బాదం పప్పులు సూపర్ ఫుడ్. ఇది తినడం వల్ల ఆరోగ్యానికి ఎంతో మంచిది. ఇది అనేక వ్యాధుల నుండి మిమ్మల్ని రక్షిస్తుంది. బాదంలో ప్రోటీన్ తో పాటూ ఆరోగ్యకరమైన కొవ్వు, ఫైబర్, విటమిన్లు వంటి పోషకాలు ఉంటాయి. వీటిని తినడం వల్ల గుండె, మెదడు, ఎముకలు, జీర్ణక్రియ, చర్మానికి కూడా ప్రయోజనం చేకూరుతుంది. బాదం పప్పుల్లో విటమిన్ ఇ పుష్కలంగా ఉంటుంది. బాదంను చర్మ సంరక్షణలో భాగం చేసుకోవచ్చు. బాదం పప్పుతో చేసిన ఫేస్ ప్యాక్ ను వేసుకుని చర్మాన్ని మెరిపించుకోవచ్చు.

ఓట్స్ బాదం ఫేస్ ప్యాక్

ఓట్స్ పొడి – ఒక స్పూను

బాదం పప్పులు – మూడు

పచ్చి పాలు – రెండు స్పూన్లు

ఓట్స్ ను మిక్సీలో వేసి మెత్తగా పొడి చేసుకోవాలి. ముందుగానే బాదం పప్పును నీటిలో నానబెట్టి మెత్తగా రుబ్బుకోవాలి. ఒక గిన్నెలో ఓట్స్ పొడి, బాదం పప్పు పేస్టు వేసి బాగా కలుపుకోవాలి. అందులో పచ్చి పాలు వేసి కలుపుకోవాలి. ఈ ప్యాక్ ను ముఖమంతా అప్లై చేసి సర్క్యులర్ మోషన్ లో సున్నితంగా మసాజ్ చేయాలి. పావుగంట పాటు ముఖానికి రాసుకుని తర్వాత చల్లటి నీటితో కడిగేయాలి. చర్మం మరీ పొడిబారితే అందులో బాదం పొడికి బదులు నూనె కూడా వాడొచ్చు.

ముల్తానీ మిట్టి బాదం ఫేస్ ప్యాక్

ముల్తానీ మిట్టి – ఒక స్పూను

బాదం పప్పులు – మూడు

రోజ్ వాటర్ – నాలుగు స్పూన్లు

ఒక గిన్నెలో ముల్తానీ మిట్టి, రుబ్బిన బాదం పప్పు పేస్టు, రోజో వాటర్ కలిపి ఫేస్ ప్యాక్ తయారు చేసుకోవాలి. ఈ స్మూత్ పేస్ట్ రెడీ అయ్యాక ఈ ప్యాక్ ని ముఖం మొత్తానికి అప్లై చేయాలి. పదినిమిషాలు అలాగే ఉంచి తర్వాత చల్లటి నీటితో కడిగేసుకోవాలి. ఆయిల్ స్కిన్ కు ఈ ఫేస్ ప్యాక్ చాలా మంచిది.

శెనగపిండి బాదం పప్పులు

శెనగపిండి – రెండు స్పూన్లు

పసుపు – చిటికెడు

బాదం పప్పులు – మూడు

నీరు – మూడు స్పూన్లు

ఈ ఫేస్ ప్యాక్ తయారీకి బాదం పప్పులను నానబెట్టి మెత్తగా రుబ్బుకోవాలి. దీన్ని ఒక గిన్నెలో వేయాలి. అందులో శెనగ పిండి, పసుపు, నీరు వేసి బాగా కలుపుకోవాలి. తర్వాత ఈ ప్యాక్ ను ముఖానికి అప్లై చేసి 15 నిమిషాల పాటు వదిలేయాలి. ఆరిన తర్వాత చల్లటి నీటితో కడిగేయాలి.

నిమ్మరసం, బాదం పప్పులు

తేనె – ఒక స్పూను

బాదం పప్పులు – మూడు

నిమ్మరసం – అర స్పూను

బాదం పప్పులు నానబెట్టి మిక్సీలో వేసి మెత్తగా రుబ్బుకోవాలి. ఆ మిశ్రమాన్ని ఒక గిన్నెలో వేయాలి. అందులో తేనె, నిమ్మరసం వేసి బాగా కలుపుకోవాలి. ఈ మిశ్రమాన్ని మీ శుభ్రమైన ముఖానికి అప్లై చేసి సున్నితంగా రుద్దాలి. 10-15 నిమిషాలు అలాగే ఉంచి తర్వాత ముఖాన్ని కడుక్కోవాలి.