వర్షాకాలం వచ్చిందంటే చాలు, నీటి ద్వారా వచ్చే అంటువ్యాధుల ప్రమాదం పెరుగుతుంది. ఇది చాలా రోజులు అనారోగ్యానికి గురిచేసి, కొన్నిసార్లు ఇతర సమస్యలకూ దారితీస్తుంది. ఈ సమయంలో కలుషితమైన నీటిని తాగే అవకాశం ఎక్కువ కాబట్టి, డయేరియా, కలరా వంటి వ్యాధులు వచ్చే ప్రమాదం గణనీయంగా పెరుగుతుంది.

HT లైఫ్‌స్టైల్‌కు ఇచ్చిన ఒక ఇంటర్వ్యూలో, భువనేశ్వర్‌లోని మణిపాల్ హాస్పిటల్ కన్సల్టెంట్ ఇంటర్నల్ మెడిసిన్ డాక్టర్ జయంతి ఖురా మాట్లాడుతూ, “ఇదంతా కలుషితమైన ఆహారం, నీరు, అలాగే వానాకాలంలో పరిశుభ్రత సరిగా లేకపోవడం వల్లే జరుగుతుంది. అయితే, ఈ పరిస్థితులను నివారించవచ్చు. చికిత్స కూడా చేయవచ్చు” అని వివరించారు.

వర్షాకాలంలో డయేరియా, కలరా నుంచి సురక్షితంగా ఉండటానికి డాక్టర్ జయంతి ఖురా 5 ముఖ్యమైన చిట్కాలను పంచుకున్నారు.

1. చేతులను శుభ్రంగా ఉంచుకోండి:

వ్యాధులను నివారించడానికి ఇది చాలా ముఖ్యమైన విషయం. ఆహారం తినడానికి ముందు, కనీసం 20 సెకన్ల పాటు సబ్బు, నీటితో మీ చేతులను శుభ్రంగా కడుక్కోవాలి. చేతులు కడుక్కోవడం వల్ల డయేరియాకు కారణమయ్యే అన్ని క్రిములు నశిస్తాయి, మీరు సురక్షితంగా ఉంటారు.

2. శుభ్రమైన నీటిని మాత్రమే తాగండి:

వర్షాకాలంలో డయేరియా, కలరాకు ప్రధాన కారణాలలో నీరు ఒకటి. కలుషితమైన నీరు మిమ్మల్ని క్షణాల్లో అనారోగ్యానికి గురి చేస్తుంది. కాబట్టి, మీరు శుభ్రమైన నీటిని మాత్రమే తాగాలి. వీలైతే, మీ ఇంట్లో RO లేదా వాటర్ ప్యూరిఫైయర్‌ను ఏర్పాటు చేసుకోండి. అది సాధ్యం కాకపోతే, నీటిని బాగా మరిగించి, మూత పెట్టిన పాత్రలో నిల్వ చేసుకోండి.

3. పండ్లు, కూరగాయలను సరిగ్గా కడగండి:

వండటానికి లేదా తినడానికి ముందు మీ పండ్లు, కూరగాయలను శుభ్రమైన నీటితో బాగా కడగాలి. కోసిన పండ్లు లేదా కూరగాయలను ఎక్కువసేపు బయట ఉంచకూడదు. ఈగల వంటివి వాటిపై వాలి, కలుషితం చేయవచ్చు.

4. తాజా ఆహారాన్ని తీసుకోండి:

ఎల్లప్పుడూ తాజా ఆహారాన్ని మాత్రమే తినండి. ఒకవేళ ఆహారం చల్లగా ఉంటే, తినడానికి ముందు దాన్ని మళ్ళీ వేడి చేసుకోండి. వాటిని రిఫ్రిజిరేటర్‌లో నిల్వ చేయండి. బయట ఉంచినప్పుడు ఎప్పుడూ మూతపెట్టి ఉంచండి.

5. వర్షాకాలంలో బయటి ఆహారాన్ని నివారించండి:

బయట ఆహారం అమ్మే వాళ్ళు సాధారణంగా పరిశుభ్రతను అంతగా పట్టించుకోరు. ఇది వర్షాకాలంలో డయేరియా ప్రమాదాన్ని పెంచుతుంది. కాబట్టి, కలుషితమైన బయటి ఆహారాన్ని తిని అనారోగ్యాన్ని ఆహ్వానించడం కంటే, ఇంట్లో తాజాగా తయారుచేసిన ఆహారాన్ని తినడం చాలా మంచిది.