Siddipet Tragedy : కాపాడేందుకు వచ్చి తన ప్రాణాలను పొగొట్టుకున్నాడు – కారు ప్రమాదంలో విషాద ఘటన

రోడ్డు ప్రమాదానికి గురైన వారిని కాపాడేందుకు వెళ్లిన ఓ వ్యక్తి ప్రాణాలు కోల్పోయాడు.  మృత్యువు రూపంలో వచ్చిన ఆటో అతనిని బలంగా ఢీకొట్టింది. ఈ ప్రమాదంలో సదరు వ్యక్తి  ప్రాణాలను పోగొట్టుకున్నాడు. ఈ విషాద సంఘటన సిద్దిపేట జిల్లా అక్బర్ పేట- భూంపల్లి మండల పరిధిలోని చిట్టాపూర్ గ్రామ శివారులో చోటుచేసుకుంది.

పోలీసులు తెలిపిన వివరాల ప్రకారం… కామారెడ్డి జిల్లా బీబీపేటకు చెందిన రాజేందర్ తన కుటుంబసభ్యులతో కలిసి కారులో సిద్దిపేట వైపు వెళ్తున్నాడు. కాగా అక్బర్ పేట- భూంపల్లి మండలం చిట్టాపూర్ గ్రామం వద్ద వీరు ప్రయాణిస్తున్న కారు అతి వేగంగా వచ్చి డివైడర్ ను ఢీకొట్టింది. దీంతో పెద్దగా శబ్దం రావడంతో అక్కడే నివసిస్తున్న గ్రామవాసి ఇర్కోటి రామాగౌడ్ (62) బయటకు వచ్చి చూశాడు. అక్కడ డివైడర్ ను ఢీకొట్టిన కారు కనపడడంతో వెంటనే అక్కడికి చేరుకొని కారులో ఇరుక్కున్న క్షతగాత్త్రులను బయటకు తీశాడు.

ఆటో ఢీకొట్టడంతో …….

ఈ క్రమంలోనే భూంపల్లి నుండి సిద్దిపేట వైపు అతి వేగంగా వెళ్తున్న ఆటో రామాగౌడ్ ను బలంగా ఢీకొట్టింది. దీంతో రామాగౌడ్ తలకు తీవ్ర గాయాలై అక్కడికక్కడే మృతి చెందాడు. ప్రమాదంలో ఉన్నవారిని కాపాడాలని వచ్చి తన ప్రాణాలు పోగొట్టుకోవడంతో చిట్టాపూర్ గ్రామంలో విషాద ఛాయలు అలుముకున్నాయి. అది గమనించిన స్థానికులు, కుటుంబసభ్యులు పోలీసులకు సమాచారం అందించారు. 

పోలీసులు ఘటన స్థలానికి చేరుకొని మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. కాగా రామాగౌడ్ మృతి చెందడంతో అతని కుటుంబీకులు బోరున విలపిస్తున్నారు. మృతుడి కుమారుడు పరశురాములు ఇచ్చిన ఫిర్యాదు మేరకు పోలీసులు… కారు,ఆటో డ్రైవర్లపై కేసు నమోదు చేసి దర్యాప్తు చేస్తున్నామని తెలిపారు.

మరో రోడ్డు ప్రమాదం….

సోదరుడికి రాఖీ కట్టడానికి వెళ్తుండగగా విషాదం జరిగింది. కారు జోగిపేట పట్టణంలో రోడ్డు ప్రమాదానికి గురైంది. ఈ ప్రమాదంలో భార్య, కుమారుడు స్వల్ప గాయాలతో బయటపడగా భర్త చికిత్స పొందుతూ మృతి చెందాడు. ఈ సంఘటన సోమవారం అర్ధరాత్రి సంగారెడ్డి జిల్లా జోగిపేటలో జరిగింది. 

పోలీసులు తెలిపిన వివరాల ప్రకారం సంగారెడ్డి జిల్లా జోగిపేట పట్టణానికి చెందిన సారా వెంకటేశం కుమార్తె సింధును హైదరాబాద్ నాగోల్ కు చెందిన అభిలాష్ (35) కు ఇచ్చి ఐదు సంవత్సరాల క్రితం వివాహం జరిపించారు. వారికీ ఒక కుమారుడు ఉన్నాడు. కాగా వీరి కుటుంబం రాఖి పండగ సందర్భంగా సోమవారం సాయంత్రం కారులో నాగోల్ నుండి జోగిపేటకు బయల్దేరారు. కాగా వారు ప్రయాణిస్తున్న కారు జోగిపేట బస్సు స్టాండ్ ఎదురుగా ఉన్న డివైడర్ స్తంభాన్ని బలంగా ఢీకొట్టింది. 

ఈ ప్రమాదంలో సింధు, రియన్స్ కు స్వల్ప గాయాలు కాగా అభిలాష్ ను చికిత్స నిమిత్తం హైదరాబాద్ కు తరలిస్తుండగా మార్గమధ్యలో మృతి చెందాడు. ఇంకో ఐదు నిమిషాల్లో అత్తగారింటికి చేరుకుంటామనే లోపే ఈ ప్రమాదం చోటుచేసుకుంది. అభిలాష్ మృతితో వారి కుటుంబం తీవ్ర విషాదంలో మునిగిపోయింది. ఈ మేరకు పోలీసులు కేసు నమోదు చేసుకొని దర్యాప్తు చేస్తున్నట్లు తెలిపారు.

రిపోర్టింగ్ – ఉమ్మడి మెదక్ జిల్లా ప్రతినిధి, HT తెలుగు.