మన శరీరంలోనే అతి పెద్ద అవయవం కాలేయం (లివర్). ఇది ఆహారాన్ని జీర్ణం చేయడానికి, శక్తిని నిల్వ చేయడానికి, అలాగే శరీరంలోని విష పదార్థాలను బయటకు పంపడానికి సహాయపడుతుంది. అయితే, ఈ మధ్య కాలంలో చాలా మందికి ‘ఫ్యాటీ లివర్’ సమస్య వస్తోంది.

జాతీయ ఆరోగ్య సంస్థ (NIH) ప్రకారం నాన్-ఆల్కహాలిక్ ఫ్యాటీ లివర్ డిసీజ్ (NAFLD) ప్రపంచవ్యాప్తంగా 30 శాతం మందిలో కనిపిస్తోంది. ఈ సంఖ్య పెరుగుతోందని కూడా వారు చెబుతున్నారు. అంటే, ఈ సమస్యపై అవగాహన పెంచడం, ప్రజలు తమ ఆహారపు అలవాట్లు, జీవనశైలిని మెరుగుపరుచుకోవడం ఎంత అవసరమో అర్థం చేసుకోవచ్చు.

ఈ నేపథ్యంలో ఎయిమ్స్, హార్వర్డ్, స్టాన్‌ఫర్డ్ విశ్వవిద్యాలయాల్లో శిక్షణ పొందిన ప్రముఖ గ్యాస్ట్రోఎంటరాలజిస్ట్, లివర్ స్పెషలిస్ట్ డాక్టర్ సౌరభ్ సేథి జూన్ 26న పోస్ట్ చేసిన ఒక వీడియోలో 10 సాధారణ ఆహార పదార్థాలను వాటి ‘ఫ్యాటీ లివర్ స్నేహపూర్వక’ గుణాల ఆధారంగా 1 నుండి 10 స్కేల్‌లో ర్యాంక్ ఇచ్చారు.

మీకు ఫ్యాటీ లివర్ ఉన్నట్లయితే ఏ ఆహారాలు ప్రమాదకరమో, ఏవి మంచివో తెలుసుకుని సరైన నిర్ణయాలు తీసుకోవడానికి ఈ జాబితా సహాయపడుతుంది.

ఫ్యాటీ లివర్‌కు ఏది మంచిది? ఏది కాదు?

డాక్టర్ సేథి “మీరు ఫ్యాటీ లివర్‌తో బాధపడుతున్నారా, లేదా మీ కాలేయ ఆరోగ్యం గురించి ఆందోళన చెందుతున్నారా? ఈ వీడియోలో తాజా శాస్త్రీయ పరిశోధనలు, వైద్య ఆధారాల ఆధారంగా ఫ్యాటీ లివర్‌కు ఏది మంచిదో, ఏది చెడ్డదో తెలియజేసే 10 సాధారణ ఆహారాలను ర్యాంక్ చేశాను..’ అని ఆ వివరాలు షేర్ చేశారు. ఇందులో 10 అత్యుత్తమ స్కోరుగా చెప్పారు. ఈ జాబితాలో బ్లాక్ కాఫీ అత్యుత్తమంగా నిలిచింది.

1. గ్రీన్ టీ: 5/10
2. స్మూతీస్: 4/10
3. బెర్రీస్: 7/10
4. చియా, తులసి గింజలు: 8/10
5. బీట్‌రూట్: 6/10
6. బాగా పండిన అరటిపండు: 3/10
7. తాజా పండ్ల రసం (Freshly squeezed fruit juice): 2/10
8. అవకాడో: 9/10
9. స్టోర్లలో కొన్న పండ్ల రసం (Store-bought fruit juice): 1/10
10. బ్లాక్ కాఫీ: 10/10

అసలు ఫ్యాటీ లివర్ అంటే ఏమిటి?

మెడ్‌లైన్‌ప్లస్ (MedlinePlus) ప్రకారం ఫ్యాటీ లివర్ వ్యాధి అంటే కాలేయంలో కొవ్వు పేరుకుపోయే పరిస్థితి. ఇది ప్రధానంగా రెండు రకాలు. ఒకటి నాన్-ఆల్కహాలిక్ ఫ్యాటీ లివర్ డిసీజ్ (NAFLD), రెండోది ఆల్కహాలిక్ ఫ్యాటీ లివర్ డిసీజ్ (ఆల్కహాలిక్ స్టెటోహెపటైటిస్ అని కూడా అంటారు). నాన్-ఆల్కహాలిక్ ఫ్యాటీ లివర్ డిసీజ్‌కు కారణం ఇంకా పూర్తిగా తెలియదు. అయితే, పరిశోధకులు కొన్ని విషయాలను గుర్తించారు. ఈ సమస్య ఎక్కువగా కింది లక్షణాలు ఉన్నవారిలో కనిపిస్తుంది.

• టైప్ 2 డయాబెటిస్, ప్రీడయాబెటిస్ ఉన్నవారు.
• ఊబకాయం ఉన్నవారు.
• మధ్య వయస్కులు లేదా అంతకంటే ఎక్కువ వయస్సు ఉన్నవారు (పిల్లల్లో కూడా ఇది రావచ్చు).
• రక్తంలో కొలెస్ట్రాల్, ట్రైగ్లిజరైడ్స్ వంటి కొవ్వు స్థాయిలు ఎక్కువగా ఉన్నవారు.
• అధిక రక్తపోటు ఉన్నవారు.
• మెటబాలిక్ సిండ్రోమ్ వంటి కొన్ని జీవక్రియ సంబంధిత రుగ్మతలు ఉన్నవారు.
• వేగంగా బరువు తగ్గినవారు.
• హెపటైటిస్ సి వంటి కొన్ని ఇన్ఫెక్షన్లు సోకినవారు.
• కొన్ని రకాల విష పదార్థాలకు గురైనవారు.

(పాఠకులకు గమనిక: ఈ వ్యాసం కేవలం సమాచారం అందించడం కోసం మాత్రమే. ఇది వైద్య నిపుణుల సలహాకు ప్రత్యామ్నాయం కాదు. ఏదైనా ఆరోగ్య సమస్య గురించి మీకు ఏవైనా సందేహాలు ఉంటే, మీ వైద్యుడిని సంప్రదించడం ఎల్లప్పుడూ మంచిది.)