మురళీ మోహన్, ఆమని ప్రధాన పాత్రల్లో న‌టిస్తున్న మూవీ ఆంధ్రుల అన్న‌పూర్ణ డొక్కా సీత‌మ్మ‌. వల్లూరి రాంబాబు , మట్టా శ్రీనివాస్ నిర్మాతలుగా టి.వి. రవి నారాయణ్ దర్శకత్వంలో ఈ మూవీ తెర‌కెక్కుతోంది. ఆంధ్రుల అన్నపూర్ణ డొక్కా సీతమ్మ’. ఇటీవ‌ల మురళీ మోహన్ బర్త్ డే సందర్భంగా సినిమా నుంచి ఆయ‌న స్పెషల్ పోస్టర్‌ను, గ్లింప్స్ నీ రిలీజ్ చేశారు. ఈ క్రమంలో నిర్వహించిన కార్యక్రమంలో..

జీవిత క‌థ‌తో…

మురళీ మోహన్ మాట్లాడుతూ .. ‘డొక్కా సీతమ్మ జీవిత క‌థ‌తో సినిమా తీయాలని చాలా మంది అనుకున్నారు. కాటన్ దొర సైతం డొక్కా సీతమ్మ ను పొగిడారు. సన్మానం చేస్తామని లండన్‌కు రమ్మని పిలిస్తే సైతం డొక్కా సీతమ్మ వెళ్లలేదు. ‘నేను అక్కడికి వస్తే ఇక్కడ వారి ఆకలి ఎవరు తీరుస్తారు?’ అని డొక్కా సీతమ్మ నిరాకరించారు. అలాంటి ఓ గొప్ప మనిషి మీద సినిమాను తీస్తుండటం ఆనందంగా ఉంది’ అని అన్నారు.

టైటిల్ పాత్ర‌లో ఆమ‌ని…

దర్శకుడు టి.వి. రవి నారాయణ్ మాట్లాడుతూ .. ‘డొక్కా సీత‌మ్మ క‌థ‌తో సినిమా చేయాల‌ని అనుకున్న క్ష‌ణం నుంచి మురళీ మోహన్ నన్ను ఎంకరేజ్ చేస్తూనే ఉన్నారు. ఆయన వల్లే ఈ బ‌యోపిక్‌ ఇక్కడి వరకు వచ్చింది. డొక్కా సీత‌మ్మ పాత్ర‌కు ఆమ‌ని వంద‌శాతం న్యాయం చేసింది. త‌ప్ప‌కుండా తెలుగు ప్రేక్ష‌కుల‌ను ఈ బ‌యోపిక్ మూవీ మెప్పిస్తుంది” అని పేర్కొన్నారు.

ఆ ఇద్ద‌రే గుర్తొస్తారు…

రేలంగి నరసింహారావు మాట్లాడుతూ ..‘డొక్కా సీతమ్మ గురించి మేం చదువుకునే రోజుల్లో చాలా విన్నాం. ఇక ఆమె కథతో సినిమా తీస్తున్నారని తెలియడంతో ఎంతో ఆనందంగా అనిపించింది. ఈ చిత్రం పెద్ద విజయం సాధించాలి. ఇండస్ట్రీలో మంచితనం అంటే సూపర్ స్టార్ కృష్ణ, మురళీ మోహన్ పేర్లు వినిపిస్తూనే ఉంటాయి. మా గురువు దాసరి గారు అయితే మురళీ అంటూ కొడుకుని పిలిచినట్టుగా ప్రేమగా పిలుస్తుండేవారు’ అని అన్నారు.

డొక్కా సీత‌మ్మ మూవీలో మురళీ మోహన్, ఆమని, రాజమౌళి, ఆకెళ్ల, జబర్దస్త్ అప్పారావు కీల‌క పాత్ర‌ల్లో న‌టిస్తున్నారు.