వయసు పెరుగుతున్న కొద్దీ మెదడు సమాచారాన్ని గ్రహించే వేగం సహజంగా తగ్గుతుంది. ఒత్తిడి పెరగడం, కార్టిసాల్ హార్మోన్ స్థాయిలు పెరగడం వల్ల నిర్ణయాలు తీసుకోవడం, విషయాలు గుర్తుంచుకోవడం కష్టమవుతుంది. అందుకే వయసు మీద పడే కొద్దీ మెదడు, శరీరం ఆరోగ్యంగా ఉండేందుకు కొన్ని మంచి అలవాట్లను చేసుకోవడం చాలా ముఖ్యం. హెచ్‌టీ లైఫ్‌స్టైల్‌కు ఇచ్చిన ఇంటర్వ్యూలో వెల్‌నెస్ కోచ్ అంకితా కౌల్ ఈ విషయాలు చెప్పారు.

“ఒత్తిడి పెరుగుతుంది, నిద్ర సరిగా పట్టదు, బాధ్యతలు ఎక్కువవుతాయి. కార్టిసాల్ అనే ఒత్తిడి హార్మోన్ ఎక్కువ కాలం శరీరంలో ఉండిపోతే అది జ్ఞాపకశక్తి, నిర్ణయాలు తీసుకునే సామర్థ్యాన్ని దెబ్బతీస్తుంది. నిజం చెప్పాలంటే, ఇది మెదడు పనితీరు తగ్గడం కాదు, మెదడు ఆరోగ్యానికి మనం మరింత శ్రద్ధ పెట్టాలని చెప్పే ఒక సంకేతం” అని ఆమె అన్నారు.

మెదడు పనితీరును మెరుగుపరిచే 5 అలవాట్లను అంకితా కౌల్ పంచుకున్నారు.

1. రోజూ ధ్యానం, పుస్తకాలు చదవడం:

నెమ్మదిగా శ్వాస తీసుకోవడం, ధ్యానం చేయడం, పుస్తకాలు లేదా వ్యాసాలు చదవడం వంటివి ఒత్తిడి హార్మోన్లను తగ్గిస్తాయి. నాడీ వ్యవస్థను ప్రశాంతపరుస్తాయి, ఏకాగ్రతను పెంచుతాయి.

2. మంచి నిద్రకు ప్రాధాన్యత ఇవ్వండి:

నిద్ర అనేది మెదడుకు ఒక రకంగా ‘రిపేర్’ లాంటిది. నిద్రపోయేటప్పుడు మెదడు జ్ఞాపకశక్తిని పటిష్టం చేస్తుంది, విష పదార్థాలను బయటకు పంపుతుంది. అలాగే ఏకాగ్రత, నిర్ణయాలు తీసుకునే సామర్థ్యాన్ని తిరిగి పెంచుకుంటుంది.

3. శరీరాన్ని కదిలించండి (వ్యా‌యామం చేయండి):

క్రమం తప్పకుండా వ్యాయామం చేస్తే మెదడుకు రక్త ప్రవాహం పెరుగుతుంది. ఇది BDNF అనే ప్రోటీన్‌ను పెంచుతుంది. ఈ ప్రోటీన్ నేర్చుకునే సామర్థ్యాన్ని, జ్ఞాపకశక్తిని, మెదడు చురుకుదనాన్ని మెరుగుపరుస్తుంది.

4. మెదడుకు సరైన ఆహారం పెట్టండి:

వాల్‌నట్స్, బెర్రీలు, డార్క్ చాక్లెట్, ఆకుకూరలు, ఒమేగా-3 ఎక్కువగా ఉండే గింజలు (seeds) వంటి మెదడుకు శక్తినిచ్చే ఆహారాలు తినండి. మీరు ఏం తింటారు అనేది మీరు ఎలా ఆలోచిస్తారు, ఎలా ఉంటారు అనేదానిపై నేరుగా ప్రభావం చూపుతుంది.

5. అంగీకారం (Acceptance):

మన జీవితం ఒకలా ఉండాలని మనం అనుకుంటాం. కానీ అది అలా జరగకపోవచ్చు. అలా జరగలేదని రోజూ బాధపడుతూ మనల్ని మనం మానసికంగా బాధపెట్టుకోకూడదు. జీవితం మనకి ఏమి ఇచ్చిందో అంగీకరించి, మన చుట్టూ ఉన్న వనరులను సద్వినియోగం చేసుకోవాలి.

“మీ మనస్సు గురించి మరింత శ్రద్ధ వహించండి. ఎందుకంటే మీ మెదడుకు మీరు చేయగలిగే అత్యంత తెలివైన పని ఏమిటంటే, దానికి రోజూ నిజంగా అవసరమైన వాటిని అందించడం. మీ మనస్సు మిమ్మల్ని నియంత్రించకుండా, మీరు మీ మనస్సును నియంత్రించడం గుర్తుంచుకోండి” అని వెల్‌నెస్ కోచ్ చెప్పారు.

(గమనిక: ఈ వ్యాసం కేవలం సమాచారం కోసం మాత్రమే. ఇది వైద్య నిపుణుల సలహాకు బదులు కాదు. ఏదైనా ఆరోగ్య సమస్య ఉంటే ఎల్లప్పుడూ మీ డాక్టర్‌ను సంప్రదించండి.)