సంపన్న దేశాల్లో ప్రజలు వ్యాయామం ఎక్కువగా చేస్తున్నా, ఎక్కువ కేలరీలు ఖర్చు చేస్తున్నా.. స్థూలకాయం (obesity) మాత్రం పెరుగుతోంది. ఇది నిజంగా విచిత్రమైన పరిస్థితి. ఇంతకీ దీనికి కారణం ఏంటి? ఎక్కువ కష్టపడుతున్నా, ఎక్కువ శక్తిని ఖర్చు చేస్తున్నా బరువు ఎందుకు పెరుగుతున్నారు? దీనికి సమాధానం వారి వ్యాయామంలో కాదు.. వారి ఆహారపు అలవాట్లలోనే ఉంది అంటున్నారు నిపుణులు.

ఎక్కువ కేలరీలు ఖర్చవుతున్నా బరువు పెరుగుదల

సాధారణంగా స్థూలకాయానికి శారీరక శ్రమ లేకపోవడం ప్రధాన కారణం అని చాలామంది నమ్ముతారు. అయితే, డ్యూక్ యూనివర్సిటీ మార్చి 31న ఆవిష్కరించిన ఒక అధ్యయనం ఈ నమ్మకాన్ని సవాల్ చేస్తోంది. ఈ అధ్యయనం కోసం 34 ప్రాంతాల్లోని 4,200 మందికి పైగా ప్రజలను పరిశీలించారు. ఆశ్చర్యకరంగా, అభివృద్ధి చెందిన దేశాల్లోని ప్రజలు సాంప్రదాయ సమాజాల్లోని ప్రజల కంటే రోజుకు ఎక్కువ కేలరీలను ఖర్చు చేస్తున్నారని తేలింది. అయినా కూడా, వారి శరీరంలో ఎక్కువ కొవ్వు ఉందని నివేదించారు.

‘ప్రొసీడింగ్స్ ఆఫ్ ది నేషనల్ అకాడమీ ఆఫ్ సైన్సెస్’లో ప్రచురితమైన ఈ అధ్యయనం, వాస్తవ ప్రపంచంలో శక్తి వ్యయాన్ని కొలవడానికి అధునాతన ‘డబుల్లీ లేబుల్డ్ వాటర్’ పద్ధతిని ఉపయోగించింది. శరీర పరిమాణాన్ని పరిగణనలోకి తీసుకున్నాక కూడా, సంపన్న దేశాల ప్రజలు సుమారు 6 శాతం ఎక్కువ కేలరీలను ఖర్చు చేస్తున్నారని కనుగొన్నారు. విస్తుపోయే విషయం ఏమిటంటే, వారి శారీరక శ్రమ స్థాయిలు అభివృద్ధి చెందుతున్న దేశాల ప్రజల మాదిరిగానే ఉన్నాయి.

స్థూలకాయ సంక్షోభంలో ఆహారం పాత్రే ఎందుకు ముఖ్యం?

మరి ఇంత శ్రమించినా బరువు ఎందుకు పెరుగుతున్నారు? ఇక్కడే అసలు విషయం ఉంది. దీనికి ప్రధాన కారణం వ్యాయామం కాదు, ఆహారపు అలవాట్లే. ఆహార డేటా అందుబాటులో ఉన్న ప్రాంతాల్లో పరిశోధకులు ఒక స్పష్టమైన సంబంధాన్ని కనుగొన్నారు. చక్కెర పానీయాలు, ప్యాకేజ్ చేసిన స్నాక్స్, రెడీమేడ్ భోజనాలు వంటి అల్ట్రా-ప్రాసెస్డ్ ఆహారాల అధిక వినియోగం, శరీరంలో ఎక్కువ కొవ్వు పేరుకుపోవడానికి దారితీస్తోందని తేలింది.

ఈ రకమైన ఆహారాలు సులభంగా జీర్ణం అవుతాయి. అంటే, శరీరం వీటి నుంచి ఎక్కువ కేలరీలను గ్రహిస్తుంది. అంతేకాదు, ఇవి ఆకలి సంకేతాలను దెబ్బతీసి, అవసరానికి మించి తినడానికి దారితీయవచ్చు. సంపన్న దేశాల ప్రజలు ఎక్కువ కేలరీలు ఖర్చు చేస్తున్నప్పటికీ, వారు అదే స్థాయిలో ఎక్కువ ఆహారాన్ని, ముఖ్యంగా కొవ్వు నిల్వను ప్రోత్సహించే అల్ట్రా-ప్రాసెస్డ్ ఆహారాలను తింటున్నారు. దీని ఫలితమే, శారీరక శ్రమ స్థాయిలు ఒకే విధంగా ఉన్నప్పటికీ, నడుము చుట్టుకొలత పెరుగుతోంది.

ఈ అధ్యయనం స్థూలకాయాన్ని ఎదుర్కోవడానికి కేవలం వ్యాయామాన్ని ప్రోత్సహించడం కాకుండా, ఆహార నాణ్యతపై దృష్టి సారించడం అవసరమని నొక్కి చెబుతోంది. స్థూలకాయం పెరగడానికి ప్రజలు ఎంత కదులుతున్నారు అనేది కాదని, వారు ఏమి తింటున్నారు అనేదే ప్రధాన కారణమని పరిశోధకులు సూచించారు. దీర్ఘకాలిక పరిష్కారాల కోసం, ఆరోగ్యకరమైన, తక్కువ ప్రాసెస్ చేసిన ఆహారాలను సులభంగా అందుబాటులోకి తీసుకురావడం “తక్కువ తినండి, ఎక్కువ కదలండి” అని చెప్పడం కంటే చాలా ప్రభావవంతంగా ఉంటుందని వారు సూచిస్తున్నారు.

(పాఠకులకు గమనిక: ఈ వ్యాసం కేవలం సమాచార ప్రయోజనాల కోసం మాత్రమే. ఇది వృత్తిపరమైన వైద్య సలహాకు ప్రత్యామ్నాయం కాదు. ఏదైనా వైద్య పరిస్థితి గురించి మీకు ఏవైనా ప్రశ్నలు ఉంటే ఎల్లప్పుడూ మీ వైద్యుడిని సంప్రదించండి.)