2019-2024 మధ్య వైఎస్సార్‌సీపీ ప్రభుత్వ హయాంలో మద్యం కుంభకోణం ద్వారా నెలకు రూ. 50-60 కోట్ల మేర ముడుపులు అందుకున్న వారిలో జగన్ మోహన్ రెడ్డి పేరు కూడా ఉన్నట్లు ఆంధ్రప్రదేశ్ పోలీసులు దాఖలు చేసిన 305 పేజీల ఛార్జిషీట్‌లో పేర్కొన్నారు. ఈ మొత్తం అప్పటి సీఎంకు చేరిందని ఛార్జిషీట్ వెల్లడించినట్లు పి.టి.ఐ. వార్తా సంస్థ తెలిపింది. అయితే, స్థానిక కోర్టు ఇంకా ఈ పత్రాన్ని పరిగణనలోకి తీసుకోలేదని కూడా ఆ నివేదిక స్పష్టం చేసింది.

ఛార్జిషీట్ ప్రకారం, “వసూలు చేసిన మొత్తాలను కేశిరెడ్డి రాజశేఖర్ రెడ్డి (A-1)కి అప్పగించారు. రాజశేఖర్ రెడ్డి ఆ డబ్బును విజయసాయి రెడ్డి (A-5), మిథున్ రెడ్డి (A-4), బాలాజీ (A-33)లకు అందజేసేవారు. వారు ఆ మొత్తాన్ని అప్పటి ముఖ్యమంత్రి వై.ఎస్. జగన్ మోహన్ రెడ్డికి బదిలీ చేసేవారు. సగటున, ప్రతి నెలా రూ. 50-60 కోట్లు (2019-2024 వైఎస్సార్‌సీపీ ప్రభుత్వ హయాంలో) వసూలయ్యాయి..” అని ఒక సాక్షి వాంగ్మూలాన్ని ఉటంకిస్తూ నివేదిక పేర్కొంది. ఐదేళ్లలో దాదాపు రూ. 3,500 కోట్ల కుంభకోణానికి పాల్పడ్డారని ఛార్జిషీట్ ప్రస్తావించినట్టు సమాచారం.

‘సూత్రధారి’ రాజశేఖర్ రెడ్డి – ముడుపుల మళ్లింపు

ఛార్జిషీట్ ప్రకారం, ఈ కుంభకోణంలో కేశిరెడ్డి రాజశేఖర్ రెడ్డిని “సూత్రధారి, సహ-కుట్రదారుడు”గా గుర్తించారు. ఎక్సైజ్ విధానాన్ని తారుమారు చేయడం, ఆటోమేటెడ్ ‘ఆర్డర్ ఫర్ సప్లై’ (OFS) వ్యవస్థలకు బదులుగా మ్యాన్యువల్ వ్యవస్థలను ప్రవేశపెట్టడం, ఆంధ్రప్రదేశ్ స్టేట్ బెవరేజెస్ కార్పొరేషన్ లిమిటెడ్ (APSBCL)లో తనకు నమ్మకస్తులైన అధికారులను నియమించడం వంటి ఆరోపణలు ఆయనపై ఉన్నాయి. ముడుపులను జగన్‌కు చేరవేయడానికి రాజశేఖర్ రెడ్డి షెల్ డిస్టిలరీలను ఉపయోగించారని ఈ పత్రం ఆరోపిస్తోంది.

పోలీసుల ఆరోపణల ప్రకారం, కేశిరెడ్డి రాజశేఖర్ రెడ్డి మాజీ ఎమ్మెల్యే చెవిరెడ్డి భాస్కర్ రెడ్డితో కలిసి వైఎస్సార్‌సీపీ ఎన్నికల ప్రచారానికి నిధులు సమకూర్చడానికి రూ. 250-300 కోట్ల నగదును వినియోగించినట్టు గుర్తించారు.

మద్యం పంపిణీపై పూర్తి నియంత్రణ సాధించేలా మద్యం పాలసీ రూపొందించారని, తద్వారా నిందితులు భారీ కమీషన్లు పొందడానికి వీలు కల్పించారని ఛార్జిషీట్ పేర్కొంది. “నిందితులు ఎక్సైజ్ పాలసీ మార్పును, దాని విధానాలను ప్లాన్ చేశారు. ముడుపులలో ఎక్కువ భాగం నగదు, బంగారం స్వీకరించారు” అని ఛార్జిషీట్ వెల్లడించింది.

ముడుపులు ఇవ్వడానికి నిరాకరించిన డిస్టిలరీలకు OFS ఆమోదాలను నిలిపివేశారని అభియోగాలు ఉన్నాయి. మొదట్లో బేస్ ధరలో 12 శాతం ముడుపులు ప్రారంభమై, తర్వాత 20 శాతానికి పెరిగాయని ఛార్జిషీట్‌లో పేర్కొన్నారు.

మిథున్ రెడ్డి అరెస్ట్, రాజకీయ దుమారం

శనివారం వైఎస్సార్‌సీపీ ఎంపీ పి.వి. మిథున్ రెడ్డిని ప్రత్యేక దర్యాప్తు బృందం (SIT) గంటల తరబడి విచారించి అనంతరం అరెస్టు చేసింది. గత మేలో ఎన్‌ఫోర్స్‌మెంట్ డైరెక్టరేట్ (ED) కూడా ఈ కేసులో మనీలాండరింగ్ నిరోధక చట్టం (PMLA) కింద దర్యాప్తును ప్రారంభించింది.

2019లో హైదరాబాద్‌లోని పార్క్ హయత్ హోటల్‌లో జరిగిన ఒక సమావేశం గురించి కూడా ఛార్జిషీట్‌లో ప్రస్తావించారు. సజ్జల శ్రీధర్ రెడ్డి (A-6) ఈ సమావేశాన్ని నిర్వహించినట్లు ఆరోపణలున్నాయి. ఈ సమావేశంలో డిస్టిలరీ యజమానులను మ్యాన్యువల్ OFS వ్యవస్థకు సహకరించాలని ఆదేశించినట్లు పేర్కొన్నారు.

“సమావేశంలో, యజమానులు తమ ప్రతిపాదనలకు అంగీకరించకపోతే వారికి ఎటువంటి ఆర్డర్లు ఇవ్వబోమని బెదిరించారు. OFS జారీ చేయకుండా బెదిరించి, తద్వారా ముడుపులు స్వీకరించడం అనేది బలవంతపు వసూళ్లకు సమానం” అని ఛార్జిషీట్ పేర్కొంది.

కాగా, మిథున్ రెడ్డి అరెస్ట్‌ను పలువురు వైఎస్సార్‌సీపీ నాయకులు తీవ్రంగా ఖండించారు. ఇది రాజకీయ ప్రేరేపిత చర్య అని ఆరోపించారు. మాజీ మంత్రులు బొత్స సత్యనారాయణ, పేర్ని వెంకట్రామయ్య (నాని), అంబటి రాంబాబు, మెరుగు నాగార్జున, పార్టీ ప్రధాన కార్యదర్శి జి. శ్రీకాంత్ రెడ్డి ఒక ప్రకటనలో ముఖ్యమంత్రి ఎన్. చంద్రబాబు నాయుడు రాష్ట్ర యంత్రాంగాన్ని ఉపయోగించి ప్రతిపక్ష నాయకులను లక్ష్యంగా చేసుకుంటున్నారని ఆరోపించారు.