బీటీఎస్ గ్రూప్ సభ్యుడు సుగా (అసలు పేరు మిన్ యూన్-గి) దక్షిణ కొరియాలోని ఒక ఆటిజం ఆసుపత్రికి 500 కోట్ల వోన్ (దాదాపు $3.6 మిలియన్లు.. భారత కరెన్సీలో సుమారు 31.23 లక్షల రూపాయలు) విరాళంగా ఇచ్చి రికార్డు సృష్టించాడు. సామాజిక సేవ నుంచి తిరిగి వచ్చిన కొన్ని రోజులకే ఆయన ఇంత పెద్ద మొత్తాన్ని విరాళంగా ఇవ్వడం విశేషం. కొరియా జూంగాంగ్ డైలీ పత్రిక ప్రకారం, సెవెరెన్స్ ఆసుపత్రిలో మిన్ యూన్-గి సెంటర్ ఏర్పాటు చేయడానికి సుగా ఈ విరాళం ఇచ్చారు. ఒక కే-పాప్ ఐడల్ ఇంత పెద్ద మొత్తాన్ని ఒకేసారి ఆసుపత్రికి విరాళంగా ఇవ్వడం ఇదే మొదటిసారి.

సుగా మంచి మనసు, సరికొత్త చరిత్ర

ఆటిజంతో బాధపడే పిల్లలు, టీనేజర్లకు సాయం చేయడంలో సుగా చాలా ఆసక్తి చూపారని, ముఖ్యంగా వాళ్లు డిప్రెషన్‌లోకి వెళ్లకుండా చూడటంలో, సంగీతం ఎలా ఉపయోగపడుతుందనే దానిపై ఆయనకు ప్రత్యేక శ్రద్ధ ఉందని సెవెరెన్స్ ఆసుపత్రి చెప్పినట్లు కొరియా జూంగాంగ్ డైలీ రాసింది.

ఆసుపత్రి వర్గాల ప్రకారం, సుగా తన సామాజిక సేవ నుంచి సెలవులో ఉన్నప్పుడు, ఈ సంవత్సరం మార్చి నుంచి జూన్ వరకు వీకెండ్లలో క్లాసులకు వెళ్లి, మ్యూజిక్ థెరపీ ప్రోగ్రామ్‌ను తయారు చేయడంలో కూడా పాల్గొన్నారు.

ఆటిజం బాధితుల సెంటర్ గురించి సుగా ఏమన్నారంటే..

“ప్రొఫెసర్ చెయోన్ క్యూన్-ఆతో కలిసి ఈ ప్రోగ్రామ్‌ను సిద్ధం చేస్తున్నప్పుడు, స్వచ్ఛంద సేవ చేస్తుండగా సంగీతం కమ్యూనికేషన్ తమను తాము వ్యక్తపరచుకోవడానికి ఎలా ఉపయోగపడుతుందో నాకు తెలిసింది. ఆటిజంతో బాధపడే పిల్లలకు సాయం చేసే ఈ ప్రయాణంలో భాగం కావడం నాకు చాలా సంతోషంగా, గౌరవంగా ఉంది” అని సుగా చెప్పినట్లు ఆ రిపోర్ట్ పేర్కొంది.

మిన్ యూన్-గి సెంటర్ వివరాలు

మిన్ యూన్-గి సెంటర్ అనేది MIND (మ్యూజిక్, ఇంటరాక్షన్, నెట్‌వర్క్, డైవర్సిటీ) అనే ప్రోగ్రామ్‌కు మద్దతు ఇస్తుంది. ఇది ఆటిజం ఉన్న వ్యక్తులకు భాష, మానసిక, ప్రవర్తనా మద్దతు, థెరపీ, ఇంకా రకరకాల ప్రోగ్రామ్‌లను అందిస్తుంది. బీటీఎస్ రాపర్ ఈ నిధులను పదేళ్లకు పైగా కొనసాగే చికిత్సా కార్యక్రమాల కోసం విరాళంగా ఇచ్చారు. ఈ మిన్ యూన్-గి సెంటర్ సెవెరెన్స్ ఆసుపత్రిలోని షిన్‌చోన్ బ్రాంచ్‌లో ఉంటుంది. ఈ సంవత్సరం సెప్టెంబర్‌లో ఇది పూర్తవుతుందని అంచనా వేస్తున్నారు.

సుగా గురించి..

2023 డిసెంబర్‌లో సామాజిక సేవలో చేరిన సుగా, గత వారం తన సేవను అధికారికంగా పూర్తి చేసుకున్నారు. తిరిగి వచ్చిన వెంటనే, ఆయన వీవర్స్‌లో అభిమానుల కోసం ఓ పెద్ద నోట్ రాశారు. “గత 2 సంవత్సరాలు నేను నా గురించి చాలా లోతుగా ఆలోచించాను. అలాగే, నేను చాలా కాలంగా చేస్తున్న పని నుండి కొంచెం దూరంగా ఉండాల్సిన అవసరం ఉందని కూడా నాకు అనిపించింది.” అని పేర్కొన్నారు.