ప్రపంచవ్యాప్తంగా ఎంతో మంది ఎదురు చూస్తున్న నెట్‌ఫ్లిక్స్ పాపులర్ సిరీస్ ‘స్క్విడ్ గేమ్’ మూడో, చివరి సీజన్ ఈ వారమే వస్తోంది. డీస్టోపియన్ సర్వైవల్ థ్రిల్లర్‌గా పేరు గాంచిన ఈ సిరీస్ తన మూడో (చివరి) సీజన్‌తో ఈ వారం మన ముందుకు వస్తోంది. ‘స్క్విడ్ గేమ్’ సీజన్ 3 గురించి మీరు తెలుసుకోవాల్సిన విషయాలు ఇక్కడ ఉన్నాయి.

సీజన్ 2 చివరిలో జి-హున్ (లీ జంగ్-జే), మిగతా ఆటగాళ్ల భవితవ్యం అగమ్యగోచరంగా మిగిలిపోవడంతో, ఈ చివరి సీజన్ కోసం అభిమానులు చాలా ఆత్రుతగా ఎదురు చూస్తున్నారు. అండర్‌కవర్ ప్లేయర్‌గా కాసేపు కనిపించిన ఫ్రంట్ మ్యాన్ (లీ బైయుంగ్-హున్) మళ్లీ చీకట్లోకి వెళ్లి, ఇంకెన్ని తప్పులు చేయబోతున్నాడో చూడాలి. మరి ప్రేక్షకులు ఇంకేం ఆశించవచ్చు? ప్లేయర్ 456 ఎట్టకేలకు ఫ్రంట్ మ్యాన్ అసలు రూపాన్ని బయటపెడతాడా? జున్-హో, ఆ ప్రాణాంతక ఆటలు జరిగే ద్వీపాన్ని కనుగొనే తన లక్ష్యంలో విజయం సాధిస్తాడా?

అభిమానులు సమాధానాల కోసం వేచి చూస్తున్న ప్రశ్నల్లో ఇవి కొన్ని మాత్రమే.

చివరి సీజన్‌లో లీ జంగ్-జే, లీ బైయుంగ్-హున్, వి హా-జూన్, పార్క్ సంగ్-హూన్, కాంగ్ హా-నేయుల్, కాంగ్ ఏ-షిమ్, పార్క్ గ్యు-యంగ్, యాంగ్ డాంగ్-గీన్, జో యు-రి, ఇంకా రోహ్ జే-వోన్ వంటి నటులు కనిపించనున్నారు.

74వ ప్రైమ్‌టైమ్ ఎమ్మీస్‌లో డ్రామా సిరీస్‌కు ‘అవుట్‌స్టాండింగ్ డైరెక్టింగ్’ అవార్డు గెలుచుకున్న తొలి ఆసియా వ్యక్తిగా నిలిచిన హ్వాంగ్ డాంగ్-హ్యుక్, ఈ సీజన్‌కి కూడా దర్శకుడిగా, నిర్మాతగా, రచయితగా తిరిగి వస్తున్నారు.

‘స్క్విడ్ గేమ్’ సీజన్ 3: విడుదల తేదీ, సమయం

‘స్క్విడ్ గేమ్’ మూడో సీజన్ ఈ శుక్రవారం, జూన్ 27న నెట్‌ఫ్లిక్స్‌లో ప్రీమియర్ అవుతుంది. ‘స్క్విడ్ గేమ్’ మొదటి సీజన్ 2021 సెప్టెంబర్‌లో విడుదలై, విమర్శకుల ప్రశంసలు, అంతర్జాతీయ గుర్తింపు పొందింది. ఇది నెట్‌ఫ్లిక్స్‌లో అత్యధికంగా చూసిన సిరీస్‌లలో ఒకటిగా నిలిచి, ఆరు ప్రైమ్‌టైమ్ ఎమ్మీ అవార్డులతో సహా చాలా అవార్డులను గెలుచుకుంది.

గతేడాది డిసెంబర్‌లో ‘స్క్విడ్ గేమ్’ సీజన్ 2 వచ్చింది. రెండో సీజన్‌కు మిశ్రమ స్పందన వచ్చింది. నటన, సిరీస్‌లోని అంతర్గత సందేశాలను విమర్శకులు మెచ్చుకున్నా, కథనంపై మాత్రం కొన్ని విమర్శలు వచ్చాయి.

కొరియా గాయకుడు, నటుడు యిమ్ సి-వాన్, చివరి సీజన్‌లో మ్యుంగ్ గీ (ప్లేయర్ 333) పాత్రలో తిరిగి వస్తున్నారు. ఇటీవలే HTకి ఇచ్చిన ప్రత్యేక ఇంటర్వ్యూలో, తను ఆ పాత్రను కనీసం స్క్రిప్ట్ కూడా చదవకుండానే అంగీకరించానని, కేవలం షోకు అభిమానిని కాబట్టే ఒప్పుకున్నానని చెప్పారు.

“మొదటిసారి మ్యుంగ్ గీ పాత్రను చూసినప్పుడు, అతను ఎప్పుడూ మంచి, చెడుల మధ్య ఊగిసలాడే వ్యక్తిగా అనిపించాడు… పూర్తిగా చెడ్డవాడు కాకుండా, కొంచెం అమాయకపు వ్యక్తి అని చెప్పడం న్యాయమేమో అని నాకనిపించింది” అని ఆయన అన్నారు.