్రదాడి కేసులో ఎన్​ఐఏ దర్యాప్తు కొనసాగుతోంది. ఈ నేపథ్యంలో ఈ కేసులో తాజాగా బిగ్​ అప్డేట్​ వచ్చింది. పహల్గామ్​లోని బాట్​కోటె, హిల్​ పార్క్​లో నివాసముండే పర్వీజ్​ అహ్మద్​ జాథోర్​, బషీర్​ అహ్మద్​ జాథోర్​లను ఎన్​ఐఏ తాజాగా అరెస్ట్​ చేసింది. వీరిని విచారించగా.. ఉగ్రదాడికి పాల్పడిన టెర్రరిస్ట్​లలో ముగ్గురు పాకిస్థానీలు ఉన్నారని చెప్పినట్టు సమాచారం. అంతేకాదు, ఆ ముగ్గురు కరుడుగట్టిన ఉగ్రవాద సంస్థ లష్కరే తోయిబాకు చెందినవారని వెల్లడించినట్టు తెలుస్తోంది.

వచ్చిన వారు ఉగ్రదాడికి పాల్పడుతున్నారని తెలిసి కూడా పర్వీజ్​, బషీర్​లు వారికి ఆశ్రయం ఇచ్చారు. హిల్​ పార్క్​లోని ఒక స్థావరంలో వారికి ఆహారం, షెల్టర్​, లాజిస్టిక్స్​ని అందించారు. అక్కడి నుంచే ఉగ్రవాదులు పహల్గామ్​కు వెళ్లి మారణకాండకు పాల్పడ్డారు.

యూఏపీఏ చట్టంలోని సెక్షన్​ 19 (ఉగ్రవాదులకు ఆశ్రయం కల్పించడం) కింద ఇద్దరు నిందితులను అరెస్ట్​ చేసినట్టు ఎన్​ఐఏ తెలిపింది. కేసులో దర్యాప్తు కొనసాగుతోందని వెల్లడించింది.

షోపియాన్​, కుల్గామ్​, పుల్వామా, సోపోర్​, కుప్వారా సహా 32 లొకేషన్స్​లో వారాల పాటు ఎన్​ఐఏ దాడులు నిర్వహించిన అనంతరం ఈ అరెస్ట్​లు చేసింది. ఉగ్రవాద సంస్థలకు సాయం చేస్తున్న అండర్​గ్రౌండ్​ వర్కర్లను పట్టుకునేందుకు ఈ దాడులు జరిగాయి.