పాకిస్థాన్ లోని ఖైబర్ పఖ్తుంఖ్వా ప్రావిన్స్ లోని ఉత్తర వజీరిస్థాన్ జిల్లాలో సైనిక కాన్వాయ్ పై ఆత్మాహుతి బాంబర్ పేలుడు పదార్థాలతో కూడిన వాహనంతో దూసుకెళ్లడంతో 13 మంది సైనికులు మృతి చెందారు. 10 మంది సైనికులు, 19 మంది పౌరులు గాయపడ్డారు. ‘ఆత్మాహుతి బాంబర్ పేలుడు పదార్థాలతో నిండిన వాహనంతో పాకిస్తాన్ మిలటరీ కాన్వాయ్ లోకి దూసుకెళ్లాడు. ఈ పేలుడులో 13 మంది సైనికులు మరణించగా, 10 మంది సైనికులు, 19 మంది పౌరులు గాయపడ్డారు’ అని పాక్ ఆర్మీ అధికారి విలేకరులకు తెలిపారు.

భారీ పేలుడు; ఎగిరిపోయిన ఇళ్ల పై కప్పులు

పేలుడు ధాటికి సమీపంలోని ఇళ్లు కూడా ధ్వంసమయ్యాయి. పేలుడు ధాటికి రెండు ఇళ్ల పైకప్పులు కూలాయని, ఆరుగురు చిన్నారులు గాయపడ్డారని ఖైబర్ పఖ్తుంఖ్వాలో విధులు నిర్వహిస్తున్న ఓ పోలీసు అధికారి తెలిపారు. ఈ ఘటనకు తామే బాధ్యులమని ఇప్పటి వరకు ఏ ఉగ్రవాద సంస్థ ప్రకటించకపోయినప్పటికీ ఈ ప్రాంతంలో తెహ్రిక్-ఇ-తాలిబన్ పాకిస్థాన్ (టీటీపీ) తరచూ దాడులు చేస్తుంటుంది. పాకిస్థాన్ అంతటా, ముఖ్యంగా ఖైబర్ పఖ్తుంఖ్వా, బలూచిస్తాన్ ప్రాంతాల్లో మిలిటెంట్ల దాడులు పెరుగుతున్న నేపథ్యంలో తాజా ఆత్మాహుతి దాడి జరగడం గమనార్హం.

గతంలో కూడా పలు దాడులు

ఈ ఏడాది మార్చిలో 10 మంది టీటీపీ మిలిటెంట్లను హతమార్చినట్లు పాకిస్తాన్ సైన్యం ప్రకటించింది. వారు దక్షిణ వజీరిస్థాన్ లోని జండోలా చెక్ పోస్టు సమీపంలోని ఫ్రాంటియర్ కార్ప్స్ క్యాంప్ ను లక్ష్యంగా చేసుకుని ఆత్మాహుతి దాడికి పాల్పడిన సమయంలో ఎదురు కాల్పుల్లో వారిని హతమార్చామని వెల్లడించింది. అలాగే మార్చిలో నెలలో బలూచ్ లిబరేషన్ ఆర్మీ (BLA)కి చెందిన మిలిటెంట్లు గుడాలార్ మరియు పిరు కున్రి సమీపంలో జాఫర్ ఎక్స్‌ప్రెస్ ప్యాసింజర్ రైలుపై దాడి చేసి 21 మంది ప్రయాణికులు మరియు నలుగురు పారామిలిటరీ సైనికులను చంపారు.

గ్లోబల్ టెర్రరిజం ఇండెక్స్ 2025

గ్లోబల్ టెర్రరిజం ఇండెక్స్ 2025 ప్రకారం, పాకిస్తాన్ ఉగ్రవాద సంబంధిత మరణాలలో 2024 లో 45% పెరుగుదలను నమోదు చేసింది. ఇది 2023 లో 748 నుండి 2024లో 1,081 కి పెరిగింది. పాకిస్తాన్ ఉగ్రవాద మరణాల పరంగా ప్రపంచవ్యాప్తంగా రెండవ స్థానంలో ఉంది.