ఆధునిక పని సంస్కృతి… మన కాలేయాన్ని (లివర్‌ను) నిశ్శబ్దంగా దెబ్బతీస్తోందట. అవును, వినడానికి ఆశ్చర్యంగా ఉన్నా ఇది నిజం. ఆధునిక కార్యాలయాల్లో పెరిగిపోతున్న ఒత్తిడి, ఎక్కువసేపు కూర్చోవడం, సరిగ్గా లేని అలవాట్లు… ఇవన్నీ కాలేయ సమస్యలను ఎలా పెంచుతున్నాయో ప్రముఖ గ్యాస్ట్రోఎంటరాలజిస్ట్ వివరించారు.

ఈ రోజుల్లో వేగంగా దూసుకుపోతున్న ఉద్యోగ ప్రపంచంలో, ఆధునిక పని సంస్కృతి మన కాలేయ ఆరోగ్యంపై చాలా మంది ఊహించని విధంగా ప్రభావం చూపుతోంది. గంటల తరబడి డెస్క్ ముందు కూర్చోవడం, తీవ్రమైన ఒత్తిడి, సమయానికి తినకపోవడం, శారీరక శ్రమ లేకపోవడం… ఇవన్నీ నిశ్శబ్దంగా ‘నాన్-ఆల్కహాలిక్ ఫ్యాటీ లివర్ డిసీజ్ (NAFLD)’ పెరగడానికి కారణమవుతున్నాయి. ఇప్పుడు ఇది ప్రపంచవ్యాప్తంగా అత్యంత సాధారణ కాలేయ వ్యాధులలో ఒకటిగా మారింది.

జీవనశైలి అలవాట్లు కాలేయాన్ని ఎలా పాడుచేస్తాయి?

పుణెలోని రూబీ హాల్ క్లినిక్ లో సర్జికల్ గ్యాస్ట్రోఎంటరాలజిస్ట్, జీఐ ఎండోస్కోపిస్ట్ అయిన డాక్టర్ నరేంద్ర చోప్డే, HT లైఫ్‌స్టైల్‌కు ఇచ్చిన ఇంటర్వ్యూలో కీలక విషయాలు వెల్లడించారు.

“ఒక చోట ఎక్కువసేపు కూర్చుండిపోయే జీవనశైలి, ముఖ్యంగా కార్పొరేట్ ఉద్యోగాలలో, అలాగే ఇంటి నుంచి పనిచేసే వారికి పెద్ద ప్రమాదకరమైన అంశం” అని ఆయన వివరించారు. “గంటల తరబడి కూర్చోవడం వల్ల జీవక్రియ మందగిస్తుంది. కాలేయంలో కొవ్వు పేరుకుపోతుంది. మామూలు బరువు ఉన్నవారికి కూడా ఇదే జరుగుతుంది.” అని హెచ్చరించారు.

“ఈ పరిస్థితిని ‘లీన్ ఎన్‌ఏఎఫ్‌ఎల్‌డీ’ (Lean NAFLD) అంటారు. బయట చూడటానికి ఆరోగ్యంగా కనిపించినా, లోపల జీవక్రియ పరంగా ప్రమాదంలో ఉన్న పట్టణ నిపుణులలో ఇది పెరుగుతోంది” అని ఆయన వివరించారు. “సమయానికి తినకపోవడం, ప్యాక్ చేసిన ఆహారాలు, తరచుగా బయటి ఫుడ్ తినడం, చక్కెర పానీయాలు, భోజనం దాటవేయడం వంటి అలవాట్లు కాలేయంపై మరింత ఒత్తిడిని పెంచుతాయి. దీనికితోడు, పని వల్ల కలిగే అధిక ఒత్తిడి హార్మోన్ల సమతుల్యతను దెబ్బతీస్తుంది. ఇన్సులిన్ సున్నితత్వాన్ని తగ్గిస్తుంది. కాలేయ కణాలలో కొవ్వు పేరుకుపోవడానికి దోహదపడుతుంది. కాలక్రమేణా, ఇది మంటకు (ఇన్‌ఫ్లమేషన్), ఫైబ్రోసిస్‌కు, చివరకు సిర్రోసిస్‌కు కూడా దారితీయవచ్చు” అని ఆయన హెచ్చరించారు.

ముందస్తు గుర్తింపు, నివారణ ఎందుకు ముఖ్యం?

“క్రమరహిత నిద్ర, తరచుగా నొప్పి నివారణ మందులు, యాంటాసిడ్‌లు వంటి ఓవర్-ది-కౌంటర్ మందుల వాడకం కాలేయ పనితీరుపై మరింత భారాన్ని పెంచుతాయి” అని డాక్టర్ నరేంద్ర చోప్డే వివరించారు.

“కాలేయ సంబంధిత సమస్యల విషయంలో అసలు సవాల్ ఏమిటంటే, అవి తరచుగా నిశ్శబ్దంగానే పెరుగుతాయి. చాలా మందికి నష్టం ముదిరే వరకు అసలు తెలియదు..” అని ఆయన అన్నారు. “అందుకే, లివర్ ఫంక్షన్ టెస్ట్‌లు, ఫైబ్రోస్కాన్ వంటి సాధనాల ద్వారా నిరంతర స్క్రీనింగ్, ముందస్తు గుర్తింపు చాలా ముఖ్యమైనవి.” అని సూచించారు.

కాలేయ ఆరోగ్యాన్ని కాపాడుకోవడానికి కొన్ని జాగ్రత్తలను పాటించాలని డాక్టర్ చోప్డే సిఫార్సు చేస్తున్నారు. “క్రమం తప్పకుండా శారీరక శ్రమ చేయడం, ఆహారంపై శ్రద్ధ పెట్టడం, ఒత్తిడిని తగ్గించుకోవడం, సరిపడా నిద్రపోవడం, కాలానుగుణంగా వైద్య పరీక్షలు చేయించుకోవడం వల్ల కాలేయ ఆరోగ్యాన్ని బాగా కాపాడుకోవచ్చు. మన పని సంస్కృతి మారుతున్న కొద్దీ, మన వ్యక్తిగత ఆరోగ్య విధానాలు కూడా మారాలి. ఆధునిక పని ప్రపంచంలో కాలేయ ఆరోగ్యం ఒక ముఖ్యమైన ప్రాధాన్యత.” అని వివరించారు.

(గమనిక: ఈ వ్యాసం కేవలం సమాచార ప్రయోజనాల కోసం మాత్రమే. ఇది వృత్తిపరమైన వైద్య సలహాకు ప్రత్యామ్నాయం కాదు. ఏదైనా ఆరోగ్య పరిస్థితి గురించి మీకు ఏవైనా ప్రశ్నలు ఉంటే, ఎల్లప్పుడూ మీ డాక్టర్‌ను సంప్రదించండి.)