వైసీపీ ఎంపీ మిథున్ రెడ్డి జైలులో ఉన్నప్పుడు ప్రత్యేక సౌకర్యాలు కల్పించారని దాఖలైన పిటిషన్‌పై విజయవాడ ఏసీబీ కోర్టు విచారణలను ముగించింది. విచారణ సందర్భంగా ఎంపీకి కల్పించే సౌకర్యాల గురించి కోర్టు జైళ్ల శాఖ అధికారులను ప్రశ్నించింది. అవసరమైన నిబంధనలు పాటిస్తున్నామని అంగీకరిస్తూ అధికారులు సానుకూలంగా స్పందించారు.

మిథున్ రెడ్డి పిటిషన్లపై అభ్యంతరాలుంటే నేరుగా కోర్టుకు హాజరై చెప్పాలని రాజమహేంద్రవరం కేంద్ర కారాగారం సూపరింటెండెంట్‌ను కోర్టు ఆదేశించింది. దీంతో అధికారి కోర్టుకు హాజరు అయ్యారు. సుప్రీం కోర్టు నిబంధనలకు అనుగుణంగా అన్ని సౌకర్యాలు కల్పిస్తామని చెప్పారు. అయితే ఇంటి నుంచి ఆహారం అనుమతించాలంటే అండర్ టేకింగ్ లెటర్ అవసరమని చెప్పారు.

ఎంపీ మిథన్ రెడ్డి తన పిటిషన్ ద్వారా అనేక సౌకర్యాలను అభ్యర్థించారు. టీవీ, మంచం, వెస్ట్రన్ కమోడ్, ఇంటి నుండి రోజుకు మూడుపూటల భోజనం, సోఫా, దోమతెర, యోగా మ్యాట్, వాకింగ్ షూస్, వార్తాపత్రికలు, అలాగే వారానికి ఐదు రోజులు సూపర్‌వైజర్, ఇద్దరు న్యాయవాదులతో ప్రైవేట్ సమావేశాలు నిర్వహించే అవకాశాన్ని కల్పించాలని కోరారు. అంతేకాకుండా నోట్‌బుక్‌లు, పెన్నులు ఇప్పించాలని విజయవాడ ఏసీబీ కోర్టులో రెండు వేర్వేరు పిటిషన్లు దాఖలు చేశారు.